Nuce Logo

ئەمڕۆ سێشەممە (29/تشرینی یەکەم/2024) ئاڵتان تان، سیاسەتڤانی کورد و پەرلەمانتاری پێشووی هەدەپە لەدیمانەیەکی کەناڵی رووداو دا کە تایبەت بوو بە دەستپێشخەرییەکەی دەوڵەت باخچەلی سەرۆکی پارتی بزووتنەوەی نەتەوەیی (مەهەپە) بۆ چارەسەری پرسی کورد و هۆکارەکانی دەستپێکردنەوەی چارەسەری پرۆسەی کێشەی کورد لە تورکیا رایگەیاند، "یەکەم؛ بە گشتی لە سیاسەتی دەرەوە کێشەی جیدی هەن. چونکە رۆژهەڵاتی نێوەڕاست بەتەواوەتی شڵەژاوە و دووبارە دیزایین دەکرێتەوە. لەوانەیە سنوور و دەسەڵاتی زۆر لە وڵاتان بگۆڕێن. جا لێرەدا تورکیا دەیەوێت کورد لە تەک خۆی ببینێت نەوەک لە دژی. دووەم هۆکار ئەوەیە، دەسەڵاتی تەیب ئەردۆغان دەنگی لەدەستداوە. هەروەها کێشەی هەیە و چی دەکات ئابووریی وڵاتەکەی بۆ راستەڕێ نابێتەوە. لە هەڵبژاردنی داهاتوودا کە چاوەڕێی هەڵبژاردنی پێشوەخت دەکرێت، پێویستی بە دەنگی کورد دەبێت. سێیەمیش ئەوەیە تەیب ئەردۆغان دەیەوێت دووبارە ببێتە بەربژێر و بۆ ئەمەش بەگوێرەی دەستوور، پێویستی بە (360) دەنگ هەیە و دەیەوێت ئەمەش لەڕێی پشتیوانیی کوردانەوە فەراهەم بکات." 

ئەو پەرلەمانتارە ئاماژەی بە گرینگی ڕۆڵی سەرۆک بارزانی و سەرۆك نێچیرڤان بارزانی، سەرۆكی هەرێمی كوردستان لە پڕۆسەی چارەسەری کێشەی کورد دەكات و گوتی "بەرێز مەسعود بارزانی و نێچیرڤان بارزانیش کاریگەریی گرنگیان لەسەر گەلی کورد هەیە. لە پرۆسەی چارەسەریی (2013)ش من دوای ئەوەی رۆیشتمە قەندیل و گەڕامەوە، لە ماڵی نێچیرڤان بارزانی بوومە میوان. بە درێژی باسمان لەو بابەتانە کرد. زۆر قسەمان لەسەر کرد و هەمان رۆژ کۆنفرانسی رۆژنامەڤانیشمان سازکرد. بەڕێز مەسعود بارزانی و بەڕێز نێچیرڤان بارزانیش لەپێناوی پێشکەوتنی ئەم کارە بە شێوەیەکی تەندروستانە، کاریگەریی جیددیان لەسەر هەردوو لا، تەنانەت لەسەر هەرسێ لا؛ واتا  پەکەکە، حکومەتی تورکیا؛ ئەردۆغان و کوردانی تورکیا و رۆژئاواش کاریگەریی جیددییان دەبێت. چونکە ئەوانیش لە سەرەتاوە داکۆکی لە رێککەوتنی تورک-کورد دەکەن. ئەوان رێککەوتنیان دەوێت نەوەک پێکدادان." 

لەلایەکی ترئەو سیاسەتڤانە کوردە بژاردەکانی بەردەم کوردی ئاشکرا کردوو و گوتی، "کورد دوو رێگەیان لەبەردەمە؛ یان تاوەکو قیامەت هەوڵی سەندنی مافەکانیان بە شەڕ لەگەڵ تورکیا دەدەن کە رێگەی تێناچێت بتوانن ئەمە لەڕێی چەکەوە بکەن. دەتوانن پشتیوانی چەک لە ئەمریکا، ئێران، رووسیا و ئیسرائیل وەربگرن و لەگەڵ تورکیا شەڕ بکەن، بەڵام ئەمە رێگەیەکی باش نییە و هیچ خێرێکی بۆ کورد نییە. بۆ تورکیاش دۆخێکی وەها جێی باسە؛ یان ئەم شەڕە (40) ساڵییە بۆ ماوەی (40) ساڵی دیکە درێژە پێدەدات، یان لەگەڵ کوردان لەنێو تورکیا و دەرەوەی تورکیاش؛ سووریا و عێراق، واتا لە باشوور و رۆژئاوا، دەگاتە رێککەوتنێک."