کەجەکە وەڵامی بڕیارەکەی ئەمریکا دەداتەوە

0

نوچەنێت

ئه‌نجومه‌نی به‌ڕێوه‌به‌ری هاوسه‌رۆكایه‌تی کۆما جڤاکێن کوردستان (كه‌جه‌كه) لەوەڵامی بڕیاری ئەمریکا دژی پەکەکە رایگه‌یاند “هه‌ڵوێسته‌كه‌ی ئه‌مریكا به‌شێكه‌ له‌ پیلانگێڕی، پێویسته‌ گه‌له‌كه‌مان و هێزه‌ دیموكراتییه‌كان دژی ئەم هەڵوێستە ناڕه‌زایه‌تی پیشانبده‌ن”.

رۆژی سێشەممە ٦-١١-٢٠١٨، لە بەیاننامەیەکدا باڵیۆزخانەی ئەمریکا لە ئەنقەرە رایگەیاند، ئەمریکا بڕیاریداوە بە پێدانی بەخشش بەو کەسانەی کە زانیاری لەبارەی شوێنی سێ سەرکردەی باڵای پەکەکە دەدەن بۆ ئەوەی بکرێنە ئامانج.

 بەپێی لیستەکەی ئەمریکا، بڕی بەخششەکان بەمشێوەیە: “موراد قەرەیڵان پێنج ملیۆن دۆلار، جەمیل بایک چوار ملیۆن دۆلار، دوران کاڵکان سێ ملیۆن دۆلار”.  

ده‌رباره‌ی ئه‌و بڕیاره‌ی ئه‌مریكا کە سێ سەرکردەی (په‌كه‌كه‌)ی خستووەتە لیستی داواکراوەکانی و دەڵێت بەخشش بە هەر کەس دەدات زانیاری لەبارەی شوێنەکانیان بە ئەمریکا بدات، كه‌جه‌كه‌ رایگه‌یاند “له‌ به‌رامبه‌ر ئه‌و هێرشه‌، كه‌ درێژه‌پێده‌ری پیلانگێڕییه‌كه‌یه‌، پێویسته‌ گه‌له‌كه‌مان و هێزه‌ دیموكراتییه‌كان ده‌موده‌ست هه‌ستنه‌ سه‌رپێ و كاردانه‌وه‌ پیشانبده‌ن”.

کەجەکە دەشڵێت “پێویسته‌ به‌رامبه‌ر ئه‌م بڕیاره‌ گه‌له‌كه‌مان تێكۆشانی گەورە بكات و له‌ هه‌موو شوێنێك كورد و دۆسته‌كانی هه‌ستنه‌ سه‌رپێ و به‌م شێوه‌یه‌ وه‌ڵامی ئه‌م بڕیاره‌ بده‌نه‌وه”.

لە راگەیێندراوەکەدا هاتووە “بڕیارەکەی ئەمریکا لەبارەی هەڤاڵانمان جەمیل بایک، دوران کاڵکان و موراد قەرایڵان کە لە دامەزرێنەرانی پەکەکە و کادیری پێشەنگی بزووتنەوەی ئازادی کورد، کە ئێستا لەنێوان پەکەکە و کەجەکە و هەپەگەدان، بڕیارێکی بێ بنەما و تۆمەتبارکردنە و دەستگیرۆیی کردنی فاشیزمە. باسی لەوەشکردووە هەر کێ جێگەی ئەوانیان بۆ ئاشکرابکات بە پارە خەڵات دەکرێت، ئەو هەڵوێست و بڕیارێکی دووژمنانەیە لە دژی بزووتنەوەی ئازادیخوازی کورد دراوە” .

کەجەکە رایگەیاندووە “بڕیارەکەی ئەمریکا هیچ بنەمایەکی سیاسی، کۆمەڵایەتی، ئەخلاقی، ویژدانی و یاسایی نییە. بڕیارێکە بەگشتی بەهۆی ئایدۆلۆژی و سیاسییەوە دراوە. بەڵام بە نیەتێکی دووژمنانە ئەو بڕیارە دراوە. لە کەسایەتی هاوڕێبازەکانماندا نەک تەنیا لە دژی پەکەکە، کەجەکە و هەپەگەیە، بەڵکو لە دژی تەواوی گەلی کورد و تێکۆشانی ئەوانەی درێژە بە دیموکراسی دەدەن، دراوە”.

Share.

About Author

بوچون نوسین داخراوە.

Social Media Auto Publish Powered By : XYZScripts.com