ئامانجی ئێران لە هێرش بۆ سەر بارەگاکانی حدک و حدکا

0

نوچەنێت

پێش نیوەڕۆی رۆژی شەممە ٨-٩-٢٠١٨، سوپای پاسدارانی ئێران بە چەند موشەکێک بارەگاکانی حیزبی دیموکراتی کوردستان و حیزبی دیموکراتی کوردستانی ئێران  (حدک و حدکا)-ی لە کۆیە بۆردومان کرد و بەهۆی ئەو بۆردومانەشەوە، زیاتر لە ٥٠ کەس لە سەرکردە و پێشمەرگە شەهید و بریندار بوون. هاوکات سێ گیراوی سیاسی کورد بە ناوەکانی رامین حوسێن پەناهی و زانیار و لوقمان مورادی لە سێدارە دا.

هەڵوێستی حکومەتی هەرێمی کوردستان

رۆژی یەکشەممە ٩-٩-٢٠١٨، نێچیرڤان بارزانی، سەرۆکی حکومەتی هەرێمی کوردستان، لە دوای کۆبوونەوەی ئەنجومەنی سەرکردایەتی حزبەکەی، بە رۆژنامەنووسانی راگەیاند لەبارەی بۆردومانکرنی بارەگای (حدکا) و (حدک) رایگەیاند، ”هەڵوێستی خۆمانمان بە ئێران گەیاندووە“.

هەروەها دوای ئەو بۆردومانە، حکومەتی هەرێمی کوردستان لە راگەیەندراوێکدا، سەرکۆنەی ئەو بۆردومانەی کرد و رایگەیاند، ”وێڕاى ئیدانەکردنى ئه‌و بۆمبارانه‌، دووپاتى ناڕەزایەتیی خۆمان لە بەکارهێنانی خاکی هەرێمی کوردستان بۆ هێرشکردنە سەر وڵاتانى دراوسێ ده‌كه‌ینه‌وه‌“.

پاش ئەوەی دوێنێ شەممە ٨ی ئەیلوولی ٢٠١٨، ئێران هێرشی کردە سەر هەردوو دیموکرات لە شاری کۆیە و لە ئەنجامی بۆردومانەکەشیدا ١٧ شەهید و زیاتر لە ٤٠ بریندار کەوتنەوە.

سوپای پاسداران هێرشەکەی لە ئەستۆگرت

گرتەی ڤیدیۆیی کاتی هێرشی موشەکی بۆ سەر بارەگاکانی حدک و حدکا، لە لایەن سوپای پاسدارانی ئێرانەوە.

لە راگەیێندراوێکدا، سوپای پاسداران هێرشی سەر بارەگای حدک و حدکا لەئەستۆگرت و رایدەگەیێنێت لە هێرشەکەدا ٧ موشەکی زەمین بە زەمینی مەودا کورت بەکار‌هێندراوە و هۆشداریی دەدات، ئەگەر چالاکییەکانیان دووبارەبکەنەوە، وەڵامێکی سەختترمان بۆیان دەبێت.

لەدوای گوێنەدانی سەرکردەکانی ئەو گروپانە بە هۆشدارییە جددییەکانی بەرپرسانی هەرێمی کوردستانی عێراق، بەوەی کۆماری ئیسلامی ئێران دەیەوێت هەنگاو بنێت بۆ هەڵگرتنی بنکە و بارەگاکانیان و پێویستە کۆتایی بهێنن بە هەنگاوە دەستدرێژیکارانە و تیرۆریستییەکانیان دژی ئێرانی ئیسلامی، هێزی موشەکی سوپای پاسداران بە بەشداریی فڕۆکەی بێفڕۆکەوانی هێزی وشکانی سوپای پاسداران، رۆژی رابردوو، (شەممە ٨-٩-٢٠١٨) لە ئۆپەراسیۆنێکی سەرکەوتووانەدا، شوێنی کۆبوونەوەی یەکێک لە گرووپە تاوانبارەکان و ناوەندی راهێنانی تیرۆریستەکانی ئەو گرووپەیان بە ٧ موشەکی زەمین بە زەمینی مەدوا کورت، کردە ئامانج.

لەکۆتاییشدا چاوەڕوانی لە هەرێمی کوردستان بۆ چاودێریی و کۆنتڕۆڵی جددیتری سنوورە هاوبەشەکان، هۆشداریی دەدەینە گروپە تیرۆریستی و دژبەرانی شۆڕش و پشتیوانانیان، بە دووبارەکردنەوەی هەنگاوەکانیان، لەگەڵ وەڵامێکی سەختتر و گورزێکی تووندتر بەرەوڕوو دەبنەوە.

ئامانجەکانی ئێران لەو هێرشە چییە؟

یەکەم: هەموو هەوڵی ئەوەیە گورزی کوشەندە لە هێزەکانی دژبەری خۆی بوەشێنێ و پێش بە چالاکییان بگڕی بە تایبەتی لەو بارودۆخە نێوخۆیی و نێودەوڵەتییەی تێکەوتووە.

دووەم: هەوڵی پشێوەی زیاتر لە ناوچەکە دەدات و وەکو پەیامێک ئاراستەی ئەمریکا کرد.

سێیەم: لە بەسرە کۆنسوڵخانەکەی ئاگری تێبەردرا و دەرکرا، بۆیە بە هەموو شێوەیەک هەوڵی تۆڵەکردنەوە دەدات.

چوارەم: ئەگەری ئەوە هەیە بیهەوێت یان ویستبێتی کێشە بۆ ئەنجامدانی هەڵبژاردنی پەرلەمانی کوردستان لە ٣٠-٩-٢٠١٨، دروست بکات. (وەک چۆن باس دەکرێ لە گەڵ ئەو هەلبژاردنە نییە).

پێنجەم: وا خۆی پیشانی لایەنە نەیار و دژەکانی دەدات لە عێراق، کە لە هەر کات و ساتێکدا و شوێنێکی عێراقدا توانای هێرشی هەیە و ناهێڵێ بەرژەوەندییەکانی بکەونە مەترسییەوە. 

شەشەم: وەک وەڵامێک بۆ گەمارۆ و داواکاری رۆژئاوا لەسەر راگرتنی بەرنامەی موشکەی ئەم وڵاتە، هەم فەزای سیاسی شێواند و دەیەوێت لە بیری خەڵکی ناوچەکە بچەسپێنێت، کە سوپای پاسدارن توانای بەرەنگاری لە ئاستێی بەرز دایە و سڵ لە هەڕەشەکانی ئەمریکا ناکاتەوە.

حەوتەم: بە لەسێدارەدانی سێ گیراوی سیاسی کورد بە ناوەکانی رامین حوسێن پەناهی و زانیار و لوقمان مورادی و ئەو هێرشە موشەکییە هەوڵدەدات کۆمەڵانی خەڵک چاوترسێن بکات.

“هێرشەكەی ئێران مەترسی لەسەر ئاسایشی هەرێمی كوردستان هەیە”

سیاسەتمدار و ئەندامی پێشووی ئەنجوومەنی نوێنەرانی عێراق، مەحمود عوسمان رایگەیاند، ئەو هێرشە مووشەكییەی دوێنێ لە خاكی ئێرانەوە كرایە سەر بارەگاكانی حزبی دیموكرات لە كۆیە، لێدانە لە هەرێم و زیادەڕەوییە لەسەر خاكی عێراق كە پێویستە حسابی بۆ بكرێت، هەروەها مەترسی لەسەر ئاسایشی هەرێمی كوردستان هەیە.

مەحمود عوسمان بە ئاژانسی ئانادۆڵو ی راگەیاندووە “لە ئێستادا ئێران هێرش و پەلامارەكانی بۆ سەر ناوچەكانی هەرێمی كوردستان زیادكردووە، هێرشەكەی دوێنێی سەر بارەگاكانی دیموكرات لە كۆیەش هێرشێكی گەورە بوو، كە بە موشەك لە ئێرانەوە لێیان درا، لەكاتێكدا بەرپرسانی ئەو حزبە كۆبوونەوەیان هەبووە و بەو هۆیەوە ژمارەیەك بەرپرس و كادیریان شەهیدبوون”.

سیاسەتمدار و ئەندامی پێشووی ئەنجوومەنی نوێنەرانی عێراق، مەحمود عوسمان گوتی “ئەوەی روویدا شتێكی گەورەیە، ئێران ئەو سیاسەتانەی هەیبووە زیادی كردووە و بەرەو سەرەوەی بردووە، زۆر بەتوندی گۆڕانێكی نەوعی كراوە، ئەمە لێدانە لە هەرێم و زیادەڕەوییە لەسەر خاكی عێراق، كە پێویستە حسابی بۆ بكرێت، بەڵام بەداخەوە لە بەرامبەردا عێراق و هەرێم رۆڵێكی وایان نییە”.

سیاسەتمدار مەحمود عوسمان پێی وایە، کە هێرشەكان مەترسی بۆسەر ئاسایشی هەرێمی كوردستان دروست دەكەن و مەترسی دووبارە بوونەوەشیان هەیە و گوتی: “ئەو هێرشانە مەترسی لەسەر ئاسایشی هەرێمی كوردستان هەیە، چونكە ئەو ناوچەیەی هێرشیكراوەتە سەر ناوچەیەكی ئارامە و نزیكی سنوور نییە، ئەوانەشی هێرشیانكراوەتە سەر، كۆمەڵێكن، كە دانیشتوون و كۆبوونەوەیان هەبووە، لەكاتێكدا ئەوان لەوانە نین، كە كردەوەی چەكداری دژی ئێران ئەنجام دەدەن و لایەنی تر هەیە، كە ئەو كردەوانە دژی ئێران دەكەن، بۆیە هێرشەكە لە رووی ئاسایش و سیاسییەوە بۆ هەرێم خراپە و مانای ئەوەیە، ئێران رێز لەسەروەری و ئاسایشی هەرێم ناگرێت”.

لە بارەی پەیوەندی ئەو هێرشانە بە ئاڵۆزتربوونی پەیوەندییەكانی نێوان ئەمریكا و ئێران و ململانێكانیان لەسەر پێكهێنانی حكوومەتی نوێی عێراق، مەحمود عوسمان، كە لە دوای رووخانی حكومەتی پێشووی عێراق ئەندامی ئەنجوومەنی حوكم بووە لە عێراق و لە ساڵی ٢٠٠٥یش بۆ دووخولی لەسەر یەك ئەندامی ئەنجومەنی نوێنەرانی عێراق بووە لە وەڵامدا گوتی “بەتوندبوونەوەی ئەو ململانێیانە هێرشەكان زیاتر دەبن، چونكە ئەو ململانێیانەی لە نێوان ئەمریكا و ئێران هەیە، لەسەر خاكی عێراق زیاتر دەبێت لەنێوانیاندا، كە ئەم كێشانەش زۆر بوو زیانی بۆ هەموو میلـلەتی عێراق و هەرێمی كوردستان هەیە، ئەوەش شتێكی خراپ دەبێت”.

داوای مانگرتنی گشتی دەکرێت

ناوەندی هاوکاریی حیزبەکانی رۆژهەڵاتی کوردستان داوای مانگرتنی گشتی لە خەڵکی رۆژهەڵات دەکەن و راشیدەگەیێنن بە “هەڵوێستێکی شیاو و یەکگرتووانە” رووبەڕووی کۆماری ئیسلامی ئێران دەبنەوە.

ناوەندی هاوکاریی حیزبەکانی رۆژهەڵاتی کوردستان پێکهاتووە لە کۆمەڵەی شۆڕشگێڕی زەحمەتکێشانی کوردستانی ئێران، کۆمەڵەی زەحمەتکێشانی کوردستان، سازمانی خەباتی کوردستانی ئێران، حیزبی دیموکراتی کوردستانی ئێران و حیزبی دیموکراتی کوردستان.

ئەو پێنج لایەنە لە راگەیێندراوە هاوبەشەکەدا دەڵێن “داوا لە خەڵکی خۆڕاگر و بە هەڵوێستی کوردستان دەکەین رۆژی دووشەمەی داهاتوو بە مانگرتنی گشتی، بێزاریی خۆیان لە نوێترین تاوانەکانی کۆماری ئیسلامی ئێران رابگەیەنن”. 

ناوەندی هاوکاریی حیزبەکانی رۆژهەڵاتی کوردستان راشیگەیاندووە “بە هەڵوێستێکی شیاو و یەکگرتووانە بەرەوڕووی تاوانەکانی ئەو رژێمە دەبینەوە”.

گومانەکان چین؟

بە گوێرەی لێکدانەوە جیاوازەکان گومانەکان لە جەند خاڵێکدا بەمشێوەیە:

یەکەم: پێدەچێ ئەو موشەکانەی، کە سوپای پاسدار باسی دەکات لە ورمێ-وە ئاراستە نەکرابێ و جۆرەکەشی ئەوە نەبێ.

دووەم: موشەکەکان یان بە ئۆتۆمبێلی تایبەت یان لە سەکۆی موشەکی، (بە گوتەی بەرپرسە سەربازییەکانی حدک و حدکا)، لەسەر چیای سورێن لە سنووری سلێمانییەوە ئاراستە کرابێ.

سێیەم: چاودێری کردن و جوڵەپێکردنی فڕۆکەی بێ فڕۆکەوان، لە نزیکەوە ئەنجام دراوە، گومان لەوە دەکرێ لە کەرکوکەوە هاتبێتنە سەر کۆیە (ئامانجەکەیان).

چوارەم: ئەگەری هاوکاری و رەزامەندی لایەنێکی کوردی و لەو بابەتە هەیە و ئەگەری هەبوونی جاسوسی نێوخۆی حدک لە ئارادایە.

ئەنجام 

بە گوێرەی بۆچوونی شارەزایانی سیاسی، باشترین چەک و وەڵامدانەوە بەو دەستدرێژیانەی ئێران، یەکڕیزی و هاوهەڵوێستییە لە نێوان لایەنە سیاسییەکان، بەتایبەت حیزبەکانی رۆژهەڵات، کە تاکو ئێستا کورد لێی بێبەشە و زیانی زۆری لە نەبوونی یەکڕیزی بەرکەوتووە. 

Share.

About Author

بوچون نوسین داخراوە.

Social Media Auto Publish Powered By : XYZScripts.com