هاوسەرگیری و كۆرۆنا و كاریگەرییەکانی

0

شلێر سەعید : نوچە 

مامۆستایەكی ئاینی، ڕێژەی هاوسەرگیری زیادی كردووە كەمی نەكردووە، ئەو مامۆستای ئایینیە گوتیشی بەهۆی ئەوەی دادگاكان 3 مانگ دەوام نەكرا زۆربەی ئەوانەی مارە بڕان بێ گەڕانەوە بۆ دادگا هاوسەرگیری دەكەن.

ڤایرۆسی كۆرۆنا هیچ شتێكی نەهێشتۆتەوە لە ژیانی ڕۆژانەماندا و كاریگەری نەبوبێت بەشێوەیەك لە شێوەكان، كاریگەریەكانی درێژەی كێشا بۆ بواری سیاسی و ئابوری وەرزش و ڕۆژانە ئەو كاریگەریانە لەبەرچاومانن و لە هەر وڵاتە و بەشێوەی جیاواز هاوسەرگیری بەردەوامی هەیە. كۆرۆنا پەكی ئەو پرۆسە كۆمەڵایەتیەی نەخستوە، و بەهۆی كۆرۆنا یەك لە دیمەنە سەیرەكان، كە لە سوسیال میدیا بڵاو بووەوە لە مالیزیا كور و كچێك دەیانەوەی پرۆسەی مارە بڕین ئەنجام بدەن، بەڵام مەلا بەشێوەیەكی جیاواز مارەیان دەكات، لەپشت دەرگای ماڵەكە دەوەستێت و بوك و زاوا و شاهید و باوكیان لە پشت دەرگا بە بەستنی ماسك، بەم شێوە مارەكردنەكە تەواو بوو.

لە هەرێمی كوردستانیش بەهەمان شێوە زۆر لە بوك و زاوا و دەستگیراندارەكان گیریان خواردوە بەدەست كۆرۆناوە، بەتایبەت قەدەغەی هاتوچۆ و نەبوونی دەوامی فەرمی.

خەندە و ئەحمەد دانیشتوی شاری هەولێرن، خەونیان بە ئاهەنگێكەوە دەبینی و پلانیان بۆ دادەنا، بەڵام كۆرۆنا وەك میوانێكی ڕەزا قورس خەونەكانی پوچەڵكردن، ئەحمەد لەگفتۆگۆیەكی بۆ نوچە دەڵێت: بەهۆی قەدەغەی هاتوچۆ و ڤایرۆسی كۆرۆنا، ناچاربووین بە ئامادەبونی دە كەس لە خزمانی هەردوولا، مەراسیمی هاوسەرگیریەكە ئەنجام بدەین، بەبێ هەلهەلە و مۆسیقا و میوان و شایى.

ئەوان دەڵێن، هەرچۆنێك بێت حەزمان دەكرد خۆشەویستان لەگەڵمان بن، بەڵام نەشمان دەتوانی زیاتر چاوەڕێ بكەین ئەو پەتایە لەناو بچێت، چونكە پێدەچێت درێژەی هەبێت. 

لە لێدوانێكی تایبەتی بە نوچە، چیمەن محمەد، دانیشتوی شاری كۆیە-ی سەربە پارێزگای هەولێر دەربارەی ئەو گرفتانەی هاتۆتە ڕێیان بەهۆی كۆرۆنا دەڵێت: من لە یەك  لە گوندەكانی كۆیە بووم ئەویش لە شار، بۆیە یەكجار ناخۆشبوو بۆمان، خەریك بوو توشی نەخۆشی دەروونی ببم. دەڵێت، ناخۆشترین وەختمان بەڕێ كرد لەم سەردەمی كۆرۆنا.

گوتیشی  لەكاتی دەستگیرانیمان  كیشەی زۆرمان تووش بوو، بۆنمونە ماوەیكی زۆر بەدەستگیرانی ماینەوە ڕێگا و دەوام نەبوو بچین پشكنین بكەین یان بچینە دادگا یان ئارایشگا و نەشمان دەتوانی یەك ببینین و سەردانی یەكتر بیكەین، بەم حاڵەوە زۆر ئەستەم بوو بەڕێكردنی. 

دەشڵێت، ئێستا كە گوازرامەوە كەس لە كەسوكار و هاوڕێیانمان نەیانتوانی بێنە لامان و سەردانمان بكەن لەم خۆشیەماندا.

 ئەو تازە بوكە داوا لە حكومەت دەكات، چارسەرێك بۆ ئەم خەڵكە بدۆزیتەوە چونكە بێ ئیشی و بێ موچەیی زۆر زەحمەتە.

چیمەن نەشی شاردەوە، كە بەهۆی ئەو ڤایرۆسەوە پیاوەكەی چەند مانگە بێكارە، ئەوەش كاری كردۆتە سەر ژیانی تازەیان.  

مەلا هاشم عەبدالله شیرەیی، پێش نوێژ و وتارخوێنی مزگەوتی خێرخوازان لە كۆیە، سەبارەت بە مارە بڕینەكان لەسەردەمی كۆرۆنا زیادی كردووە یان كەم، بەم شێوە وەلامی  نوچەی دایەوە و گوتی بەهۆی ”ئەوەی زۆرترین مارەبڕین من ئەنجامی دەدەم گەر بەراورد بكەین لەگەڵ پێشتر ڕێژەی هاوسەرگیری زیادی كردووە، بەڵام وەك جاران قەرەباڵغی ناكرێت تەنها وەلی ئەمری هەردوو لاو شاهید ئامادەدەبن.

ئەو مامۆستای ئایینیە گوتیشی، بەهۆی ئەوەی دادگاكان 3 مانگ دەوام نەكرا زۆربەی ئەوانەی مارە بڕان بێ گەڕانەوە بۆ دادگا هاوسەر گیری دەكەن.

Share.

About Author

بوچون نوسین داخراوە.

Social Media Auto Publish Powered By : XYZScripts.com