مەرجی گۆڕان بۆ بەشداری لە کابینەی نوێی حکومەت

0

نوچەنێت-نەوزاد عەلی

هەڵسوڕاوێکی بزووتنەوەی گۆڕان ڕایدەگەیەنێت، بەشداری کردنی گۆڕان لە حکومەت لەسەر بنەمای بەرنامە دەبێت و دەشڵێت “حزبەکەی قبوڵی ناکات، حکومەت لەسەر بنەمای ٥٠ بە ٥٠ دابەشبکرێت”.

پارتی دیموکراتی کوردستان، دەیەوێت بە پێی ئیستحقاقی هەڵبژاردن، مامەڵە لەگەڵ لایەنە سیاسییەکانی هەرێم بکات، لەپێکهێنانی کابینەی نۆیەمی حکومەتی هەرێمی کوردستان، یەکێتی نیشتمانی کوردستان براوەی دووەمی هەڵبژاردن، کە خاوەنی هێزی حەکدارە، بە ئاشکرا ڕاگەیاندووە، نایەوێت بەپێی ئیستحقاقی هەڵبژاردن مامەڵەی لەگەڵ بکرێت.

لە لێدوانێکی تایبەت بە نوچەنێت، قارەمان قادر، هەڵسوڕاوی بزووتنەوەی گۆڕان و پەرلەمانتاری خولی پێشووی ئەو حزبە، لە پەرلەمانی کوردستان، سەبارەت بە بەشداری حزبەکەی لە کابینەی نوێی حکومەتی هەرێم، رایگەیاند “من پێموایە بزووتنەوەی گۆڕان ئەگەر بەشداری لە حکومەتدا بکات، بەپێی ئیستحقاقی هەڵبژاردن بەشداری دەکات و کاتێک بەشدار دەبێت، لەسەر کارنامەی سیاسی چوار ساڵی داهاتووی حکومەتی هەرێم ڕێکبکەوێت و بەشداری کردنیشی بەشدارییەکی شەراکەت بێت. هەروەها ئەو وەزارەتانەی پێیدەدرێت دەبێت دەسەڵاتی تەواویان هەبێت”.

قارەمان قادر، جەخت دەکاتەوە لەوەی، حزبەکەی بەشداری لە حکومەتێکدا ناکات، کە لەسەر بنەمای ئەوە بێت تەنها بۆ ئەوەی حکومەتێکی بنکە فراوان بێت، بەهەمان شێوە پارتی و یەکێتی قۆرغی هەموو دەسەڵاتەکان بکەن، بەڵکو دەبێت بەشداری کردن بەپێی ئیستحقاقی هەڵبژاردن بێت.

هەڵسوڕاوەکەی گۆڕان، گوتیشی “گۆڕان دەیەوێت شەریکێکی ڕاستەقینە بێت بۆ داهاتوو، لە سەرکەوتن و شکستی ئەو حکومەتەی تێیدا بەشداری دەکات”.

هەروەها ئەوەشی راگەیاند “گۆڕان قبوڵی ناکات ئەم حکومەتە، لەسەر بنەمای ٥٠ بە ٥٠ یان لەسەر بنەمای مەنتقیەت دابەشبکرێت بەوەی، کە چەند لایەنێکی سیاسی بەهۆی بوونی هێزەوە ڕازی نەبێت بەپێی ئیستحقاقی هەڵبژاردن پۆستی پێبدرێت”.      

Share.

About Author

بوچون نوسین داخراوە.

Social Media Auto Publish Powered By : XYZScripts.com