سوپای قودس لە عێراق و ناوچەکە و جیهان چۆن گەشەی کرد؟

0

ئەسعەد مورادی

سوپای پاسدارانی ئێران کە لە سەرەتاکانی بە دەسەڵات گەیشتنی کۆماری ئیسلامی ئێران، دامەزرا، لە چوار لق و چەندین بەش پێکهاتووە لە ”هێزی زەمینی، دەریایی، ئاسمانی و قودس”، سەرەکی ترینیان سوپای قودسە، کە چالاکییەکانیان لەدەرەوەی سنووری ئێرانە و هەموو سیاسەت و کاروچالاکییەکانی ئێرانی خستۆتە ژێر رکێفی خۆیەوە.

هەروەها لە چالاکییە سیاسییەکانیدا بە کورتی: سیخوڕی لە کوەیت، تەقینەوە لە سعودیە، بۆمبدانان لە هیند، بۆمبدانان لە بەحرەین، هاوکاری لەگەڵ محمەد مورسی سەرۆکی لەکارلادراوی میسر، دەستوەردان لە شەڕی سوریا، دەستوەردان لە کاروباری ناوخۆیی لە عێڕاق و بەرهەم هێنانی موشەکی بالیستی.

دروشمی سوپای پاسدارانی ئێران
«هەر هێزێکتان لە توانا دایە، بۆ بەرەنگاری لەگەڵ ئەوان (دوژمنەکان) ئامادەی بکەن» (وَأَعِدُّوا لَهُمْ مَا اسْتَطَعْتُمْ مِنْ قُوَّةٍ) [ق.س. ئەنفاڵ ۶۰]

هێزی قودسی سوپا، كە لەسەرەتای جەنگدا بەمەبەستی رێنوێنی كردنی چالاكییەكانی سوپا لە دەرەوەی سنور لە عێراق‌و لوبنان، لەژێر كۆنترۆڵی یەكەی پەیوەندی نێودەوڵەتی سوپا، دروستكرا، دواتر بوو بە قەرارگای (رەمەزان) لە دەرەوەی سنور، لە كۆتایشدا بوو بە یەكێك لە باڵە سەرەكییەكانی سوپا‌و ئێستا وەكو یەكێك لە گرنگترین یەكەی سەربازی كۆماری ئیسلامی دەناسرێت، كە بە “سوپای قودس” ناوبانگی دەركردووە. 

فەرماندەکانی سوپای قودس

چۆنیەتی گەشەکردنی سوپای قودس لە عێراق و ناوچەکە(١)

رووخاندنی حكومەتی بەعس لە (٢٠٠٣) دەرفەتی رەخساند، كە چەندین هێزی نوێی سیاسی و سەربازی لە عێراق دەركەون، لە دوای شەڕی نەجەف (٢٠٠٤) گروپێكی شیعە مەزهەب لەژێر ناوی (هاوەڵانی ئەشكەوت) دەركەوتن، ئەو گروپە لە رووی ئایینییەوە پەیوەستبوون بە مەرجەعیەتی موقتەدا سەدر، كە رێبەری رەوتی سەدر بوو، بەڵام زۆری نەبرد لەگەڵ موقتەدا ناكۆكیان بۆ دروستبوو-و كەوتنە ململانێوە. ئەوان دواتر لەژێر ناوی (عەسائیبی ئەهلی حەق) درێژەیان بە خەباتی خۆیان دا.

قەیس خەزعەلی لەبەر چی دەستگیر کرا و چۆن ئازادکرا

پێشتریش لە ساڵێ (٢٠٠٣) سوپای مەهدی راگەیەنرابوو، كە پەیوەستبوو بە مەرجەعیەتی رەوتی سەدر و بەشدارێكی كارای شەڕی نەجەف بوو، كە لەلایەن (ئەكرەم كەعبی) سەركردایەتی دەكرا، دوای جەنگ ناوبراو سەرپەرشتی (ناوەندی شەهید سەدر)ی دەكرد، پاش ماوەیەك موقتەدا سەدر داوای لێكرد ناوەندەكە رادەستبكاتەوە، بەڵام كەعبی داواكەی رەتكردەوە، بەمەش ناكۆكیان كەوتە نێوانەوە، دواتر لیژنەی یەكلاكردنەوەی ناكۆكیەكان لە بەرژەوەندی كەعبی دۆسیەكەی یەكلاكردەوە. ئەكرەم كەعبی لەگەڵ قەیس خەزعەلی پێكەوە (عەسائیبی ئەهلی حەق)-یان دامەزراند، وێرای ناكۆكیان لەگەڵ موقتەدا سەدر، بەڵام ئەوان هەر پەیوەستبوون بە مەرجەعیەتی موقتەدا سەدرەوە، لەناو ئەو رێكخراوە نوێیەشدا، قەیس خەزعەلی بووە ئەمینداری گشتیی و ئەكرەم كەعبی بووە جێگریی و بەرپرسی جیهادی رێكخراوەكە.

ململانێی ئەو دوانە لەگەڵ موقتەدا سەدر لە هەڵكشاندا بوو، ئەوان بەو هێزە سەربازیەی پێكیانهێنابوو كەوتنە چالاكیی دژی هێزە ئەمریكی و بەریتانیەكان لە عێراق، بۆیە موقتەدا سەدر، لێیان هاتەدەنگ و رایگەیاند “ئەوانە ئەهلی باتڵن و سنورەكانیان بەزاندووە”، چالاكیی عەسائیب دژی هێزەكانی ئەمریكا لە عێڕاق وای لە حكومەتی عێراق كرد، هەڵوێستی توند بەرامبەر ئەو گروپە بگرێتەبەر، لەو ماوەدا قەیس خەزعەلی و چەند سەركردەی گروپەكە دەستگیركران، ئەمە لە كاتێكدا بوو، كە گروپەكە رایگەیاندبوو، نزیكەی ٦ هەزار چالاكیی جۆراوجۆریان دژی هێزە ئەمریكییەكان ئەنجامداوە؛ بۆ ئازادكردنی سەركردەكانیشیان بزووتنەوەكە شارەزایەكی بەریتانی بە ناوی ”پیتەر مۆر” و چوار هاوەڵی رفاند، كە دواتر لە بەرامبەر ئازادكردنی قەیس غەزعەلی و ژمارەیەك سەركردەی بزووتنەوەكە ئاڵوگۆڕیان پێكرا.

كاتێكیش قەیس خەزعەلی دەستگیر كرابوو، موقتەدا سەدر ویستی دەرفەتەكە بقۆزێتەوە و هەوڵیدا ناوەندە تایبەتەكانی (مجامیع الخاصة) سەر بە خەزعەلی بخاتە ژێر ركێفی خۆی، بەڵام سەركردەكانی ئەو ناوەندانە ئەكرەم كەعبیان وەكو رێبەری خۆیان هەڵبژارد، ئەمەش هێندەی تر ئەستێرەی كەعبی گەشاندەوە.

ئەكرەم كەعبی لەدایكبوی ١٩٧٧ قوتابی محەمەد سادق سەدر بووە، ماوەیەك لە ناوچەی موسەییەب پێشنوێژ و وتارخوێنی نوێژی هەینی بووە، لە ٢٠٠٤ بەدواوە لە ئێران بەشداری خولی سەربازی و كارگێڕی كردووە، دواتر خۆی بۆ خوێندنی ئایینی لە ئێران یەكلاكردوە، لە ٢٠١١ بەدواوە جارێكی تر بەهۆی شەڕی ناوخۆی سوریاوە لە گۆڕەپانی سیاسی و سەربازی دەركەوتەوە، پێشتریش بەهۆی ئەو رۆڵەی هەیبوو لە جەنگی دژی ئەمریكی و بەریتانیەكان لە عێراق، وەزارەتی گەنجیەی ئەمریكا لە ٢٠٠٨ بە كەسێكی مەترسیداری بۆسەر ئاسایشی عێراق و ئەمریكا-ی دانا و هەر مامەڵەیەكی دارایی لەگەڵ قەدەغەكرا، ئەو تێكەڵەیەكە لە كەسایەتی ئایینی و سەربازی، دوای دامەزراندنی عەسائیبی ئەهلی حەق پەیوەستبوونی خۆی بە مەرجەعی باڵای شۆڕشی ئیسلامیی ئێران راگەیاند، ئەمەش وای كرد ئێران پشتیوانی بەهێزی بكات، بە شێوەیەك كە ئەستێرەی دەركەوتنی گەشایەوە، بە شێوەیەكی خێرا لەسەر گۆڕەپانی سوریا و عێراق بووە یاریكەرێك كە حسابی بۆ بكرێـت.

راگەیاندنی بزووتنەوەی نوجەبا

ئەكرەم كەعبی لەگەڵ قەیس خەزعەلی پێكەوە عەسائیبی ئەهلی حەقیان هەبوو. كەعبی، جێگری ئەمینداری گشتی و بەرپرسی جیهاد بوو. كاتێكیش شەڕ لە سوریا هەڵایسا، كەعبی راسپێردرا بە پێكهێنانی یەكەیەكی سەبازی لە سوریا، لە ژێر سایەی عەسائیب، بۆ ئەو مەبەستە لیوای )عەمار كوڕی یاسر( لە دەستپێكی ساڵی ٢٠١٣ دامەزرێنرا، دواتر كەعبی لە عەسائیب جیابویەوە خۆی بووە كەسی یەكەمی لێواكە و راستەوخۆ سەرپەرشتی كار و چالاكییەكانی دەكرد، ئەمەش دەستپێكی راگەیاندنی بزووتنەوەی نوجەبا بوو، ناوی تەواوی پارتەكە (بەرگری ئیسلامیی بزووتنەوەی حزبوڵڵا نوجەبا)یە، بە وتەی دامەزرێنەرانی بزووتنەوەكە ئەو ناوە لە وتەیەكی سەیدە زەینەب وەرگیراوە لە كاتێكدا لە كۆڕی خەلیفە یەزید، ئیمام حوسێن و لایەنگرانی بە (حزبوڵڵای نوجەبا) ناوبردووە.

بزووتنەوەی نوجەبا درێژكراوەی پرۆژەی ئێرانە

لە ماوەیەكی كەمدا بزووتنەوەی نوجەبا، پێگەی خۆی بەهێز كرد، دوای ئەوەی لە (٢٠١٤) حەشدی شەعبی پێكهات، بزووتنەوەكە لەژێر سایەی ئەو پێكهاتەیە لە عێراق برەوی بە كاری خۆیدا، ئەوەش كە وای كرد بزووتنەوەكە بەراورد بە پێكهاتەكانی تری ناو حەشد، بەهێزتر بێت ئەوەبوو كە:

ئەکرەم کەعبی، ئەمینداری گشتی بزووتنەوەی نوجەبا

1-ئەكرەم كەعبی دامەزرێنەری حیزبەكە راستەوخۆ سەرپەرشتی چالاكییە چەكدارییەكانی گروپەكەی دەكرد و دەچووە بەرەكانی شەڕ، ئەمەش جۆرێك لە متمانەی زیاتری بۆ دروستكردن.
2-بزووتنەوەكە پەیوەستبونی خۆی بە ئێران و رێنماییەكانی شۆڕشی ئیسلامیی نەشاردۆتەوە و لە خستنەڕووی ئەو پەیوەندییە شەرمی نەكردووە، دیدار و سەردانەكانیان بۆ لای بەرپرسانی ئێران لە دەزگاكانی راگەیاندن باسكردووە.

هەرچەندە بزووتنەوەكە وا خۆی دەناسێنێت، كە ئامانجی بەرگریكردنە لە نیشتمان و پیرۆزییە ئایینیەكان لە عێراق و سوریا، بەڵام ئەوانەی دەربارەی ئەم بزووتنەوەیە نووسیویانە بە درێژكراوەی پرۆژەی ئێرانی دەزانن، خودی بزووتنەوەكەش كاریگەربوونی خۆی بە رێبەرانی شۆڕشی ئیسلامیی ئێران نەشاردوەتەوە، تەنانەت لە بەشی سەرەوەی سایتی فەڕمی بزووتنەوەكە وێنەی (عەلی خامنەیی) رابەری شۆڕشی ئیسلامیی ئێران دانراوە، هەروەك ئەكرەم كەعبی لە دیدارێكدا دەڵێت “ئێمە لەسەر هێڵی ویلایەتی فەقیهـ بە رابەرایەتی ئایەتوڵا عەلی خامنەیی دەڕۆین، لە هەرشوێنێكیش میحوەری بەرگری پێویستی بە ئێمە بێت ئامادەباشین”. بەمەش دەتوانین بڵێین ئایدۆلۆژیای حیزبەكە بڕوابوونە بە ویلایەتی فەیقهـ و پەیوەستبوون بە رابەری شۆڕشی ئیسلامیی ئێرانەوە.

پەیوەندی لەگەڵ ئێران

پێشتر ئاماژە بەوە درا كە بزووتنەوەی نوجەبا بونیادی ئایدۆلۆژی لەسەر تێزی (ویلایەتی فەقیهـ و پەیوەستبوون بە رابەری شۆڕشی ئیسلامیی ئێران)ەوە داڕشتووە، ئەم پەیوەستبوونە بە جۆرێكی وا ئاشكرایە كە سەركردەكانی نوجەبا شانازی پێوە دەكەن، تەنانەت لە بەشی سەرەوەی سایتی فەڕمی بزووتنەوەكە وێنەی رابەری شۆرشی ئیسلامیی ئێران و محەمەد سادق سەدر دانراوە، ئەكرەم كەعبی لەبارەی پەیوەندیان بە تێزی ویلایەتی فەقیهەوە لە لێدوانێكدا رایگەیاندوە “بزووتنەوەكەمان لەخەبات بەردەوام دەبێت بەپێی ئەو نەهجەی رابەری شۆڕشی ئیسلامی دایناوە، دوای داعش تێدەكۆشین تا سەردەكەوین بەسەر ئیسرائیلدا”.

سەبارەت بە هاوكاری ئێران بۆ بزووتنەوەكە كەعبی دەڵێت “نایشارینەوە كە كۆماری ئیسلامیی ئێران لەسەر هەموو ئاستەكان هاوكاریمان دەكات، لە رووی هونەری و لۆجستیەوە، پێدانی چەك و مەشقی سەربازی و راوێژ لە رێگەی برایانی ناو سوپای قودسەوە، ئێمەش سوپاسی خۆمان سەبارەت بەو هاوكارییانە گەیاندوەتە كۆماری ئیسلامیی ئێران، كە لە پێناو رزگاركردنی عێراق و شەری تیرۆر پێشكەشمانی دەكات”.

کەعبی لە ٢٠٠٨ بەشداری كردووە لە هاوەنبارانكردنی ناوچەی سەوز لە بەغداد

لە (٧ ئەیلولی ٢٠١٦) بزووتنەوەكە بڵاویكردەوە، كە قاسم سلێمانی فەرماندەی سوپای قودس سەر بە سوپای پاسداران لە ریفی حەلەب سەردانی هێزەكانی نوجەبای كردوە و لەگەڵ سەركردەكانی ئەو بزووتنەوەیە كۆبوەتەوە و رێنمایی پێویستی پێداون، پێشتریش لە (٢٠١٤) بزووتنەوەی نوجەبا سرودێكی بڵاوكردەوە كە پیاهەڵدانە بە قاسم سلێمانی فەرماندەی سوپای قودس، لە سرودەكەدا ستایشی رۆڵی ناوبراو كراوە لە دژایەتی ئەمریكا و شەڕكردن لەگەڵ داعش، ئەمەش وەكو سەلماندنێكی ئەوەی، كە تا چەند پەیوەستن بەو كەسایەتییە و ئێرانەوە.

پەیوەندی بەهێزی نوجەبا بە ئێرانەوە وای كردووە، كە ئەو بزووتنەوەیە ببێتە هاوپەیمانی دۆستەكانی ئێران، لەو نێوەندەشدا حیزبوڵای لوبنان كە دۆستێكی ستراتیژی ئێرانە پەیوەندییەكی توندوتۆڵی لەگەڵ بزووتنەوەی نوجەبا هەیە.

كۆنگرێسی ئەمریكا: بزووتنەوەی نوجەبا، گروپێكی تیرۆریستییە

لۆگۆی بزووتنەوەی نوجەبا

سەبارەت بە ریشەی پەیوەندی ئەو دوانە بەیەكەوە، ئەكرەم كەعبی دەڵێت “لە ٢٠٠٤ لەگەڵ حەسەن نەسروڵڵا كۆبوومەوە و عیماد موغنیە ئامادەی كۆبوونەوەكە بوو، كە شەرەفمەندبووم بەوەی موغنیە سەرپەرشتی یەكەم خولی منی كرد”. هەروەك گوتوشیەتی “چەند راوێژكارێكی حزبوڵڵا لە سەردەمی داگیركاری هێزەكانی ئەمریكا هاتوونەتە عێراق و ئەزمونی خۆیان لە جەنگی دژی ئیسرائیل گواستۆتەوە بۆ عێراق”.

كەعبی سەرسوڕمانبوونی خۆشی بە كەسایەتی نەسروڵڵا نەشاردوەتەوە و رایگەیاندووە “حەسەن نەسروڵڵا نموونەی باڵای دژایەتی داگیركەرە”. لە وتارێكیشدا كەعبی پشتیوانی خۆی بۆ حزبوڵڵای لوبنانی دەردەبڕێت و دەڵێت “جەنگ، چارەنوس و و داهاتومان پەیوەستە بە یەكەوە لە جەنگانمان دژی سیانەی شوم و شوێنكەوتوانیان لە داعش و بەرەی نوسرە و زایۆنیزم. بۆیە پشتیوانی خۆمان بۆ هاوار و نركەی ئێوە دژی زایۆنیزم رادەگەیەنین”.

پەیوەندی توندوتۆڵی بزووتنەوەی نوجەبا بە ئێران و حزبوڵڵا و چالاكییەكانی بزووتنەوەكە، وای لە ئەمریكا كرد، كە بە چاوی گومانەوە لەو بزووتنەوە بڕوانێت، تا دواجار لە چوراچێوەی پرۆژەیاسایەكدا وەكو هێزێكی تیرۆریست ناسێنرا، لە (تشرینی دووەمی ٢٠١٧) كۆنگرێسی ئەمریكا رایگەیاند، كە (بزووتنەوەی نوجەبا) گروپێكی تیرۆریستیە و دەبێت سەرۆكی ئەمریكا گەمارۆی بخاتەسەر، بەپێی راپۆرتی كۆنگرێس، بزووتنەوەی نوجەبا هاوكاری و كۆمەك لە ئێران بە دیاریكراویش لە سوپای قودس وەردەگرێت و لە لایەن حیزبوڵای لوبنانیەوە راهێنان بە چەكدارەكانی دەكرێت، هەروەك ئەكرەم كەعبی رێبەری گرووپەكە مەترسییە بۆسەر ئاسایشی عێراق و پێشتر لە ٢٠٠٨ بەشداری كردووە لە هاوەنبارانكردنی ناوچەی سەوز لە بەغداد و رێنمایی و فەرمان لە رابەری شۆڕشی ئیسلامیی ئێران وەردەگرێت و رۆڵێكی بەرچاو دەگێڕێت لە گواستنەوەی چەك لە ئێرانەوە بۆ حیزبوڵا بەناو خاكی عێراق و سوریادا. لە كاردانەوەی ئەو هەڵوێستەشدا، ئەكرەم كەعبی وێرای دەربڕینی نیگەرانی خۆی رایگەیاند، كە ئەو بڕیارەی ئەمریكا نەك نایانوەستێنێت بەڵكو وایان لێدەكات سورتر بن لەسەر خەبات بۆ گەیشتنە ئامانج.

چالاكیی بزووتنەوەكە

باڵی سەربازی نوجەبا لە سێ لیوای سەربازی پێكدێت، ئەوانیش لیواكانی: عەمار كوری یاسر، ئیمام حەسەن موجتەبا و لیوای حەمد.
لیوای عەمار كوڕی یاسر، كە بەهێزترین لیوای بزووتنەوەكەیە لە ٢٠١٣ ناوچەكانی ریفی دیمەشق دەستی بە چالاكیی كرد بۆ پارێزگاری لە گۆڕی سەیدە زەینەب، دواتر چالاكی لیواكە گواسترایەوە بۆ حەلەب و ناوچەكانی دەورووبەری، لە ئەكادیمیای سەربازی بارەگایەكیان دانا و راهێنان بە چەكدارەكانیان دەكرا، دواتریش حكومەتی سوریا بەرپرسیاری پاراستنی فڕۆكەخانەی حەلەبی سپارد بە لیواكە.

لە شەڕی قوسەیر لە (١٩-٥-٢٠١٣) چەكدارانی بزووتنەوەكە لە پاڵ چەكدارانی حزبوڵڵای لوبنانی بەشداریان كرد، بەمەش پێگەی بزووتنەوەكە بە تەواوی بەهێزبوو. بە هەمان شێوە لیوای ئیمام حەسەن موجتەبا لە (تەموزی ٢٠١٣) پێكهێنرا، لەژێر سەرپەرشتی سامر ساعدی، لیواكە لە ناوچەكانی دیمەشق و شەبعا دەجەنگا دژی نەیارانی حكومەتی سوریا و ئەركی پاراستنی رێگای فڕۆكەخانەی دیمەشقی لە ئەستۆدابوو. بەڵام لیوای حەمد بەوە دەناسرێتەوە، كە توانایەكی زۆری هەیە لە ئاراستەكردنی موشەك و بەكارهێنانی تۆپ و چەكی قورس، حەیدەر عەزاوی بەرپرسی بوو، هەرچەند دواتر ناوبراو وازی لە بزووتنەوەكە هێنا و گروپێكی چەكداری نوێی دروستكرد بەناوی (بزووتنەوەی ئەنساروڵای وەفادار لە عێراق). لەناو ریزەكانی ئەم بزووتنەوەدا خەڵكانی غەیرە عێراقیش هەن، هەروەك یەكێك لە بەرپرسانی بزووتنەوەكە رۆژی (20/6/2013) ئاشكرای كرد (9 سعودی، 8 بەحرەینی و 6 كوەیتی) كە لە ریزەكانی بزووتنەوەكەدا بوون كوژراون لە كاتی پارێزگاری لە گۆڕی سەیدە زەینەب. لە (ئازاری ٢٠١٧)-ش كەتیبەیەكی نوێ بەناوی جۆلان دروستكرا بە ئامانجی ناچاركردنی ئیسرائیل بە پاشەكشە لە بەرزاییەكانی جۆلان، لای خۆیەوە ئیسرائیل ئەمەی بەمەترسییەكی گەورە ناوزەد كردووە.

حەشدی شەعبی

حەشدی شەعبی لە ٢٠١٤ بە فەتوای ”عەلی سیستانی” گەورە مەرجەعی شیعە دامەزرا، هەرچەند بزووتنەوەی نوجەبا بە فەرمی وەك پێكهێنەرێكی سەرەكی حەشدی شەعبی مامەڵەی لەگەڵ دەكرێت، لە شەڕی دژ بە داعش بەشداری كرد، بەڵام نوجەبا زۆرترینی چالاكییەكانی لە سوریایە، لە دوای جەنگی قوسەیر لە ٢٠١٣ رۆڵێكی بەرچاوی گێڕاوە لە یەكلاكردنەوەی هاوكێشەكانی سوریا، لەوانەش: بەشداری لە شكاندنی گەمارۆی سەر گوندە شیعەكانی نەبل و زەهرا، هەروەها كردنەوەی رێگای حەما حەلەب. بەڵام سەركردەكانی نوجەبا لە چەند بۆنەی جیاواز رایانگەیاندووە، كە ئەوان سەر بە حەشدی شەعبی نین، بەڵكو لەوە گەورەترن و نوجەبا سەرپەرشتی دوو لیوا دەكات، كە ئەندامەكانی هەڵبژێردراون و لە لایەن بزووتنەوەكەوە راهێنانیان پێكراوە، بە شێوەیەكی مەیدانیش سەرپەرشتی دەكرێن و كاروبارەكانیان دەبرێت بەڕێوە.

ژمارەی چەكدارانی بزووتنەوەكە لە ٢٠١٧ بە (١٠) هەزار چەكدار خەمڵێنراوە

دوای داگیركردنی موسڵ لە لایەن داعشەوە، یزووتنەوەی نوجەبا لە بەیانامەیەكدا لە (١١-٦-٢٠١٤) رایگەیاند، كە لە عێراق دژی تیرۆر دەجەنگێت، لەو پێناوەشدا دوای یەكخستنی ریزەكان و بەكردەیكردنی بەڵێنی پارێزگاری لە شوێنە پیرۆزەكان كرد. دوای ئەو بەیاننامەیە بزووتنەوەی نوجەبا بە كردەوە دەستیكرد بە ئامادەكردنی ئەندامەكانی بۆ شەڕكردن دژی داعش لە عێراق، هەروەك ئاشكرای كرد، كە چەند سەربازگەیەكی راهێنانیان لە عێراق كردوەتەوە یەكێكیان بە ناوی سەربازگەی ئەمیرولموئمینین لە شاری بەسرە.

ژمارەی چەكدارانی بزووتنەوەكە لە ٢٠١٧ بە (١٠) هەزار چەكدار خەمڵێنراوە، هەندێك پێیانوایە نوجەبا كاردەكات بۆ دەستەبەركردنی رێگەی گەیشتنی كۆمەكی ئێران بۆ حیزبوڵا لە رێگەی وشكانییەوە كە بە عێراق و سوریادا تێدەپەڕێت.

موشەکی فاتیح
Image result for ‫موشک فجر‬‎
موشەکی فەجر

. بەپێی ئەو زانیارییەکان، چەكدارانی نوجەبا چەكی قورس و سوكیان هەیە، بە تایبەت كلاشینكۆف، هاوەن، موشەكی كاتیوشا، تانكی تی٦٤ و تی٥٥ روسی، هەمەری سەربازی، تۆپی دورهاوێژ، موشەكی ئەشتر، هەروەها موشەكی فەجر و فاتیح و فڕۆكەی بێ فڕۆكەوان. بە مەبەستی راهێنان، چەكدارانی حیزبەكە هەندێكیان رەوانەی باشوری عیراق دەكرێن و لەوێ خولێكی سێ مانگە دەبینن، پاشان لە رێگەی فڕۆكەوە لە فڕۆكەخانەی نەجەف و بەغداد راستەوخۆ دەچنە دیمەشق و لەوێوە بۆ بەرەكانی شەڕ، هەندیكیشیان روودەكەنە لوبنان و لەوێ راهێنانیان پێدەكرێت، پاشان لە رێگەی وشكانییەوە دەچنە سوریا، هەندێكیشیان لە ئێران بەشداری خولی هەڵگرتنەوەی مین و بەكارهێنانی فڕۆكەی بێ فڕۆكەوان دەكەن. بە وتەی گوتەبێژی بزووتنەوەكە (٥٠٠) كەسیان لە سوریا كوژراون.

ئەندامانی سوپای قودس چۆن گەیشتوونەتە لە ئەروپا (٢)

زۆر جار لە سەرچاوەباوەر پێکراوەکاندا بینیومانە کە هێزی سوپای قودس ٢٠٠٠ تا ٤٠٠٠ کەسن و توانیویانە سالانێکی زۆر  لەرێگای ئەمانەوە ترس و وەحشەتێکی زۆر درووست بکەن .ئەندامانی سوپای قودس لە ئەرووپا و لە رێگای سەفارەتی یۆنانەوە ویزایان وەر گرتووە و لە کۆتایی سەفەری ئەمانەدا تەنیا پاسپۆرتەکەیان کۆکراوەتەوە و رەوانەی سەفارەتی ئێران لە یۆنان کراونەوە

تا لە رێگای یۆنانەوە دوبارە ئیزنی سەفەر کردنیان پێبدرێتەوە و ئێستا پێتان خۆشە باور بکەن و پێتان ناخۆشە باوەر مەکەن، ئەمانە ئەو شتانەن کە خۆم وەک ئەمیر بە چاوی خۆم بینیومن و ئەوەی خوارەوە کە دەیبینن لە سایتی ” سپا انلاین ” دارێژراوە.

ئەمیر عەباسی درێژەی بە بابەتەکەی ئەدا و دەڵێ، پێویستە ئەوە بزانین، کە ئاندامانی سپای قودس ١٢٠٠٠ کەسن بەلام لەو وڵاتانەی کە چالاکی دەکەن، کەڵک لە تیم ترۆریستی و خراپکاریەکانی تریش وەردەگرن، بۆ نموونە پێویستە بڵێم  کە لە ناوچەی سیستان و بلوچستانی ئێران لە لایەن سوپای قودسەوە راهێنان بە مەبەستی کاری تیرۆسریستی و خراپکاری بە کۆمەڵێک لە چەکدارانی ئەلقاعیدە لە پایەگایەکی لە پێشدادرووستکراو لە زابول، کە ٧٠ کیلۆمتر لە سنووری ئێران- پاکستانەوە دوورە، دەکرا و ئەمەش تەنیا جارێک نەبوو، کە لە ئێران روویداوە.

هێزەکانی سوپای قودس بە سەر سێ بەش دابەش دەبن و ئەرکی هەرکام لەم بەشانە جیاوازە و پەیوەندیان بە یەکەوە نییە.

بەشی یەکەم: پلان دارێژەرانی چالاکیەکانن، کە لە دەستەیەکی سەرەکی  دوازدە کەسی پێک هاتوون، تەواوی بریارات لە لایەن ئەو ئەنجومونی سەرەکیەوە دەرئەچێ و بەگشتی لە لایەن ئەو هێزانەوە جێبەجێ دەبن .

کەسی یەکەمی ئەو شوورایە، کە تا ئێستا لە تاریکیدا ماوە و هیچ حیزب و رێکخراوەیێک ناوی لێنابات، بێجگە لە سەید مستەفا خامنەیی کوری ”آیت اللە خامنەی” کەسێکیتر نییە.

هێزەکانی سوپای قودس لە چالاکییە سیاسی، ئابووری، ئەمنیەتی و پشتیوانیەکانی کۆماری ئیسلامی  لە دەرەوەی سنوورەکان بەشدارن و کار دەکەن.

١- دەستەی ئابووری سوپای قودس لە لایەن زۆرکەسەوە پشتیوانی لیدەکرێ، کە لەسەرووی ئەواندا موحسین رەزایی، گەورەترین کارتلی دراوی لە وڵاتانی دەرەوەی لە دەستدایە و لە تەنیشت ئەویش حەبیب عەسکەری ئەولادی موسلمان، یەکێکیتر لە گەورە سەرمایەدارانی ئێرانی و هەروەها عەبدولکەریم موجەرد جێگیرن کە کەسی سێیەم یارمەتی دوو هێز لە باری ماڵیەوە دەکات، هێزی سوپای قودس و هیزی ١١٠ی سوپا کە لە ژێر ناوی دەزگای چەند بەرهمهێنەری لە ئەرووپا و ئیمارات خاوەنی سەروەت و سامانێکی زۆرە.

بەشی سیاسی ئەو بە کەڵکوەرگرتن لە کەسایەتیە گرینگ و بەتواناکانی وڵاتانی خاوەن هیز لە گۆڕەپانی سیاسی و دووهەم وڵاتانی  موجەهەز بە پەروەردەی ئینسانی بۆ چالاکی لە دنیای ئیسلامیدا بە دژی وڵاتانی بەهیزی دنیا لە قازانجی کۆماری ئیسلامی کار دەکات، وەک لە وڵاتانی زیمبابووە، فلستین، سوریە ، میسر، عێراق، مکزیک و زۆر وڵاتی تر.

بۆ نموونەی یەکەم دەتوانین ئیشارە بە دەزگای پەروەردەی ئیسلامی ئێران بکەین لە ئەمریکا، ئینگلیس، ئەوروپا و لە شێوازی راستەوخۆ و ناراستەوخۆ پێکهێنانی لۆبیەکانی کۆماری ئیسلامی بۆ کرینی سیناتۆرە ئەمریکیەکان و پاشگەزکردنەوەیان لە کردەوەگەلێک بە دژی کۆماری ئیسلامی.

بەشی نیزامی: ئەم بەشە لە گرینگترین کارتێکەرانی ئەو هێزانە لە ئێرانن، هێزە ترۆریست و فداییەکانە، کە گاردی ئاسنینیشیان پێدەڵێن و بە کردەوە لە هیچ جۆرە هەوڵێك لە پێناو مانەوەی کۆماری ئیسلامی خۆنابوێرن.

هێزەکانی حزبوڵڵا

حەسن چیزەری فەرماندەییان دەکات و بە چەند دەستە دابەش دەبن ”شەرکەر، بەرگری ، پشتیوانی، نفووزی و خەتی فیکری”.

لە بارەی ئەم هێزەوە پیویستە خوێندنەوەی نوێتر هەبێ، ئەم هێزانە بە پێی سەلیقەی تایبەت ریزبەندی کراون و بە پێی توانا جەستەیی، رۆحی، باوەڕ، هوشیاری و توانای بەرگری بەهێز، لە پۆستی باشتر و گرینگتر جێگیر کراون.

بەشی سەربازی سوپای قودس، لە ڕاکێشانی ئەندامانی لە وڵاتێک، کە تووشی کێشە و ئاژاوە دەبێ، کار دەکا و ئەوەش تەنیا لە حالێکدایە، کە خۆی هەڵدەستێ بە ئەنجامدانی چالاکیەک.

رێژەی هێزەکانی سوپای قودس لە دنیادا ٢٠٠ هەزار کەسە، کە تەنیا هێزێکی دەڕەکییە، کە سوپای قودس پشتیوانیان لێدەکا و ساڵانێکی زۆرە لە وڵاتانێک، کە ئێران رۆڵی سیاسی و ئەمنەیەتیان تیا دەگێرێ، راهێنانیان پێدەکراوە و چەکدار کراون، ئەگەرچی لە کاتی خەسار لێدانی وڵاتی دیارکراو، چەکدار کردنی ئەم هێزانە هێندە دژوار نییە.

خۆ ئەگەر سەرنجتان دابێتێ ، تەواوی هیزەکانی چەکداری کۆماری ئیسلامی ٤٠٠ هەزار کەسە، بەڵام دەبینین، کە رێژەیەکی بەرانبەر بە نیوەی ئەمانە لە دەرەوەی وڵات لە ژێر چاودێری سوپای قودس چالاکن، کە ئێرانی نین.

٢- بۆ نموونە دوای رێکەوتنی حەماس و دەوڵەتی خودموختاری فەلەستین، لە سەر ئەساسی ئەوەی، کە لە گۆرەپانی سیاسەتدا یەک بن، بەڵام دوایی کێشەی نێوانیان لەسەر جیاوازی سیاسی بە جۆرێک پەرەی سەند، کە ئەو رێککەوتنە نوێیە شکستی هێنا و ئەمەش هەموو لە لایەن سەرتیپێکی سوپای قودسەوە لە پەرلەمانی فلستینی خودموختارکە، توانیبووی چەند کەسێک بکرێ، روویدا؛ کەسێک، کە لە دەزگای هەواڵگری مەجلسی ئەو وڵاتە پۆستێکی باڵای هەبوو و ئێستاش هەر هاوکاری دەکا، ناوهێنانی بە پێویست نازانم تەنیا ئاماژە بە شوێنی کارەکەی دەکەم کە لەبەشی هەواڵگری مەجلسی دەوڵەتی خودموختار کار دەکا.

سوپای ٤٠٠ تەنیا هێزێکی چەکداری سوپای قودسە، کە راستەوخۆ چالاکی نیزامی سوپای قودسی لە دەستدایە، ئەم هێزەیە، کە لە لێهاتووترین هیزەکانی سوپای پاسداران و ئەرتەشی بۆ گوڵبژێر کراوە و بەرپرسی چالاکی شوێنکەوتن و لەناوبردنی جەستەیی ”آیت اللە حکیم” و ”عماد فیض مغنیە ” بووە، کە لەبەر هۆکارگەلێک هەرگیز هیچ وڵاتێک ئەوانی بە بەپرس نەزانی.

حاجی عماد مغنیە، کاتێک باوەڕە فکرییەکانی خۆی لەگەڵ باوەڕەکانی عەلی خامنەیی، دژ بە یەک زانی و بە دوای کەمێک جیاوازی بیر و ڕا لەگەڵ ئەو، لە بارەی کوژرانی چەند کەسایەتی ئایینی لە عێراق، لەناو چوو.

حاجی رضوان یان هەر ئەو عیماد مغنییە، لە باشترین سیما دیارەکانی ناو سوپای قودسی جێ پەسندی عەلی خامنەیی بوو، کە لە دەرەوەی وڵات بەرپرسی زۆر لە چالاکیەکانی وەئەستۆ بوو.

هێزەکانی ناو رێکخراو پێکهاتوو لە چەندین لقی جیاواز

دژە سیخوری، پارێزگاری لە چالاکی، ئەمنیەتی پلان، خۆرهەڵاتی ناوەڕاست، ئیسرائیل و فەلەستین، ئاسیا و ئەقیانووسیە، ئەمریکا و هەروەها ئابووری میللی و مەزهەبی، هەرێمی و زۆر لە ئیدارات و کارناسانی چالاکی جۆراوجۆر.

٣- هزر و ئامانجی پێکهێنانی سوپای قودس لە رابردووێکی نە زۆر نزیک، چالاکی و ناسین لە خاکی دوژمندا بووە و جۆری کار و چالاکی ئەوان، پەیوەندی بە بارودۆخی ناوچە و جیهان لە کاتی گونجاودا بووە.

سوپای قودس بە پشتوانی هاوکارانی جیهانی خۆی، لە باری چالاکی و هەواڵگری زۆر ژیرانە کاری کردووە و زیاتر بە کەڵک ورگرتن لە هێزە خۆجەییەکان، شوێن پێی خۆیی لە چالاکی و رووداوەکاندا سڕیوەتەوە.

ئەگەر بمانهەوێ ئەم هێزە بناسین،
پێویستە سەرەتا
جۆری چالاکی و فەلسەفەی ئەوان بناسین

هێزەکانی بزووتنەوەی بەرگری نیشتمانی لە ناوخۆی وڵات، کە چالاکیەکانی خۆیان ساڵانێکە دەستپێکردووە و بە شێوەی کۆنکرێت و چڕ کار دەکەن، بە ئاشکرا و هاوتەریب لەگەڵ هێزەکانی دەرەوەی سنوورەکان، خۆ رێک و ئاڵوگۆڕ دەکەن، لەوانەیە ئەم هێزانە لە ریزبەندی ئەو فیداییانە بەحیساب بێن، کە باوەڕێکی توندی مەزهەبیان هەیە و کەڵکیان لێ وەردەگیردرێ، تا لەو رێگەوە بکرێ لە هیزر و فەلسەفەی کۆماری ئیسلامی و بەرەو پێشبردنی باوەڕە ئایینیەکان ئەوان لە ئاستی باڵادا کەڵک وەرگیردرێ.

ئەم هیزانە، کە لە ناوخۆیی ئێران سێ هەزار کەس زیاتر نابن، کاتێک دەست بە چالاکی دەکەن، کە بە کردەوە کۆماری ئیسلامی لە کاتی شەڕدا بێ و یاخود کۆماری ئیسلامی لە حاڵەتی لەناوچووندا بێ و ئەمەش بە مانای داگیرکاری ئێران لە لایەن داگیرکەرانی هێرشبەرەوەیە. ئەم هێزانە لە رێگایی جۆراوجۆری لەپێشدا دیاریکراو دەست دەکەن بە چالاکی، کە زۆربەیان دروستکردنی کەشی ناهەموار و نانەوەی ئاژاوە دەبێ لە ئێراندا و ئەمەش کاتێکە، کە سوپای قودس و تەواوی هیزە هێرشبەرەکانی دەرەوەی سنوورەکانی ئێران، کە تا ئەوکاتە لە لایەن کۆماری ئیسلامییەوە لە باری ئیمکانات و پێداویستیەوە پشتیوانی و تەیار کراون لە چەند مانگ لەوە پێشەوە چالاکیە ترۆریستیەکانیان لە شێوەی چالاکی بچووک لە وڵاتانێک، کە ئیمکانی هەبێ دەست پێکردووە.

بەو جۆرە ئەم دوو هێزە دەڕەکی و ناوخۆییە، لە سەر بنەمای ئایدیۆلۆژی کۆماری ئیسلامی لە پێناو سەرهەڵدانی فریشتەی نجات لە جیهان یامەتیدەر و پشتیوانی ئەو رژێمە و بەهێزی دەکەن.

هێزەکانی سوپای قودس، کە بەر لە دەستپێک، شوێنەکانی جێی مەبەست بۆ هێرش دەست نیشان دەکەن و ساڵانێکە بۆ جێگیر بوون لەم شوێنانە پلانیان داڕشتووە، ئێستا بە لەبەردەستدا بوونی ئیماکاناتی ماڵی و نیزامی لە بنکە بچووکەکاندا، کە خۆیان پێکیانهێناوە دەست دەکەن بە چالاکی.

لە لایەکیترەوە پێویستە لەبیرمان بێ، کە هێزە توندئاژۆکانی شیعە، کە ساڵانێکی زۆر پشت و پەنای کۆماری ئیسلامین، هەرواش لەگەڵی دەمێننەوە هەڵبەت لە پێشدا وانیشان ئەدەن، کە ئەم هێزانە لەگەڵ کۆماری ئیسلامی هیچ جۆرە پەیوەندیەکیان نەبێ، بەڵام ئەمانە داییم بۆ خراپەکاری لە دینادا ئامادەن.

جیش المهدی

تاقمەکانی وەک ”جیش المهدی”، کە ساڵانێکە لە ئێراندا لە تەواوی ئیمکاناتی پەروەردەی نیزامی کەڵکیان وەرگرتووە، لە هێزە توندرەوەکانی عێراق، ئەفریقا و وڵاتانی رۆژئاوایی پێکهاتوون، کە خۆیان گەیاندۆتە ئەم سیستمە مەهدی پەرستییە و ئێستا ئامادەی جێبەجێکردنی بریاراتن و لە کاتێکدا کەسێکی وەک موقتدا سەدر زۆر جار ڕایگەیاندووە، کە بیر و باوەڕەکانی لەگەڵ رێبەری ئایینی کۆماری ئیسلامی جیاوازە، بەڵام لە زۆربەی سەفەرەکانی عەلی خامنەیی بۆ شارە ئایینیەکان، هەر لەو جۆرەکەسانە پێشوازیان لێکردووە.  

٤- هێزەکانی تری وەک حەماس، کە نزیکترین بنکەی دەسەڵات و هێزی کۆماری ئیسلامی بە ئیسرائیلن، نەک تەنیا لەبەرانبەر ئیسراییلدا رادەوستن تەنانەت لە بەرانبەر هاوپەیمانانی یەکەمی کۆماری ئیسلامی یاسر عەرەفات، کە مەحموود عەباس، جێگری ئەوە، جیهاد دەکەن و ئەوەش تەنیا بە هۆکاری ساپۆرتە یەک لەدوای یەکەکانی ئێران و باسەکانی پشتی پەردەی باوەری مەترسیداریان.

هێزەکانی سوپای قودس بەرلە چوونەدەرەوەی وڵات ، تاقیکاریە دژوارەکانی سوپای قودس، کە لە ناویاندا ئەشکەنجە و تاقیکاری باوەڕی و سیاسی هەیە تێدەپەرێنن، کە بەڵێنیەکانیان بکەوێتە بەر تاقیکاریەوە و تەنیا بەوەندە تەواو نابێ و تا گەڕانەوەیان، لە ناوخۆیی ئێرانیش تەواوی گرێدراوانیان بە جۆرێک لە ژێر گوشاری سوپای قودسدا دەمێنێتەوە.

بە ئەنجام گەیاندنی کردەوە تیرۆریستییەکان و جوولە پێکردنی کەسانێک لە وڵاتانی جۆراوجۆر، کە سەردانی بنەکە ئیسلامیەکان دەکەن، لە دەستووری کاری ئەماندایە و هەروا دەبێت.

دوا پلانی سوپای قودس لە عێراق، دوای ساڵانێک هەوڵدان بە ئەنجام گەیەندرا (٣)

رۆژی ٥-١-٢٠١٩، ئەنجومەنی نوێنەرانی عێراق، بە زۆرینەی دەنگی ١٧٣ ئامادەبوو، پرۆژە بڕیاری دەركردنی هێزە بیانییەكانی لە عێراق پەسەندكرد.
دانیشتنەكەی ئەنجومەنی نوێنەرانی عێراق، كە عادل عەبدولمەهدی (سەرۆكی حكومەتی كاربەڕێكەر) ئامادەی بوو، لەناو توڕەیی و رقی ئەندامانە توڕەكانی شیعە بەڕیوەچوو، كە لەبری گفتوگۆكردنی ووردی پرۆژە بڕیارەكە، زیاتر دروشمی دژ بە ئەمریكایان دەوتەوە.

بەپێی بۆچونی بەشیر حەداد جێگری سەرۆكی پەرلەمانی عێراق، ئەو بڕیارەی ئەمڕۆ مولزەم نییە و حكومەت دەتوانێت جێبەجێی نەكات، بڕیارەكەی هێزی یاسای نییە، كە یاسای دەبێت حكومەت پێوەی پابەند بێت، بەڵام بڕیار حكومەت دەتوانێت پێوەی پابەند نەبێت.

بەڵام بۆچونێكی تر ئەوەیە عادل عەبدولمەهدی سەرۆك وەزیرانی عێراق بۆخۆی لەپەرلەمان بووەو خۆی داوای كردووە ئەو بڕیارە بدەن و ئەو جێبەجێی دەكات، ئەمە سەرەڕای ئەوەی عادل عەبدولمەهدی، سەرۆكوەزیرانی عێراق، زۆر توندە بەرامبەر بە ئەمریكا و پێی وایە، ئەمریكا لەپشت خۆپیشاندان و ناڕەزاییەتییەكانی عێراقەوەیە، كە ناچار بە دەستلەكاركێشانەوە كرا، بۆیە پێدەچێت عەبدولمەهدی سور بێت لەسەر جێبەجێكردنی بڕیارەكەی پەرلەمان.

دەقی بڕیارەكەی  پەرلەمانی عێراق:
ئەنجومەنی نوێنەرانی عێراق لە دانیشتنی بیست‌و هەشتەمینیدا لە رۆژی ٥-١-٢٠٢٠-ی وەرزی یاسادانانی یەكەمی ساڵی یاسادانانی دووەم/ خولی چوارەمی پەرلەمان، بەپشتبەستن بە حوكمەكانی ماددەی (٥٩/ دووەم)‌ و (١)‌ و (١٠٩)ی دەستور، هەروەها بە پشتبەستن بە ئەركی نیشتمانی‌ و چاودێری ئەنجومەنی نوێنەران وەكو نوێنەری گەلی عێراق بە هەموو پێكهاتەكانییەوە، لە سوربوونەوە لەسەر سەلامەتی عێراق‌ و سەروەریی بەسەر خاك‌ و گەلەكەیدا، بەگوێرەی ئەو دەسەڵاتانەی، كە بەپێی دەستور پێی دراوە، ئەم بڕیارەی دەركرد:

1-    پابەندكردنی حكومەتی عێراق بە هەڵوەشاندنەوەی ئەو داوایەی، كە بۆ وەرگرتنی یارمەتی پێشكەشی هاوپەیمانی نێودەوڵەتی كردووە بۆ شەڕی رێكخراوی داعش لە رۆژی / /٢٠١٦، بۆ كۆتایهێنان بە ئۆپراسیۆنە سەربازی‌ و جەنگییەكان لە عێراق، سەركەوتن بەدیهاتووە‌ و پێویستە لەسەر حكومەتی عێراق كاربكات بۆ كۆتایهێنان بە بوونی هێزە بیانییەكان لەسەر خاكەكەی‌ و رێگریكردن لە بەكارهێنانی ئاسمانی عێراقی.
2-    پێویستە لەسەر حكومەتی عێراق، كە خۆی لە فەرماندەی گشتی هێزە چەكدارەكاندا دەبینێتەوە، ژمارەی هونەرییەكان‌ و راهێنەرانی بیانی رابگەیەنێت، كە پێویستیان پێیەتی لەگەڵ شوێنی جێگیربوون‌ و ئەرك‌ و ماوەی گرێبەستەكانیان.
3-    پێویستە لەسەر حكومەتی عێراق، كە خۆی لە وەزیری دەرەوەدا دەبینێتەوە بچێت بۆ نەتەوە یەكگرتووەكان‌ و ئەنجومەنی ئاسایشی نێودەوڵەتی‌ و سكاڵایەك لەدژی ئەمریكا پێشكەش بكات بەهۆی پێشێلكردنی مەترسیداری سەروەری‌ و ئاسایشی عێراق.
4-    ئەم بڕیارە لە رۆژی پەسەندكردنییەوە دەچێتە بواری جێبەجێكردنەوە.
5- دەبێت چەك تەنها لەدەستی حكومەتدا بێت. 

میحوه‌ری یه‌كگرتوو له‌ دژی ئه‌مه‌ریكا راده‌گه‌یه‌ندرێت (٤)

نه‌سر شه‌مه‌ری، جێگری ئه‌مینداری گشتی گروپی نوجه‌بای سه‌ر به‌ حه‌شدی شه‌عبی، له‌ لێدوانێكی رۆژنامه‌وانیدا رایگه‌یاند “گه‌وره ‌سه‌ركرده‌ عێراقییه‌كانی به‌ره‌ی به‌رگری ئاماده‌كاری بۆ ئه‌نجامدانی كۆبوونه‌وه‌یه‌ك ده‌كه‌ن، به‌مه‌به‌ستی راگه‌یاندنی میحوه‌ری یه‌كگرتوو له‌ دژی بوونی هێزه‌كانی ئه‌مه‌ریكا له‌ ناوچه‌كه‌”، روونیشیكرده‌وه‌، “ئه‌مڕۆ یان سبه‌ی كۆبوونه‌وه‌كه‌ ئه‌نجام ده‌درێت”.

جه‌ختیشیكرده‌وه‌، “پێویسته‌ هه‌موو گروپه‌كانی به‌رگری وه‌ك قه‌واره‌یه‌كی یه‌كگرتوو بۆ مامه‌ڵه‌كردن له‌گه‌ڵ واشنتن ده‌ركه‌ون”. هه‌وره‌ها گوتی “بۆ راگه‌یاندنی میحوه‌ری یه‌كگرتوو زۆر له‌سه‌ر كاروباری رووكاری و پرۆتۆكۆڵی ناوه‌ستین، چونكه‌ قه‌واره‌ی ئیسلامی له‌ سه‌رانسه‌ری جیهان هه‌ر یه‌كه‌”.

شه‌مه‌ری دووپاتیكرده‌وه‌، “جه‌نگه‌كه‌ ئێستا گوازراوه‌ته‌وه‌ بۆ ناوجه‌رگه‌ی وڵاتانی هاوپه‌یمانی واشنتن له‌ ناوچه‌كه‌، كه‌ ده‌یانه‌وێت له‌وێوه‌ بمانكه‌نه‌ ئامانج”، ئاماژه‌ی به‌وه‌شدا، “ئه‌مه‌ریكا ناتوانێت پێشبینی قه‌باره‌ی تۆڵه‌سه‌ندنه‌وه‌مان بۆ خوێنی قوربانییه‌كانمان بكات”.

دوای كۆتایهاتنی شەڕی داعش، لە ناوەندەكانی بڕیاری عێراق لەسەر چارەنوسی هێزەكانی حەشدی شەعبی مشتومڕی زۆر هەیە، بە تایبەت كە بڕیارە لە ئایندەیەكی نزیكدا هەڵبژاردنەكانی ئەنجومەنی نوێنەرانی عێراق ئەنجام بدرێـت، لەو نێوەندەشدا هێزەكانی حەشدی شەعبی كاریگەری خۆیان لەسەر هەڵبژاردنەكان و چوار ساڵی داهاتووی عێراق جێدەهێڵن، بە تایبەت كە هەندێك بە گومانەوە دەڕواننە پەیوەستبوونی بەشێك لە هێزەكانی حەشدی شەعبی بۆ وڵاتێكی وەكو ئێران و باس لەوە دەكەن ئێران لە رێگەی ئەوانەوە دەخوازێت پێگەیەكی بەهێزتر بۆخۆی لە عێراق مسۆگەر بكات، لە ناو ئەو هێزانەشدا ”بزووتنەوەی نوجەبا” بەراورد بە وانی تر زیاتر چاوی لەسەرە و وەكو ژمارەیەكی قورسی ئێران لێی دەڕوانرێت، تەنانەت ویلایەتە یەكگرتوەكانی ئەمریكاش هەڵوێستی توندی بەرامبەر ئەو بزووتنەوەیە نواندوە و وەكو ”هێزێكی ئێرانی” ئەژماری دەكات.

بزووتنەوەی نوجەبا هێزێكی ئایدۆلۆژیە لەسەر ئاینزای شیعە و بڕوابوون بە تێزی ویلایەتی فەقیهـ و لە (2013) بە فەڕمی دروستبووە، خاوەن پێگەیەكی سەربازی گەورەیە و بە پلەی یەكەم چالاكییە سەربازییەكانی لە سوریا پاشان لە عێراق ئەنجامدەدات، بەهۆی پەیوەستبوونی بە تێزی ویلایەتی فەقیهـ و رابەری شۆرشی ئیسلامیی ئێران، وەكو سێبەری ئێران لە عێراق ئەژمار دەكرێت، ئەمەش وای كردووە كاریگەری لەسەر رووداوەكان و پێشهاتە سیاسییەكانی عێراق جێبێڵێت.

پەرلەمانی ئێران وەک کاردانەوە، ٢٠٠ ملیۆن یۆرۆ
بۆ سوپای قودس تەرخانکرد

کوژرانی قاسم سولەیمانی، فەرماندەی سوپای قودس(٥)

قاسم سولەیمانی و ئەبومەهدی موهەندیس

دوای کوژرانی قاسم سولەیمانی، فەرماندەی سوپای قودس لە بەرەبەیانی رۆژی ٣-١-٢٠٢٠ گرژی و ئاڵۆزییەکانی نێوان ئێران و ئەمریکا گەیشتە لووتکە، بەشێوەیەک کە راستەوخۆ هێرشی زارەکی دەکەنە سەر یەکتری و هەڕەشەی هێرشکردنە سەر بنکە و بارەگاکانی یەکتری دەکەن.

سوپای پاسداران رایگەیاند، بە دڵنیاییەوە تۆڵەی تیرۆرکردنی سولەیمانی دەکەنەوە و دەڵێت “ئەمریکا بەرژەوەندییەکانی لە ناوچەکە خستە مەترسییەوە”. ئاماژەی بەوە کردووە، وەڵامی تیرۆرکردنی سولەیمانی کاریگەر و بەهێز دەبێت و رایدەگەیێنێت “چیدیکە ئەم ناوچەیە شوێنێکی ئارام نییە بۆ ئەمریکا”.

لەبارەی ئەو بنکە و بارەگایانەی بەنیازن بیکەنە ئامانج سوپای پاسداران دەڵێت، هەر شوێن و ناوچەیەک لەلای ئەمریکییەکان پیرۆز و خۆشەویست بێت دەیکەنە ئامانج.

هاوکات سوپاسالاری ئێران باس لەوە دەکات، قاسم سولەیمانی رێگەی نەداوە ئەمریکا لە ناوچەکە پەرە بە تواناکانی بدات و گەمارۆی ئیسرائیلی دابوو، رایشیگەیاند “لە هەر شوێنێکەوە پەلاماری ئێران بدرێت دەیکەین بە دۆزەخ”.

ئەمڕۆ سێشەممە ٧-١-٢٠٢٠ لە کۆبوونەوەی پەرلەمانی ئێران تاوتوێی وەڵامدانەوەی ئەمریکا دەکرێت و ٢٠٠ ملیۆن یۆرۆ بۆ سوپای قودس تەرخانکراوە.

سەرچاوەکان

١_ http://www.kurdistanc.com/Islamic/details.aspx?jimare=5295

٢_ https://pmnews.se/?p=28922

٣_ http://drawmedia.net/page_detail?smart-id=5109

٤_ https://www.kurdistan24.net/so/news/c9084eb3-d17e-4a5a-9fa3-71710b4acf7e?fbclid=IwAR27DI7QKTj5v2LJe7-mdkkdgld-GtS8gitrBtBlXw6TJ2kua498o5Rtxh0

٥- https://www.rudaw.net/sorani/middleeast/iran/07012020

Share.

About Author

بوچون نوسین داخراوە.

Social Media Auto Publish Powered By : XYZScripts.com