د. سالار عوسمان: ڕۆژى شەممە کۆمیتەی ناوەندیی پارتی دیموکراتی کوردستان کۆدەبێتەوە کوردستانی

چنار خۆشناو ـ تایبەت بە نوچەنێت:

د. سالار عوسمان، ئەندامی کۆمیتەی ناوەنديی پارتی دیموکراتی کوردستان دەڵێت، "ڕۆژی شەممەی داهاتوو یەکەم کۆبوونەوەی کۆمیتەی ناوەندیی پارتی دیموکراتی کوردستان بەسەرپەرشتی سەرۆک مەسعود بارزانی ئەنجام دەدات."

ئەمڕۆ پێنجشەممە (10/ تشرینی دووەم/ 2022) د. سالار عوسمان، ئەندامی کۆمیتەی ناوەندیی پارتی دیموکراتی کوردستان بە نوچەنێتی راگەیاند، "لە کۆبوونەوەکەى کۆمیتەى ناوەندیى پارتى دیموکراتى کوردستان، هەڵسەنگاندنێکی نوێ دەکات و نەخشە ڕێگایەک دادەنرێت بۆ کاری ئاييندەى پارتى دیموکراتى کوردستان."

د. سالار عوسمان بۆ نوچەنێت روونکردنەوەى زیاترى دا و دەڵێت، "لە کۆبوونەوەکەدا جەخت لەسەر ئەو هەموو ئەرکانە دەکرێتەوە، کە لە کۆنگرە بڕیاری لەسەر دراوە، ئەو پەیڕەو و پڕۆگرامەی هەیە، دەیکات بەدەروازەی کاری خۆی، هەروەها جەخت لەو خاڵانە دەکرێتەوە، کە سەرۆک بارزانی بە بەردەوامی باسی کردووە لەناو کۆنگرەو لە دەرەوەی کۆنگرە، کە ئەویش ئەوەیە پارتی بەهێز و ئومێدەوە بگەڕێتەوە بۆ نێوکاری سیاسی خۆی و ئەرکەکانی راپەڕێنێت."

سەبارەت بە گۆڕانکاریکردن لە ئۆرگانەکانى پارتى، ئەو ئەندامەى کۆمیتەى ناوەندیى پارتى گووتى، "پێموایە هێشتا زووە بۆ گۆڕانکاری، چونکە تا ئێستا مەکتەبی سیاسیی پارتی و ئەنجومەنی تێکۆشەران پێک نەهێنراوە"، هەروەک دەشڵێت، "بۆیە ئەولەویەتیى کۆبوونەوەکە بریتیە هەڵبژاردنى مەکتەبی سیاسی، دواتریش دیاریکردى ئەندامانى ئەنجومەنی تێکۆشەران."

دەربارەى پەیوەندییەکانى پارتى لە دواى کۆنگرەى (14) لەگەڵ لایەنە سیاسییەکان، د. سالار عوسمان ئاماژەى بەوەکرد، "پارتی بەبەردەوامی یەکێک لە بیرکردنەوەکانی بریتیيە لەوەی کە چۆن بتوانین کەشێکی ئارام لە کوردستان دروست بکەین، بەتایبەت لە پەیوەندی سیاسی لەگەڵ حزب و لایەنە سیاسیەکانی کوردستان و عێراق."

 

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین