ئامانجی راگەیەنراوەکەی بەغدا لەسەر بە قاچاخ بردنی نەوتی کەرکوک ئاشکرا دەکرێت

0

نوچەنێت: تایبەت

وەزارەتی ناوخۆی عێراق دەستبەسەرداگرتنی تانکەرێکی نەوتی راگەیاند، کە نەوتی یەکێک لە کێڵگە نەوتییەکانی کەرکوکی “بە قاچاخ” دەگواستەوە. ئەندامێکی ئەنجومەنی پارێزگای کەرکوک- یش دەڵێت “ئەوە خۆڵ بەچاو خەڵکدا کردنە، ئەگەر نا بەئاشکرا نەوتی کەرکوک بە قاچاخ دەگوازرێتەوە”.

ئەمە لە کاتێکدایە، کە لەدوای 16ی ئۆکتۆبەری 2017، کێڵگە نەوتییەکانی کەرکوک کەوتنە دەست هێزە عێراقییەکان. هەردوو وەزارەتی نەوتی عێراق و ئێران لەسەر نەوتی کەرکوک رێککەوتن بۆ ئەوەی نەوتەکە رەوانەی ئێران بکرێت.

لە لێدوانێکی تایبەت بە نوچەنێت، ئەحمەد عەسکەری، ئەندامی ئەنجومەنی پارێزگا کەرکوک، لەسەر لیستی برایەتی، لەبارەی بەیاننامەکەی وەزارەتی ناوخۆی عێراقەوە رایگەیاند: بابەتەکە یەک تەنکەر و دوو تەنکەر نییە و ئەوەی وەزارەتی ناوخۆی عێراق باسی دەکات “خؤڵکردنە چاوی خەڵکە” بۆ داپۆشینی کارەکانی خۆیانە.

ئەحمەد عەسکەری ئاماژە بەوە دەکات، کە لە کەرکوک بە ئاشکرا نەوتەکە دەبردرێت، خێرە دەستیان بەسەر تانکەرێکدا گرتوو. 

ئەمڕۆ پێنجشەممە 14-6-2018، لە راگەیێندراوێکدا لیوا سەعد مەعن، گوتەبێژی وەزارەتی ناوخۆی عێراق رایگەیاند، هێزەکانی هەواڵگری پۆلیسی وزەی سەر بە ئاژانسی هەواڵگری و لێکۆڵینەوەی فیدراڵی وەزارەتی ناوخۆ بە هاوکاری لەگەڵ پۆلیسی وزە، لە نزیک کێڵگەی نەوتی “جنبوور” لە باشووری کەرکووک، دەستیان بەسەر تانکەرێکی نەوت و حەوزێکی کۆگاکردنی نەوتدا گرتووە، کە بە قاچاخ نەوتی پێبراوە.

گوتەبێژی وەزارەتی ناوخۆی عێراق ئاماژەی بەوەشکردووە، پاڵپشت بە زانیاری هەواڵگریی، هەڵمەتێکی گەڕان و پشکنینیان ئەنجامداوە و رێوشوێنی یاساییان لەبارەوە گرتووەتەوەبەر.

Share.

About Author

بوچون نوسین داخراوە.

Social Media Auto Publish Powered By : XYZScripts.com