سەرۆک نێچیرڤان بارزانى: کلیلى سەقامیگریى عێراق چاره‌سه‌ركردنى كێشه‌كانى هه‌ولێر ـ به‌غدایە کوردستانی

نوچەنێت:

سەرۆک نێچیرڤان بارزانى لە دیدارێکدا لەگەڵ سیناتۆرى ئەمەریکى لینزى گرام ڕایدەگەیێنێت، "كلیلى سه‌قامگیرى و چاره‌سه‌كردنى كێشه‌كانى عیراق، ‏چاره‌سه‌ركردنى كێشه‌كانى هه‌ولێر ـ به‌غدا یه‌ به‌ گفتوگۆ و به‌پێى ده‌ستوور.‏"

ئەمڕۆ سێشەممە (پێنجى تەممووز/2022) سەرۆک نێچیرڤان بارزانى، سه‌رۆكى ‏هه‌رێمى كوردستان، پێشوازى له‌ سیناتۆرى  ناودارى ئه‌مه‌ریكى به‌ڕێز لینزى گرام ‏و شاندێكى یاوه‌رى كرد، کە پێکهاتبوون‌ له‌ خاتوو ئالینا ڕۆمانۆوسكى باڵیۆزى ئه‌مه‌ریكا له‌ عیراق ‏و جه‌نه‌رال جۆن برێنان فه‌رمانده‌ى هێزى هاوپه‌یمانیى نێوده‌وڵه‌تى و ژماره‌یه‌ك ‏دیپلۆماتكار و پله‌دارانى سه‌ربازیى ئه‌مه‌ریكى.

سەرۆکایەتیى هەرێمى کوردستان لە ڕاگەیێندراوێکدا دەڵێت، "له‌ كۆبوونه‌وه‌یه‌كدا دۆخى عیراق و پرۆسه‌ى سیاسیی وڵات، دوایین پێشهاته‌كانى ‏شه‌ڕى دژى تیرۆر، په‌یوه‌ندییه‌كانى هه‌ولێر ـ به‌غدا و گفتوگۆى چاره‌سه‌ركردنى ‏كێشه‌كانى نێوانیان، دۆخى سووریا و پرسى كورد له‌و وڵاته‌، تاوتوێ كران.‏"

هەروەها بەپێى ڕاگەیێندراوەکە، "هه‌ردوولا جه‌ختیان له‌ گرنگیى پاراستنى ئارامى و سه‌قامگیریی‌ ناوچه‌كه‌ كرده‌وه‌ و ‏كۆك بوون له‌سه‌ر ئه‌وه‌ى مه‌ترسیى تیرۆر و سه‌رهەڵدانه‌وه‌ى داعش هه‌ڕه‌شه‌یه‌كى ‏ڕاسته‌قینه‌یه‌ له‌سه‌ر ئارامى و سه‌قامگیریی‌ عیراق و سووریا و بۆ ‏به‌ره‌نگاربوونه‌وه‌ى ئه‌و مه‌ترسییه‌، پێویسته‌ ئارامى و سه‌قامگیرى له‌ ناوچه‌كه‌ ‏پارێزراو بێت و هه‌مووان له‌م پێناوه‌دا هه‌وڵ و كۆششیان بخه‌نه‌ گه‌ڕ.‏"

سه‌رۆك نێچیرڤان بارزانى، "وێڕاى ده‌ربڕینى سوپاس و پێزانینى هه‌رێمى كوردستان ‏بۆ پشتگیرى و یارمه‌تیدانى ئه‌مه‌ریكا بۆ عیراق و هه‌رێمى كوردستان له‌ شه‌ڕى دژى ‏تیرۆردا، دووپاتى كرده‌وه‌ كه‌ كلیلى سه‌قامگیرى و چاره‌سه‌كردنى كێشه‌كانى عیراق، ‏چاره‌سه‌ركردنى كێشه‌كانى هه‌ولێر ـ به‌غدا یه‌ به‌ گفتوگۆ و به‌پێى ده‌ستوور.‏"

ئەوەش هاتووە، "په‌یوه‌‌‌ندییه‌كانى عیراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه‌، ‏دوایین پێشهاته‌كانى دۆخى ناوچه‌كه‌ به‌گشتى و چه‌ند پرسێكى جێى بایه‌خى ‏هاوبه‌ش، ته‌وه‌رێكى دیكه‌ى كۆبوونه‌كه‌ بوو.‏"

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین