روونكردنه‌وه‌یه‌ك له‌ دادگای پێداچوونه‌وه‌ و ئه‌نجومه‌نی دادوه‌ری هه‌رێمی كوردستانه‌وه‌ کوردستانی

نوچه‌نێت

دواى كه‌وتنه‌وه‌ى ناڕه‌زایى ناوخۆ و ده‌ره‌وه‌ له‌ بڕیارى دادگاى پێداچوونه‌وه‌ له‌باره‌ى پێنج حوكمدراوه‌كه‌ى بادینان، ئه‌مڕۆ دادگاى پێداچوونه‌وه‌ و ئه‌نجومه‌نى دادوه‌رى هه‌رێمى كوردستان روونكردنه‌وه‌یه‌كیان بڵاوكردووه‌ته‌وه‌ و له‌ ده‌قه‌كه‌ى هاتووه‌، "بۆ زانیاری هه‌موو لایه‌ك ئه‌و بڕیاره‌ هێشتا پله‌ی كۆتایی وه‌رنه‌گرتووه‌ و قۆناغی دیكه‌ی تانه‌لێدانی ماوه‌"

ئه‌مڕۆ شه‌ممه‌ هه‌شتى ئایار، له‌ وه‌ڵامى ئه‌و ناڕه‌زاییانه‌ى له‌سه‌ر بڕیارى سزادانى پێنج حكومدراوى بادینان و دهۆك كه‌وتووه‌ته‌وه‌، دادگاى پێداچوونه‌وه‌ى هه‌رێمى كوردستان و ئه‌نجومه‌نى دادوه‌رى روونكردنه‌وه‌یه‌كیان بڵاوكردووه‌ته‌وه‌ و له‌ ده‌قه‌كه‌ى هاتووه‌، "ئێمه‌ جه‌خت له‌وه‌ ده‌كه‌ین كه‌ له‌ هه‌موو قۆناغه‌كانی دادگایی كردن و بڕیاردان له‌سه‌ر ئه‌م دۆسیه‌یه‌ به‌ پشت به‌ستن به‌ زانیاری و به‌ڵگه ‌و دیكۆمێنتی دروست و به‌و په‌ڕی پیشه‌یی و یاساییانه‌ و سه‌ربه‌خۆییانه ‌و بێلایه‌نانه‌ مامه‌ڵه‌مان كردووه‌".


له‌ به‌شێكى ترى روونكردنه‌وه‌كه‌ هاتووه‌ كه‌ بڕیاره‌كه‌ پله‌ى كۆتایى وه‌رنه‌گرتووه‌، ئه‌و دوو دامه‌زراوه‌ دادوه‌رییه‌ى هه‌رێمى كوردستان ده‌ڵێن، "بۆ زانیاری هه‌موو لایه‌ك ئه‌و بڕیاره‌ هێشتا پله‌ی كۆتایی وه‌رنه‌گرتووه‌ و قۆناغی دیكه‌ی تانه‌لێدانی ماوه‌ كه‌ ئه‌ویش قۆناغی داواكردنی راستكردنه‌وه‌ی بڕیاری پێداچوونه‌وه‌یه‌ (طلب تصحیح القرار التمییزی) به‌ پێی یاسا، سزاداراوان ده‌توانن تانه‌ پێشكه‌ش بكه‌ن بۆ راستكردنه‌وه‌ی بڕیاره‌كه‌.

رۆژى شه‌شى ئایار دادگاى پێداچوونه‌وه‌ى هه‌رێمى كوردستان بڕیارى سزادانى شه‌ش ساڵ زیندانى بۆ هه‌ر یه‌كه‌ له‌، شێروان ئەمین سلێمان، شڤان سەعید عومەر، ئەیاز کەرەم رەشید، هاریوان عیسا محەممەد، گوهدار حەمەد ئەمین عەبدولمەجید، په‌سه‌ند كرد كه‌ پێشتر به‌ تۆمه‌تى بوونى په‌یوه‌ندى له‌گه‌ڵ په‌كه‌كه‌ و سیخوڕى و هه‌وڵدان بۆ تێكدانى ئارامى هه‌رێمى كوردستان له‌لایه‌ن دادگاوه‌ تۆمه‌تبار كرا بوون. ئه‌مه‌یش چه‌ند ناڕه‌زاییه‌كى له‌ ناوخۆ و ده‌ره‌وه‌ لێكه‌وته‌وه‌. حكومه‌تى هه‌رێمى كوردستان له‌ حه‌وتى ئایار راگه‌یێندراوێكى بڵاوكردووه‌ته‌وه‌ و تێیدا دووپاتى ده‌كاته‌وه‌ كه‌ دادگاكان له‌ بڕیاردان سه‌ربه‌خۆن و حكومه‌ت ده‌ست ناخاته‌ كاروباریان.


دەقی روونکردنەوەکەى ئه‌نجومه‌نی دادوه‌ری و دادگای پێداچوونه‌وه‌ی هه‌رێمی كوردستان  : 

روونكردنه‌وه‌یه‌ك له‌ دادگای پێداچوونه‌وه‌ و ئه‌نجومه‌نی دادوه‌ری هه‌رێمی كوردستانه‌وه‌

سه‌باره‌ت به‌ بڕیاری دادگای پێداچوونه‌وه‌ی هه‌رێم / ده‌سته‌ی سزایی/2 به‌ ژماره‌ (468/ ده‌سته‌ی سزایی2 /2021) له‌ رێكه‌وتی 28/4/2021 كه‌ كاردانه‌وه‌ی جۆراوجۆی له‌سه‌ر ئاستی ناوخۆ و ده‌ره‌وه‌ لێكه‌وتۆته‌وه‌، ئێمه‌ جه‌خت له‌وه‌ ده‌كه‌ین كه‌ له‌ هه‌موو قۆناغه‌كانی دادگایی كردن و بڕیاردان له‌سه‌ر ئه‌م دۆسیه‌یه‌ به‌ پشت به‌ستن به‌ زانیاری و به‌ڵگه ‌و دیكۆمێنتی دروست و به‌و په‌ڕی پیشه‌یی و یاساییانه‌ و سه‌ربه‌خۆییانه ‌و بێلایه‌نانه‌ مامه‌ڵه‌مان كردووه‌. بۆیه‌ به‌شێك له‌و كاردانه‌وه‌ و هه‌ڵوێست نواندنانه‌ ده‌چنه‌ خانه‌ی ده‌ستێوه‌ردان له‌ كاروباری دادگاكان و رێزنه‌گرتنه‌ له‌ سه‌ربه‌خۆیی ده‌سه‌ڵاتی دادوه‌ری. ئه‌مه‌ له‌ كاتێكدا كه‌ ئه‌ركی ئێمه‌ و هه‌موو هاووڵاتیان و لایه‌نه‌ سیاسی و مه‌ده‌نیه‌كانه‌ كه‌ پابه‌ند بین به‌ سه‌ربه‌خۆیی ده‌سه‌ڵاتی دادوه‌ری و حوكمی یاساو بڕیاری دادگاكان.

له‌باره‌ی ناوهاتنی كونسوڵخانه‌كانی ویلایه‌ته‌ یه‌كگرتووه‌كانی ئه‌مریكاو ئه‌ڵمانیا له‌ چوارچێوه‌ی خستنه‌ڕووی ئه‌و زانیاری و به‌ڵگانه‌دا بووه‌ كه‌ تاوانباران دانیان پێدا ناوه‌. ئیمه‌ جه‌خت ده‌كه‌ینه‌وه‌ ناوهێنانی ناوی ئه‌و كونسوڵخانانه‌ له‌سه‌ر زاری تاوانبارانه‌وه‌یه‌ و دادگا ئه‌وانی به‌ تۆمه‌تبار نه‌زانیوه‌، له‌گه‌ڵ ئه‌وه‌شدا له‌ چوارچێوه‌ی كاری دیپلۆماسی و یاسا به‌ركاره‌كان ئاماده‌یی ته‌واوی خۆمان نیشان ده‌ده‌ین بۆ ئاگاداركردنیان له‌ هه‌موو زانیاری و به‌ڵگه‌ و دیكۆمێنته‌كانی دۆسیه‌ی ناوبراوان به‌ مه‌به‌ستی ده‌ركه‌وتن و نیشاندانی راستیه‌كان.

بۆ زانیاری هه‌موو لایه‌ك ئه‌و بڕیاره‌ هێشتا پله‌ی كۆتایی وه‌رنه‌گرتووه‌ و قۆناغی دیكه‌ی تانه‌لێدانی ماوه‌ كه‌ ئه‌ویش قۆناغی داواكردنی راستكردنه‌وه‌ی بڕیاری پێداچوونه‌وه‌یه‌ (طلب تصحیح القرار التمییزی) به‌ پێی یاسا، سزاداراوان ده‌توانن تانه‌ پێشكه‌ش بكه‌ن بۆ راستكردنه‌وه‌ی بڕیاره‌كه‌.

ب. راگه‌یاندنی ئه‌نجومه‌نی دادوه‌ری و دادگای پێداچوونه‌وه‌ی هه‌رێمی كوردستان 
8/5/2021

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین