Nuce Logo

ئەمڕۆ هەینى (31/ ئايار/ 2024) قوتاد تاڵەبانى پەیامێکى بڵاوکردەوە، لە بەشێکى پەیامەکەى دەڵێت، “گەشبینم بە سەرۆکایەتیت، چونکە دووربینی و پێداگری و وردبینیی تۆ و پتەویی ئەو ڕێبازەی سەرۆک مام جەلال بناغەکەی دیزاین کردووە، وادەکەن یەکێتییەکەمان هەرگیز نەکەوێت و کاروانی خەباتی درێژە بکێشێت و بەهێزتریش ببێت.”

جێگرى سەرۆکى حکومەتى هەرێم ئاماژە بەوەش دەکات، پشتگیریکردنی گەنجان و خوێندکاران، لابردنی لەمپەرەکانی بەردەم هاتنەپێشەوەی ژنان، ڕێگریکردن لە سەرانەوەرگرتن و ڕووبەڕووبوونەوەی گەندەڵی، بەهێزکردنەوەی ئۆرگانەکانی حیزب و یەکخستنەوەی هێزە چەکدارەکان، بەرقەرارکردنی ئاسایش و ئارامی، هاوسەنگکردنەوەی هێز لە ناوخۆ و باڵانسکردنی ململانێ ناوچەیی و هەرێمییەکان، نەهێشتنی سیخوڕی و چاودێریکردنی ژیانی تایبەتی، سەرکەوتن بەسەر کۆسپ و کۆست و پیلانەکاندا، دروستکردنی کۆدەنگی لەبریاردا و سەرپێخستنی دونیابینیی سەردەمییانە بۆ یەکێتی. 

قوباد تاڵەبانى جەخت لەسەر ئەوە دەکاتەوە، بەرگریکردن لە ماف و بەرژەوەندییەکانی خەڵکی کوردستان، پارێزگاریکردن لە قەوارەی هەرێمی کوردستان و پاراستنی مافە دەستوورییەکان، شەڕی بەگژداچوونەوەی عەقڵییەتی شۆڤێنی لە کەرکوک و ناوچە دابڕێندراوەکان، گەڕان و سەردانی یەکلەدواییەکی پایتەخت و ناوەندەکانی بڕیار لە دونیادا بۆ دۆزینەوەی پشتیوانی بۆ مافە ڕەوا و دیموکراسیەکانی گەلەکەمان، هەموو ئەمانە پێکەوە بە هیچ حیزب و سەرکردەیەک ناکرێت، جگە لە یەکێتیی نیشتمانیی کورستان و سەرۆکێک کە ناوی (بافڵ جەلال تاڵەبانی)یە.