پڕۆژە هاوبەشەکەی پارتی و یەکێتی هەڵدەوەشێتەوە؟

0

نوچەنێت-نەوزاد عەلی

پارتی دیموکراتی کوردستان، پێیوایە هەڵوێستەکەی یەکێتی لەسەر پۆستی سەرۆککۆمار لەبەغدا، کاری کردووەتە سەر پەیوەندی نێوانیان، ئەندامێکی سەرکردایەتی یەکێتی دەڵێت”پێویستە یەکێتی و پارتی کۆببنەوە و بەردەوامی بدەن بەپڕۆژە هاوبەشەکەیان”.

پارتی دیموکراتی کوردستان و یەکیتی نیشتمانی کوردستان،  پڕۆژەیەکی هاوبەشیان بۆ  چوونە بەغدا و چۆنێتی بەشداریکردن لە حکومەتی داهاتووی عێراقدا، ئامادەکردبوو چەندجارێکیش وەفدی هاوبەشیان سەردانی بەغدای کردبوو، بەڵام لەدوای هەڵبژاردنی بەرهەم ساڵح وەک سەرۆککۆماری نوێی عێراق، پەیوەندی نێوان ئەو دوو هێزە ساردی تێکەوت، بە جۆرێک کە تائێستا هیچ کۆبوونەوەیەکیان ئەنجام نەداوە، دیاریش نییە ئاخۆ چارەنوسی پڕۆژە هاوبەشەکەیان بەکوێ دەگات.

لە لێدوانێکی تایبەت بەنوچەنێت، عەلی عەونی ئەندامی سەرکردایەتی پارتی دیموکراتی کوردستان،سەبارەت بە پەیوندی حیزبەکەی لەگەڵ یەکێتی، رایگەیاند”ئەو هەڵوێستەی یەکێتی کە لەبەغدا لەسەر پۆستی سەرۆککۆمار نواندی، کاریگەری کردووەتە سەر پەیوەندییەکانی پارتی لەگەڵ یەکێتی، گومانیشی تێدانییە کە یەکێتی نیشتمانی کوردستان، بڕواو متمانەی پارتی بەخۆی شکاندووە”.

ئەو ئەندامەی سەرکردایەتی پارتی باسی لەوەشکرد، کە حیزبەکەی هەمیشە بەدوای بیانویەکدا گەڕاوە، بۆئەوەی یەکڕیزی و یەکێتی ناوماڵی کورد بپارێزێت و کورد یەک ڕەنگ و یەکگوتاربێت، لەڕابردووشدا پارتی هەموو ئیمتیازاتی خۆی بۆ ڕێکخستنی ناوماڵی کورد لە هەرێمی کوردستان و بەغدا کردووەتە قوربانی.

سەبارەت بە چارەنوسی پڕۆژە هاوبەشەکەی پارتی و یەکێتی بۆ بەغدا، عەلی عەونی گوتی”یەکلایی کردنەوەی چارەنوسی ئەو پڕۆژە هاوبەشە گرێدراوە بە بڕیاری مەکتەبی سیاسی پارتی و یەکێتییەوە و ئەوان بڕیاردەدەن، کە پڕۆژە هاوبەشەکەیان بەردەوام بێت یاخود نا”.

مستەفا چاوڕەش ئەندامی سەرکردایەتی یەکێتی نیشتمانی کوردستان، سەبارەت بە چارەنووسی پڕۆژە هاوبەشەکەیان لەگەڵ پارتی بۆ چوونە بەغدا، بە نوچەنێتی رایگەیاند”ئەو پڕۆژە هاوبەشەی کە پارتی و یەکێتی ئامادەیان کربوو، لەسەر بنەمای داواکارییەکانی خەڵکی کوردستان دانراوە، تائێستا هەڵنەوەشاوەتەوە و هەرماوە”.

سەرکردەکەی یەکێتی جەختیکردەوە، ئەگەر پڕۆژەکەیان ئێستاش جێبەجێنەکرێت، هەر دەمێنێتەوە و هەڵناوەشێتەوە، لەداهاتوودا کاری لەسەر دەکرێت، “بەڵام بەداخەوە ئێستا کەس بەدوایدا ناچێ و هەر لایەنێک ئێستا کە دەچێتە بەغدا، بەجیا دواکاری خۆی دەبێت، ئەگەر بەمشێوەی ئێستا بڕوات”.

ئەو ئەندامەی سەرکردایتەی یەکێتی، بەپێویستی دەزانێت لە نزیکترین کاتدا پارتی و یەکێتی کۆببنەوە و بەردەوامی بدەن بە پڕۆژەهاوبەشەکەیان بۆ بەشداری کردن لەحکومەتی داهاتووی عێراق و دەڵێت”پێویستە یەکێتی ،پارتی و سەرجەم حزبەکانی تری هەرێمی کوردستان، لەسەر شتێکی هاوبەش رێکبکەون بۆئەوەی دەستکەوتی  باش بۆ میللەتی کورد دەستەبەر بکەن”.    

Share.

About Author

بوچون نوسین داخراوە.

Social Media Auto Publish Powered By : XYZScripts.com