حکومەت سەبارەت بە کریستیانەکان وەڵامی چەند تۆمەتێک دەداتەوە

0

نوچەنێت

حکومەتی هەرێمی کوردستان وەڵامی ئەو راپۆرتانە دەداتەوە کە تۆمەتباریدەکەن بە پێشێلکردنی مافی کریستیانەکانی هەرێمی کوردستان و گۆڕینی دیموگرافیای ناوچە کریستیاننشینەکانی پارێزگای دهۆک و دەشتی نەینەوا.

حکومەتی هەرێمی کوردستان دەڵێت، سیاسەتەکانی حکومەتی هەرێمی کوردستان و رەشنووسی دەستووری هەرێمی کوردستانیش جەخت لە سەر پاراستنی مافی کریستیانەکان و باشترکردنی بارودۆخیان دەکەنەوە. 

نووسینگەی حکومەتی هەرێمی کوردستان بۆ وەڵامدانەوەی راپۆرتە نێودەوڵەتییەکان لە راپۆرتێکدا جەخت دەکاتەوە لەوەی، لە هەرێمی کوردستان پێکهاتەی جیاوازی ئایینی و ئیتنی دەژین و یەکدی قبوڵکردنیش بەڕوونی دەبیندرێت و هەوڵی حکومەتی هەرێمی کوردستانیش بۆ پاراستنی مافی کریستیانەکان چەندینجار لە لایەن کەسایەتییە ئایینیەکانی کریستیانەکانەوە دانی پێدانراوە. 

بەشێکی بەرفراوانی راپۆرتەکە تایبەتکراوە بە راگەیێندراوی هەندێک دامەزراوەی پەیوەندیدار بە کۆمەڵگەی کریستیان و کەسایەتییە دیارەکانی ناو کریستیانەکان. 

لە راگەیێندراوی بەڕێوەبەرایەتی گشتی کاروباری کریستیانەکاندا لە وەزارەتی ئەوقاف و کاروباری ئایینی حکومەتی هەرێمی کوردستان هاتووە “هێزەکانی پێشمەرگە رۆڵێکی گەورەیان لە کۆنترۆڵکردنەوەی ناوچە کریستیاننیشینەکان لە دەستی داعش گیڕا، بەڵام دواتر زۆربەی خانووی خەڵکی سڤیل لەو ناوچانە لە لایەن حەشدی شەعبی و هێزە ئەمنییەکانی عێراقەوە تاڵانکران و دواتریش سووتێندران”. 

لەوەش زیاتر، کریستیانەکان رۆڵێکی چالاک و گرنگیان لە پرۆسەی بڕیاردان لە هەرێمی کوردستاندا هەیە و، پارتە سیاسییە کریستیانەکان راوێژیان پێدەکرێت، نوێنەرایەتییان لە زۆربەی دامەزراوەکانی حکومەت هەیە و پۆستی گرنگیشیان هەیە. 

ئەنجوومەنی شارەوانییەکانی نەینەواش لە راپۆرتەکەدا جەخت لەوە دەکەنەوە، “تەواوی درووشمەکانی خەباتی کورد جەختی لە سەر یەکدی قەبوڵکردن و پێکەوەژیان و یەکگرتوویی کردووەتەوە”. 

راگەیێندراوی کەنیسەی ئەلقووشیش باس لەوە دەکات، لە دوای ساڵی 2003ـوە کریستیانەکان لە عێراق کراونەتە ئامانج و ئەوەش وایکردووە، 90%ـی کریستیانەکانی بە‌غدا و بەسرە و شارەکانی دیکەی ناوەڕاست و باشووری عێراق شوێنی خۆیان بەجێبهێڵن و دواتریش هێرشەکانی داعش لە موسڵ و دەشتی نەینەوا لە ساڵی 2014 ئەم ئەجێندایەی تەواوکرد. 

کەنیسەی ئەلقووش دەڵێت، هەرێمی کوردستان تەنیا شوێنی ئارامە لە عێراق کە تێیدا کریستیانەکان پێشوازی گەرمیان لێدەکرێت و، تەنیا شوێنی سەلامەتیشە بۆ یەکدی قەبوڵکردن و پێکەوەژیان. 

قەشەکانی زاخۆ و ئامێدیش دەڵێن، هەرێمی کوردستان شوێنی پێکەوەژیان بووە بۆ کریستیانەکان و تەواوی پێکهاتە ئایینیەکانی دیکە. 

بەشێکی دیکەی راپۆرتەکەی نووسینگەی حکومەتی هەرێمی کوردستان بۆ وەڵامدانەوەی راپۆرتە نێودەوڵەتییەکان تایبەت کراوە بە هەوڵەکانی حکومەتی هەرێمی کوردستان بۆ چارەسەرکردنی کێشەی زەوی کریستیانەکان و بۆ ئەو مەبەستەش ئاماژە بە چەندین فەرمانی سەرۆکایەتی هەرێمی کوردستان و سەرۆکایەتی ئەنجوومەنی وەزیرانی هەرێمی کوردستان و پەرلەمانی کوردستان کراوە، باس لەوەشکراوە، دادگاکان هەندێک بڕیاری پێویستیان لەو بارەوە داوە، لەوانەش بڕیاری دادگای تێهەڵچوونەوەی دهۆک لە ئاداری 2017ـی تایبەت بە کێشەی گوندی چوولە و گوندی سافرە.

Share.

About Author

بوچون نوسین داخراوە.

Social Media Auto Publish Powered By : XYZScripts.com