پەرلەمان ئیدانەی تۆپبارانی ناوچە سنووریەکان دەکات

0

نوچەنێت

ئەمڕۆ پێنجشەممە لە کۆبوونەوەی پەرلەمانی کوردستان بە فەرمی ئیدانەی تۆپباران و بۆردومانی ناوچە سنوورییەکانی هەرێمی کوردستانی لەلایەن ئێران و تورکیاوە کرد و داوای لە لایەنەکانی پارچەکانی دیکەی کوردستان کرد خاکی هەرێمی وکردستان بۆ پەلاماری وڵاتان دراوسێ بەکار نەهێنن.

لە دەسپێکی دانیشتنی پەرلەماندا هێمن هەورامی، جێگری سەرۆکی پەرلەمانی کوردستان رایگەیاند “بەداخەوە دوێنێ چوارشەممە 2019.7.10 بەهۆی پەلامارێکەوە لە پیرانشار و دواجار بەهۆی تۆپبارانی ناوچەی سیدەکان، هاووڵاتییەکی هەرێمی کوردستان بەناوی “زەیتوون قادر چیچۆ” شەهید بووە و هەردوو براکەی عەلی و سیروان بریندار بوون، بەناوی پەرلەمانی کوردستانەوە پرسە و سەرەخۆشیی خۆمان ئاراستەی بنەماڵەی ئەو شەهیدە و هیوای چاکبوونەوە بۆ هەردوو براکەی دەخوازین”.

جێگری سەرۆکی پەرلەمانی کوردستان گوتیشی “وەکوو پەرلەمانی کوردستان ئیدانەی هەر کردار و پەلامارێک دەکەین کە هەر هێز و گرووپێک خاکی هەرێمی کوردستان ئیستغلال بکات بۆ پەلاماری وڵاتانی دراوسێ و بەهۆیەوە ئەو وڵاتانەش هێرشی سەربازی و ناوچە سنوورییەکانمان بکەن و لە ئەنجامدا هاووڵاتییانی کوردستان زیانی گیانی و مادییان بەر بکەوێت”.

هێمن هەورامی دەشڵێت “دەبێ ئاستێک بۆ ئەمجۆرە کار و کردەوانە دابنرێت و شەڕ و ململانێیەکان لە هەرێمی کوردستان دوور بخرێنەوە و ئاسایش سەقامگیریی هاووڵاتییاانی کوردستان نەکرێتە قوربانی”.

هەورامی گوتیشی “ئێمە وەکوو پەرلەمانی کوردستان لایەنگر و پشتیوانی چارەسەری ئاشتیانە و دیموکراسییانەی پرسی کوردین لە پارچەکانی دیکەی کوردستان کە بە لێکتێگەیشتن و دیالۆگ و ڕێگەچارەی سیاسی و دیپلۆماسی چارەسەر بکرێن، بەڵام دژی هەر جۆرە توندوتیژی و پەلامارێکی سەربازی و بۆردومانی فڕۆکە و تۆپبارانی ئەو وڵاتانەین و ئەگەر لایەنەکانی ململانێ سوورن لەسەر ئەوەی شەڕی چەکداری و پێیان وایە چارەسەری سەربازی کێشەکان چارەسەر دەکات، داواین لێ دەکەین ئاستێک بۆ ئەمە دابنرێت و کێشە و ململانێیەکان و کار و کردەوەکانیان لە هەرێمی کوردستان دوور بخەنەوە”.

Share.

About Author

بوچون نوسین داخراوە.

Social Media Auto Publish Powered By : XYZScripts.com