نێچیرڤان بارزانی: پارتی بەهێزتر دەبێت

0

نوچە

ئێوارەی ئەمڕۆ (پێنجشەممە ١٥-٨-٢٠١٩) نێچيرڤان بارزانى، جێگرى سه‌رۆكى پارتى ديموكراتى كوردستان پەیامێكی بە بۆنەی يادى ١٦-ی ئاب بڵاوكردەوە و تێیدا رایگەیاند، كە پارتی بە پشتیوانيی تێكۆشەرە دێرین و بە ئەزموونەكانی و جه‌ماوه‌رى دڵسۆزى كوردستان، بەهێزتر دەبێت.

لە پەیامەكەی نێچیرڤان بارزانیدا هاتووە “بە بۆنەی (٧٣)یەمین ساڵیادی دامەزراندنی پارتی دیموكراتی كوردستانه‌وه‌، پیرۆزبایی لە جه‌نابى سەرۆك بارزانى، مەكتەبی سیاسی، سەركردایەتی، هەموو لق و ناوچە و ڕێكخراو و بنكه‌كان، خانه‌واده‌ى شەهیدان و كادیران و جەماوەری پارتی دیموكراتی كوردستان دەكەم. دامەزراندنی پارتی لە ساڵی ١٩٤٦دا وەرچەرخانێكی مێژوویى بوو له كوردستان، لەو كاتەوە ئیرادەی كوردستانييان به هه‌موو پێكهاته‌كانييه‌وه بۆ ئازادی و پێشكەوتن بووە هێز و بزووتنەوەیەكی ڕێكخراو و سەرتاسەری. دامەزراندنی پارتی بووە سەرەتای بووژانەوەیەكی گەورەی نیشتیمانی و نەتەوەیی و ڕۆشنبیری لەنێو كۆمەڵگەی كوردستاندا و گەلی كوردستان بووە خاوەن بزووتنەوەیەكی سیاسی حیساب بۆكراو لە ناوچەكە و ڕۆژهەڵاتی نێوەڕاست و جیهاندا”.

جێگری سەرۆكی پارتی هەروەها دەڵێت “پارتی دیموكراتی كوردستان بە هەڵگیرساندنی شۆڕشی ئەیلوول بە ڕابه‌رايه‌تيى بارزانيی نەمر، بۆ یەكەم جار بووە خاوەن درێژترین و فراوانترین شۆڕش لە مێژووی هاوچەرخی كوردستاندا و توانی بەشێك لە ئامانجەكانی گه‌لى كوردستان لە ڕێككەوتنێكی سیاسيی فەرمیدا لەگەڵ حكوومەتی عێراق جێ بكاتەوە، ئەوەش بووە مایەی بەدەستهێنانی دانپێدانانێكی جیهانی بە ڕەوایەتيی دۆز و بزووتنەوەی ڕزگاریخوازی كوردستان، هەروەها لە شۆڕشی ئەیلوولدا پارتی بووە خاوەنی گەورەترین هێزی شۆڕشگێڕ لە ڕۆژهەڵاتی نێوەڕاستدا. پارتی نسكۆ و سەختی بینیون، بەڵام چونكە خاوەن باوەڕ و بنچینەیەكی ڕیشەداری بەهێزە، هەمیشە توانیویەتی هەموو نسكۆ و سەختییەكان تێپەڕێنێت و مایەی مانەوە و سەركەوتن بێت بۆ كوردستانييان، هەروەها بەشدارێكی بەهێز بووە لە بزووتنەوەی دیموكراسی و مەدەنيی عێراقدا، لەبەرئەوە لە مێژووی عێراقیشدا خاوەن پێگەیەكی بەهێزە”.

لە بەشێكی دیکەی پەیامەكەدا هاتووە “پارتی دیموكراتی كوردستان، كە شانازيی گەورەی هەیە لە دروستبوون و پاراستنی پرۆسەی سیاسی و دیموكراسي هەرێمی كوردستان و چەسپاندنی وەك قەوارەیەك لە دەستووری عێراقدا، لە هەمان كاتدا پارتی و پارتییەكان شانازيی بەڕێوەبردنی سەركەوتووانەی پرۆسەی ئاوەدانكردنەوە و پێشخستنی هەمەلایەنەی هەرێمی كوردستان و پاراستنى يه‌كڕيزى و ته‌بايى و كولتوورى پێكه‌وه‌ژيان و لێبورده‌ييیان هەیە. قارەمانيه‌تيی ئەندامان و جەماوەری پارتی جارێكی دیكە لە بەرگريی قارەمانانەی پێشمەرگە لە شەڕی داعشدا خۆی نواندەوە كه وەك هێزی پارێزەری ئازاديی جیهان، شانازییەكی گەورەی جیهانی تۆمار كرد”.

نێچیرڤان بارزانی لە كۆتایی پەیامەکەیدا دەڵێت “پارتی وەك هێزێكی ڕیشەدار و بزووتنەوەیەكی جەماوەريی بنكەفراوان، خاوەن هێزێكی زۆر بەهێزی ئاوەدانی و نوێبوونەوە و پێشكەوتنە. لاوان و قوتابيان و ئافره‌تانى پارتی حەزێكی گەورەیان هەیە بۆ كار و ئاوەدانكردنەوەی كوردستان، پارتی بە پشتیوانيی تێكۆشەرە دێرین و بەئەزموونەكانی و جه‌ماوه‌رى دڵسۆزى كوردستان بەهێزتر دەبێت، هەر لەبەرئەوەش لە هەڵبژاردنەكانی هەرێمی كوردستان و عێراقدا سه‌رکه‌وتنی گه‌ورهی به‌ده‌ست هێنا، لەمەودواش پارتی بە كارنامە و پلانی بەرفراوانتر دەتوانێت زیاتر خزمەتی دۆز و ئامانجەكانی گەلی كوردستان به ههموو پێكهاته‌كانييه‌وه بكات”.

Share.

About Author

بوچون نوسین داخراوە.

Social Media Auto Publish Powered By : XYZScripts.com