شیعە و رۆژنامەیەكى قەتەڕى ئیمارات بە یارمەتیدانى پەكەكە تۆمەتبار دەكەن

0

پەرلەمانتارێكى فەتح و رۆژنامەیەكى قەتەڕى، ئیمارات بە هاوكاریكردنى پەكەكە تۆمەتبار دەكەن و بەرپرسێكى كوردیش رەتى دەكاتەوە زانیارى دروست لەسەر ئەم بابەتە هەبێت.

رۆژنامەى “عەرەبى جەدید” ئەمڕۆ راپۆرتێكى بڵاوكردووەتەوە و تێیدا باسى لەوە كردووە ئیمارات دەست لە كاروبارى عێراق وەردەدات و لە دژى توركیا هانى پەكەكە دەدات.

لە راپۆرتى رۆژنامەكەدا موختار مووسەوى ئەندامى هاوپەیمانى فەتحى شیعە قسەى كردووە و گوتوویەتى، ئیمارات پارە بە پەكەكە دەدات بۆئەوەى دژى توركیا بن.


ئەو پەرلەمانتارە گوتوویەتى ئەندامێكى بنەماڵەى دەسەڵاتدار لە ئەبوزەبى پاڵپشتى دارایى پەكەكە دەكات. دەشڵێ ئێمە زانیارییمان هەیە و لە پەرلەمان كار لەسەر ئەو بابەتە دەكەین.

داوایش دەكات مستەفا كازمى سەرۆك وەزیرانى عێراق لەسەر ئەم دۆسیەیە قسە لەگەڵ بەرپرسانى ئیمارات بكات كاتێك سەردانى ئەو وڵاتە دەكات.

مەحما خەلیل قائیمقامى شنگال سەبارەت بە زانیارییەكان بە رۆژنامەكەى گوتووە، ناوە ناوە زانیارى لەم جۆرە بڵاو دەبێتەوە، بەڵام هیچ شتێكى دروستیان لا نییە.

خەلیل باس لەوەیش دەكات ململانێى ئیمارات لەگەڵ توركیا دەبێت لە ئەنكەرەوە یەكلایى بكرێتەوە، نەوەك لەناو سنوورى عێراق.


ئەسیل نوجەیفى سەركردەى سوننە لە بەرەى رزگارى و گەشەپێدان، كە پێشتر پارێزگارى مووسڵ بووە، لە راپۆرتەكە باس لەوە دەكات بوونى پەكەكە لە هەرێمى كوردستان نایاساییە و دەشڵێ ئەگەر هەوڵێكى لەم جۆرەى ئیمارات هەبێ، ئەوا ترسناكە.


چونكە عێراق هاوشێوەى سووریا و لیبیا لێ دەكات و نابێت رێگە بدرێت هیچ وڵاتێك دەست لە كاروبارى ناوخۆى عێراق وەربدات و خاكى ئەم وڵاتە بۆ مەبەستى ململانێیەكانى خۆى بەكار بهێنێ.

لە حوزەیرانى 2017 وە چوار وڵاتى عەرەبى “میسڕ، سعوودیە، ئیمارات، بەحرێن” سەرجەم پەیوەندییان لەگەڵ قەتەڕ پچڕاندووە. ئەوان بەرەیەك و قەتەڕیش لەگەڵ توركیا بەرەیەكى دروست كردووە، میدیاى ئەم دوو بەرەیە ململانێى خۆیان تێكەڵ بەهەموو بابەتەكان دەكەن و لەڕووى مەیدانیشەوە لە دژى یەكتر گۆڕەپانى نوێ دەدۆزنەوە لەوانە سووریا و لیبیا و چەندان شوێنى تر. بڵاوكردنەوەى ئەو جۆرە زانیارییانەیش لەو چوارچێوەیە دێ.

Share.

About Author

بوچون نوسین داخراوە.

Social Media Auto Publish Powered By : XYZScripts.com