سه‌رۆكایه‌تیى هه‌رێمى كوردستان میوانداریى کونسوڵ و دیپلۆماتكاران ده‌كات کوردستانی

نوچەنێت:

سەرۆکایەتیى هەرێمى کوردستان به‌بۆنه‌ى مانگى پیرۆزى ڕه‌مه‌زانه‌وه‌، میوانداریى لە ‏دیپلۆماتكاران و كونسول و نوێنه‌رانى وڵاتان له‌ هه‌رێمى كوردستان دەکات.

ئێوارەى ئەمڕۆ چوارشەممە (13/نیسان/2022)، سه‌رۆكایه‌تیى هه‌رێمى كوردستان به‌ ئاماده‌بوونى  مسته‌فا سه‌ید قادر جێگرى سه‌رۆكى هه‌رێمى كوردستان، فه‌وزى هه‌ریرى ‏سه‌رۆكى دیوانى سه‌رۆكایه‌تیى هه‌رێمى كوردستان، سه‌فین دزه‌یى، به‌رپرسى ‏فه‌رمانگه‌ى په‌یوه‌ندییه‌كانى ده‌ره‌وه‌ى حكوومه‌تى هه‌رێمى كوردستان و ژماره‌یه‌ك له‌ ‏به‌رپرسان و ڕاوێژكاران، به‌بۆنه‌ى مانگى پیرۆزى ڕه‌مه‌زانه‌وه‌، ئێوارە خوانێکى بۆ كونسول و نوێنه‌رانى وڵاتان له‌ هه‌رێمى كوردستان ڕێکخست.

سەرۆکایەتیى هەرێمى کوردستان لە ڕاگەیێندراوێکدا دەڵێت، "فه‌لاح مسته‌فا ڕاوێژكارى باڵاى سه‌رۆكى هه‌رێمى كوردستان ‏به‌ناوى سه‌رۆكایه‌تییه‌وه‌ به‌خێرهاتنى میوانانى كرد و سوپاس و پێزانینى هه‌رێمى ‏كوردستانى بۆ پشتگیریى و یارمه‌تیدانى وڵاتانى دۆست و كۆمه‌ڵگه‌ى نێوده‌وڵه‌تى ‏ده‌ربڕى و ئاماژه‌ى به‌ ڕۆڵ و كاریگه‌ر‌یى نوێنه‌رایه‌تیى دیپلۆماسیى وڵاتان له‌ ‏هه‌رێمى كوردستان بۆ بره‌ودان به‌ په‌یوه‌ندییه‌كان و بواره‌كانى هاریكاریى هاوبه‌ش ‏كرد.‏"

فەلاح مەستەفا، لە بەشێکى ترى وتەکەیدا ڕاشیگەیاند، "هه‌ڵوێستى هه‌رێمى كوردستانى بۆ چاره‌سه‌ركردنى كێشه‌كان ‏له‌گه‌ڵ حكوومه‌تى فیدرالى عیراق له‌سه‌ر بنه‌ماى ده‌ستوور و به‌ گفتوگۆ دووپات ‏كرده‌وه‌ و هیواى خواست هاتنى جه‌ژنى ڕه‌مه‌زان ببێته‌ ده‌رفه‌تێك بۆ گه‌یشتنى ‏لایه‌نه‌ عیراقییه‌كان بۆ لێكگه‌یشتنێكى هاوبه‌ش و چاره‌سه‌ركردنى كێشه‌كان."

لە کۆتایی ڕاگەیێندراوەکەیدا سەرۆکایەتیى هەرێم ئاماژە بەوەدەکات، "لاى خۆیانه‌وه‌ دیپلۆماتكاران و نوێنه‌رانى وڵاتان له‌ هه‌رێمى كوردستان، خۆشحاڵیى ‏خۆیان به‌و دیدار و ده‌رفه‌ته‌ ده‌ربڕى و سوپاسى سه‌رۆكایه‌تیى هه‌رێمى ‏كوردستانیان كرد، هه‌روه‌ها هاریكارى و هاوبه‌شیى هه‌رێمى كوردستانیان له‌گه‌ڵ ‏وڵاته‌كانیان به‌رز نرخاند.‏"

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین