Nuce Logo

ڕۆژی چوارشەممە (2026/10/21) بە نوێنەرایەتیی سەرۆک نێچیرڤان بارزانی، سەرۆکی هەرێمی کوردستان، دڵشاد شەهاب، گوتەبێژی سەرۆکایەتی هەرێمی کوردستان، بەشداریی لە ڕێوڕەسمی ڕاگەیاندی تۆڕی "هەستانەوە" بۆ ڕزگاربووانی دەستی داعش ڕایگەیاند، "ئێمە هاوکاری و پشتیوانیی هەموو ئەو پێکهاتانە دەکەین کە بوونەتە قوربانیی دەستی داعش.راگەیاندنی ئەم تۆڕە دەربڕینی ئیرادەیە و هەنگاوێکی گرنگە بەرەو قۆناخێکی نوێ، تێیدا رزگاربووان خۆیان ببنە خاوەنی دەستپێشخەری، دەنگ و رۆڵی کاریگەر لە پرسی ماف و داهاتوویاندا."

گوتەبێژی سەرۆکایەتی، جەختیش لەوە دەکاتەوە کە، "ئەرکی ئێمەیە هەمیشە لە رەوشی دژواردا پشتیوانیی خوشک و برایانی ئێزدیمان کردووە، ئەمڕۆش دووپاتی دەکەینەوە کە لە کوردستان، عێراق و لە هەر شوێنێک بێت، هەمیشە پشتیوانی مافە رەواکانیان و پاراستنی ناسنامەیان دەبین و تاوەکو کەسێکی رفێندراو مابێت، نووسینگەکەمان بەردەوام دەبێت لە رزگارکردنیان و گەڕان بەدوای چارەنووسیاندا".

هەروەها سەبارەت بە ئاوەدانکردنەوەی ناوچە زیانلێکەوتووەکان، دڵشاد شەهاب دەڵێت، "بەدیهێنانی دادپەروەری، مسۆگەرکردنی مافی رزگاربووان، ئاشکراکردنی ونبووەکان، جێبەجێکردنی یاسای رزگاربووانی ئێزدی، لەبارکردنی رەوشێکی گونجاو بۆ گەڕانەوەیان و ئاوەدانکردنەوەی شنگال و دەڤەرەکانی دیکەی ئێزدییان، کاری سەرەکی و ئەرکی ئێمەیە، هەموو کارێکی پێویست لەو پێناوەدا ئەنجام دەدەین و هیچ خەم ساردییەک ناکەین".

هاوکات لە ڕاگەیێندراوی سەرۆکایەتی هەرێمی کوردستان هاتووە، گوتەبێژی سەرۆکایەتی، ستایشی بوێری و خۆڕاگری و ڕزگاربووانی کرد لەپێناو هەنگاونان بەرەو پێشەوە و هیوای خواست ڕاگەیاندنی ئەم تۆڕە ببێتە دەستپێکی قۆناغێکی نوێی پڕ لە ئومێد، کارکردن و بەدەستهێنانی دەستکەوتی زیاتر بۆ ڕزگاربووان.