نەجمەدین کەریم نهێنیەکانی داگیرکردنی کەرکوک ئاشکرا دەکات

0

نوچەنێت

د. نەجمەدین کەریم، لەبارەی رێککەوتنی بافڵ تاڵەبانی و قاسم سولەیمانی بۆ کشانەوەی هێزەکانیان لە کەرکوک نهێنییەک ئاشکرا دەکات و رایگەیاند “رۆژێک پێش 16 ی ئۆکتۆبەر هەموو شتێکیان بڕاندووەتەوە”.

نەجمەدین کەریم، پارێزگاری لەکارلادراوی کەرکوک، لە چاوپێکەوتنێکیدا لەگەڵ ئاژانسی بلومبێرگی ئەمریکی رایگەیاندووە “ئێستا پلانی ئەوەم نییە بگەڕێمەوە بۆ کەرکوک، ئەگەر بگەڕێمەوە ژیانم دەکەوێتە مەترسییەوە”. 

نەجمەدین کەریم باس لەوە دەکات، کە میلیشیا شیعەکان چوونەتە سەر گەڕەکە کوردنشینەکان و  خەڵکیان ئازارداوە و هەزاران کەسیش شارەکەیان جێهێشتووە. 

هەندێک لە میدیا ئەمریکییەکان باسی رۆڵی ئێران و قاسم سولێمانی، فەرماندەی فەیلەقی قودسی سوپای پاسدارانی ئێران لە شەڕی کەرکوکدا دەکەن. ماڵپەڕی بلومبێرگ دەنووسێت: رۆژی یەکشەممە قاسم سولێمانی، لەگەڵ هێرۆ ئیبراهیم ئەحمەد و برازاکانی جەلال تاڵەبانیدا رێککەوتووە. 

هەروەها نەجمەدین کەریم دەڵێت “ئەوان گەیشتنە تێگەیشتنێک بۆئەوەی فەرماندەکانی پێشمەرگە لە شەڕەکەدا بەشدار نەبن، ئەوەش کاتێک هێزە عێراقییەکان هاتنە نێو کەرکوکەوە. رۆژێک پێش هێرشەکە، بافڵ، کوڕە گەورەی مام جەلال و لاهور، برازاکەی و ئاراز، براگەورەی لاهور، هاتنە کەرکوک و لەوێ لەگەڵ نوێنەری قاسم سولەیمانی کۆبوونەوە. نوێنەرەکەی سولێمانی دوایین پەیامی خۆی پێڕاگەیاندن و گوتی، ئێوە یان پێگەکانتان بەجێدەهێڵن یان هێرشتان دەکەینە سەر”. 

بلومبێرگ دەنووسێت: هەندێک لە پێشمەرگەکان شەڕی سوپای عێراقیان کرد، بەڵام پاشەکشەی یەکە سەرەکییەکان، واتای ئەوەبوو، کە سوپای عێراق توانی بە ئاسانی کەرکوک بگرێت. بەڵام نەجمەدین کەریم دڵنیایە لەوەی رۆژێک ئەم بارودۆخە دەگۆڕێت و دەڵێت: “رۆژێک دەگەڕێینەوە بۆ کەرکوک، دڵنیا نیم ئەو گەڕانەوەیە کەی دەبێت، بەڵام هەر دەگەڕێینەوە”.

Share.

About Author

بوچون نوسین داخراوە.

Social Media Auto Publish Powered By : XYZScripts.com