پەیامی ناڕەزایەتی دژی ئێران گەیەندرایە یۆئێن

0

نوچەنێت: تایبەت

پێشنیوەڕۆی ئەمڕۆ (چوارشەممە ١٢-٩-٢٠١٨)، کاتژمێر ١٠، بەشێک لە حزب و ڕێکخراوە سیاسی و مەدەنییەکانی هەر چوارپارچەی کوردستان، چالاکانی سیاسی و مەدەنی رۆژهەڵات و باشوور، بۆ ئیدانەکردنی هێرش و موشەکبارانەی ئێران بۆ سەر بارەگاکانی هەردوو حزبی دیموکرات، لەبەردەم بارەگای یوئێن لە هەولێر گردبوونەوەیەکی ناڕەزایەتییان ئەنجامدا.

ڕۆژی شەممە ٨-٩-٢٠١٨، لە شاری كۆیە هەردوو بارەگای حزبی دیموكرات (حدکا و حدک)  لەلایەن ئێرانەوە مووشەكباران كران، كە بەو هۆیەوە ١٧ کادر و  پێشمەرگە شەهید و زیاتر لە ٤٠ کەسی دیکەش بریندار بوون.

لە لێدوانیكی تایبەت بە نوچەنێت، عەلی ئەحمەدی، چالاکی مەدەنی و یەکێک لە بەشدارانی گردبوونەوەی بەردەم یۆئێن، رایگەیاند: لەو گردبوونەوەیەدا، کە لەسەر بانگەوازی نوێنەرایەتی بەشێک لە حزب و پارتە سیاسییەکان رێکخرابوو، بەشداربووان بە هەڵگرتنی وێنەی شەهیدانی رووداوەکەی هێڕشی موشەکی کۆیە و ئەو چالاکانەی لە سێدارەدران، هەروەها هەڵواسینی پۆستەر و هەڵگرتنی دروشم دژی کۆماری ئیسلامی ئێران، سیاسەتەکانی ئەو حکومەتیان لەدژی کورد ئیدانەکرد.

عەلی ئەحمەدی دەشڵێت، نوێنەرایەتی حزبەکانی رۆژهەڵاتی کوردستان بە خوێندنەوەی ڕاگەیەندراوێک داوایان لە رێکخراوی نەتەوەیەکگرتووەکان، نوێنەرایەتی یەکێتی ئەوروپا لە هەرێمی کوردستان و کونسووڵگەری وڵاتان و لایەنگرانی مافی مرۆڤ کردووە، کە لە بەرانبەر هێرشی کۆماری ئیسلامی بۆ سەر بارەگاکانی حزبی دیموکرات و لە سێدارەدانی چالاکانی سیاسی کوردی رۆژهەڵات، بێدەنگ نەبن و لە دژی ئێران و سیاسەتەکانی بووەستنەوە.

ئەو چلاکە مەدەنییە ئاماژەوەی بەوەدا، کە رێکخراوە مەدەنییەکان و ڕۆژنامەنووسانی بێلایەن و حزب و لایەنە سیاسییەکانی هەر چوارپارچەی کوردستان، پەیامی تایبەت بەو بۆنەیان خوێندەوە و دواتر چەند کەس و لایەنێک بە نوێنەرایەتی ئەو جەماوەرە ناڕزاییە یادداشتێکیان ئاراستەی نەتەوە یەکگرتووەکان لە هەرێمی کوردستان کرد.

Share.

About Author

بوچون نوسین داخراوە.

Social Media Auto Publish Powered By : XYZScripts.com