سه‌رۆك نێچیرڤان بارزانى له‌گه‌ڵ به‌رپرسى نوێی یونامى كۆبووه‌وه‌ کوردستانی

نوچە نێت

سەرۆكی هەرێمی كوردستان و نوێنه‌رى تایبه‌تى سكرتێرى گشتیى نه‌ته‌وه‌ یه‌كگرتووه‌كان له‌ عێراق و به‌رپرسى نوێى تیمى نه‌ته‌وه‌ یه‌كگرتووه‌كان له‌ عێراق (یوونامى)، هه‌ڵبژاردنى په‌رله‌مانى كوردستان و په‌یوه‌ندییه‌كانى هه‌ولێر ـ به‌غدا تاوتوێ دەكەن.

پێشنیوه‌ڕۆى ئه‌مڕۆ سێشه‌ممه‌ (15/تشرینی یەكەم/2024) سەرۆك نێچیرڤان بارزانى، سه‌رۆكى هه‌رێمى كوردستان، پێشوازیى له‌ د. محه‌مه‌د ئه‌لحه‌سسان، نوێنه‌رى تایبه‌تى سكرتێرى گشتیى نه‌ته‌وه‌ یه‌كگرتووه‌كان له‌ عێراق و به‌رپرسى نوێى تیمى نه‌ته‌وه‌ یه‌كگرتووه‌كان له‌ عێراق (یوونامى) كرد.

بە گوێرەی ڕاگەیێندراوی سەرۆكایەتیی هەرێمی كوردستان، له‌ كۆبوونه‌وه‌یه‌كدا سه‌رۆك نێچیرڤان بارزانى، پیرۆزباییى ده‌ستبه‌كاربوونى له‌ به‌ڕێز ئه‌لحه‌سسان كرد و هیواى سه‌ركه‌وتنى بۆ خواست، هه‌روه‌ها "هه‌موو پشتگیرییه‌كى هه‌رێمى كوردستانى بۆ سه‌رخستنى ئه‌ركى یوونامى"، دووپات كرده‌وه‌.

د. محه‌مه‌د ئه‌لحه‌سسان، وێڕاى نیشاندانى خۆشحاڵى به‌ سه‌ردانى بۆ هه‌رێمى كوردستان، "سوپاسى سه‌رۆك نێچیرڤان بارزانى و لایه‌نه‌ په‌یوه‌ندیداره‌كانى هه‌رێمى كوردستانى كرد بۆ هاوكارییان له‌گه‌ڵ تیمى نه‌ته‌وه‌ یه‌كگرتووه‌كاندا له‌ عێراق."

هەروەك لە ڕاگەیێندراوەكەدا هاتووە، هه‌ردوولا "هه‌ڵبژاردنى په‌رله‌مانى كوردستان و په‌یوه‌ندییه‌كانى هه‌ولێر ـ به‌غدا و دۆخى پێكهاته‌كان، به‌تایبه‌تى ئێزدییه‌كانیان خسته‌ به‌ر باس. له‌مباره‌یه‌وه‌ سه‌رۆك نێچیرڤان بارزانى، سوپاسى هاوكاریى نه‌ته‌وه‌ یه‌كگرتووه‌كانى بۆ كۆمسیۆنى سه‌ربه‌خۆى هه‌ڵبژاردنه‌كان" كرد.

سەبارەت بە كێشه‌كانى هه‌ولێر ـ به‌غداش، "سه‌رۆكى هه‌رێمى كوردستان دووپاتى كرده‌وه‌ كه‌ تاقه‌ چاره‌سه‌ر جێبه‌جێكردنى ته‌واوه‌تیى ده‌ستوور و پاراستنى ئارامى و سه‌قامگیریى عێراقه‌‌، هه‌روه‌ها باشكردنى دۆخى ئێزدییان و گێڕانه‌وه‌ى ئارامى بۆ ناوچه‌كانیان و گه‌ڕانه‌وه‌ى ئاواره‌كانیان بۆ سه‌ر ماڵ و حاڵى خۆیان، به‌ پێویست و گرنگ له‌ قه‌ڵه‌م دا."

چه‌ند پرسێكى دیكه‌ى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه‌ بوو.

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین