بەغدا دەستكاریى مووچە دەكات

0

پەرلەمانتارانى عێراق ئاشكرایان كردووە، كارنامەى چاكسازى ئابوورى كە بڕیارە مانگى داهاتوو لەلایەن حكوومەتەوە ئاراستەى پەرلەمان بكرێت، لە بڕگەیەكیدا گۆڕانكاریى مووچە دەكرێ بەشێوەیەك دادپەروەرى زیاتر بەدى بهێنێ و جیاوازى نێوان زۆرترین و كەمترین مووچە بەو شێوەیەى ئێستا نەبێ.

ماڵپەڕى بەغداد تودەى عێراقى ئەمڕۆ راپۆرتێكى لەسەر كارنامەى چاكسازى ئابوورى حكوومەت بڵاوكردووەتەوە، كە بڕیارە لە ناوەڕاستى مانگى داهاتوو لەلایەن وەزارەتى دارایى عێراقەوە بە پەرلەمان بدرێت و بۆئەوەى تاوتوێ بكرێت.

جەمال كۆچەر ئەندامى لیژنەى دارایى لە پەرلەمانى عێراق گوتوویەتى، دەبێت دەستكاریى پلەبەندى مووچە لە عێراق بكرێت، چونكە جیاوازییەكى زۆر لە مووچە هەیە. كۆچەر نموونەى ئەوەى هێناوەتەوە لە هەندێك فەرمانگەى دەوڵەتى عێراق فەرمانبەر هەیە ملیۆنێك و 200 هەزار دینار وەردەگرێ كەچى فەرمانبەرێك لە هەمان ئاستى ئەو، لە فەرمانگەیەكى تر تەنیا 600 هەزار دینار وەردەگرێ.

ئەو پێشبینیەى كە بۆ گۆڕانكاریى لە مووچە دەكرێ، وای لە ماڵپەڕى بەغداد تودەى كردووە و بڵێ چاوەڕوان دەكرێ “كاغەزى سپى” بۆ مووچە ببێ بە “كاغەزى رەش” كاغەزى سپى ئەو ناوەیە كە بۆ كارنامەى چاكسازى ئابوورى دانراوە و كە بڕیارە وەزارەتى دارایى ئامادەى بكات.


ئەمڕۆ ئەحمەد سەفار ئەندامى لیژنەى دارایى لە پەرلەمانى عێراق، لەسەر هەمان بابەت قسەى بۆ ماڵپەڕى سۆمەرییە كردووە و گوتوویەتى، دەبێ لەپاڵ كارنامەى چاكسازى ئابوورى حكوومەت، كارنامەیەكى تریش لەلایەن لیژنەى دارایى پەرلەمان هەبێت و كۆششیش هەیە بۆئەوەى ئەم دوو كارنامەیە لێك بدرێت.


سەفار ئاشكراى كردووە ئێستا حكوومەتى رووبەڕووى كەمى پارە دەبێتەوە و بۆیە پێویستى بەوە هەیە هێشتا پارەى تر قەرز بكات بۆئەوەى مووچەى فەرمانبەران دابین بكات.

پەرلەمانتارانى لیژنەى ئابوورى و چاودێرانیش باس لەوە دەكەن، عێراق بە ناچارى دەبێ پلەبەندى مووچەى فەرمانبەران چاك بكات و لەلایەكى تریش دەبێ بزانێ ژمارەى فەرمانبەرانى راستەقینەى چەندە. بە تایبەتى ئەم خاڵە توڕەییەكى زۆرى دروست كردووە چونكە وەزیرى پلاندانانى عێراق گوتوویەتى من و وەزیرى دارایى نازانین ژمارەى فەرمانبەرانى عێراق چەندە.

ئەحمەد مەلا تەڵاڵ گوتەبێژى مستەفا كازمى سەرۆك وەزیرانى عێراق ئاشكراى كردووە، لە كۆبوونەوەى دوێنێى ئەنجوونى وەزیران باس لەو فەرمانبەرانى بندیوار كراوە كە لە عێراق بە “فەزایى” ناو دەبرێن. مەلا تەڵاڵ دووپاتیشى كردووەتەوە ئەنجوومەنى وەزیران تاوتوێى میكانیزمێك دەكات بۆئەوەى لەم رێگەیەوە بزانێ چەند فەرمانبەرى راستەقینە لە عێراق هەیە.

Share.

About Author

بوچون نوسین داخراوە.

Social Media Auto Publish Powered By : XYZScripts.com