برای رامین حوسێن پەناهی: پشتیوانمان بن

0

نوچەنێت: تایبەت

برایەکی رامین حوسێن پەناهی رایدەگەیەنێت، شەوی رابردوو رامین بە شێوەیەكی نهێنی لە زیندانی شاری سنە براوەتە دەرەوە دەڵێن لە زیندانی رەجایی شاری کەرەج دایە. دەشڵێت “جارێكیتر داوا لە سەرجەم كۆمەڵانی خەڵكی كوردستان و ئازادیخوازانی ئێرانی دەكەین، پشتیوانمان بن”.
رامین حوسێن پەناهی، پێشمەرگەی كۆمەڵە بووە و نزیک بە ساڵێک پێش ئێستا بۆ بینینی كەسوكاری گەڕابووەوە رۆژهەڵاتی كوردستان، لە رێگا لە لایەن هێزە ئەمنییەکانی ئێرانەوە تەقەی لێكرا و بە برینداری دەستگیر كرا؛ دواتر حوکمی لەسێدارەدانی بەسەردا سەپاوە.

هەروەها لەبارەی حوکمی لەسێدارەدانی ناوبراو، نەتەوە یەكگرتووەكان و ژمارەیەك رێكخراوی دیكەی نێودەوڵەتی بۆ مافەكانی مرۆڤ، داوایان لە كۆماری ئیسلامی ئێران كردووە، سزای لە سێدارەدانی ئەو گەنجە هەڵبوەشێنێتەوە.

لە لێدوانێکی تایبەت بە نوچەنێت، رەفیق حوسێن پەناهی، كە برای رامینە، نوێترین زانیاری لەبارەی براكەی ئاشكرا کرد و رایگەیاند: شەوی رابردوو کاتژمێر ١١:٠٠ بە شێوەیەكی نهێنی و بەبێ ئاگاداری پارێزەر و بنەماڵەکەی لە زیندانی شاری سنە گواستراوەتەوە، پاش ئاگادار بوونەوەی پارێزەر و بنەماڵەکەمان لەلایەن برایەکی دیکەمان بە ناوی “ئەفشین حوسێن پەناهی”، کە ئەویش زیندانییە و لە گەڵی بووە، سەردانی زیندانیان کرد و  پێیان راگەیاندوون، كە لە زیندانی رەجایی شاری كەرەجە، بەڵام تاكوو ئێستا هیچ كەسێك رامینی لە نێو زیندانی رەجایی شار نەبینیوە و دڵنیا نیین لەوێ بێت.
رفێق حوسێن پەناهی ئاماژە بەوە دەکات، گواستنەوەی رامین ئاماژەیەكی مەترسیدارە و بنەماڵەمانی نیگەران كردووە. هەروەها لە ماوەی مانگەكانی رابردوودا بەرپرسانی ئەمنی و دادوەری شاری سنە، زۆر جار ویستیان لە دەرفەتەكان كەڵك وەربگرن بۆ ئەوەی رامین ئیعدام بكەن؛ بەڵام بەهۆی شەپۆلێكی بەرینی ناڕەزایەتی خەڵكی كوردستان بە گشتی و بە تایبەتی چالاكانی مەدەنی و سیاسی و كەسایەتییەكانی لێكەوتەوە، هەر ئەمەش وای كرد رژێم بترسێت لەوەی، کە لە گەڵ ناڕەزایەتی و سەر هەڵدانێكی بەرینی خەڵك رووبەڕوو دەبێتەوە.
براکەی رامین گوتیشی “ئێمە وەكوو بنەماڵە حوسێن پەناهی نیگرانین لە گواستنەوەی رامین بۆ زیندانی رەجایی شار و ئەوە بەو مانایە دێت، کە ئەوەی لە زیندانی شاری سنە بە هۆی ترس لە خەڵك بۆیان نەدەكرا لە زیندانی رەجایی شار ئەنجامی بدەن”.
رفێق حوسێن پەناهی راشیدەگەیەنێت، وەكوو بنەماڵەی حوسێن پەناهی جارێكیتر داوا لە سەرجەم كۆمەڵانی خەڵكی كوردستان و ئازادیخوازانی ئێرانی دەكەین، پشتیوانمان بن، بۆ بەرزكردنەوەی دەنگی ناڕەزایەتیمان لە بەرامبەر ئەم حوكمە ناڕەوایە و هیوادارین ئەم جارەش بە هەوڵ و هیمەتی هەموومانەوە بتوانین پارێزگاری لە گیانی رامین بكەین. 
لە ماوەی مانگەكانی رابردوودا ئەگەر گوشارە میدیایەكان، رێكخراوە مەدەنی و مرۆڤدۆستە جیهانییەكان، هەوڵ و هیمەت و دەنگ هەڵبڕینی تێكۆشەرانی كورد لە سەرتاسەری جیهان و بە تایبەتی كۆمەڵانی خەڵكی كوردستان لە نێو خۆ بە هەموو چین و توێژەكانیەوە نەبوونایە، بەگوتەی رفێق حوسێن پەناهی، “رامین لەسێدارە دەدرا”.
Share.

About Author

بوچون نوسین داخراوە.

Social Media Auto Publish Powered By : XYZScripts.com