نونی ژنانی کورد لە نێو گوڵزاری پێشانگای نێودەوڵەتی بەغدا بۆ کتێب
ڕاز ئەسعەد
کاری داهێنەرانە هەمیشە پێویستی بە بناغەی پتەوە، هیچ کارێکیش داهێنەرانە نییە، ئەگەر لەسەر بنەما و پێگەی مێژوویی نەبێت و ڕەگ و ڕیشەی لەقوڵاییەوە سەرچاوەی نەگرتبێت، بەو پێیەی هەر لە کۆنەوە بەغدا شاری ڕۆشبیری و پێشکەوتن بووە و ساڵانێکە بەهۆی دەسەڵاتدارێتی چەوتەوە پێگەی شایستەی خۆی لەدەستداوە، ئێستا وردە وردە شوێن پێی خۆی لە پێشەنگدا دەکاتەوە و پێشانگای کتێبی ئەم ساڵی لەجوڵەیەکی داهێنەرانەی بێوێنەدا ئاسۆی فراوانی بیرکردنەوەی دەسەلمێنێتەوە.
بۆ پێشانگای کتێبی ئەم ساڵ و لە خولی شەشەمیدا، بەڕێوەبەرانی پیشانگاکە دەروازەکان ڕادەستی سەد ژنی داهێنەر دەکەن، کە لە ماوەی سەدەیەکدا لە سەرتاسەری عێراقدا پێشەنگی پێشکەوتنی هزری و جڤاکی و سیاسی و کولتوری بوون، ژنانێک کە بۆ هەمیشە مێژووی ژنیان لە یادگەی عێراقدا نەخشاندووە و هەمیشە پێش سەردەمی خۆیان کەوتوون و تەنانەت ناوی نیشتمانەکەیان لە نێو وڵاتانی جیهاندا بەرزکردۆتەوە. ژنانێکی ڕێچکەشکێن ئاسۆی بیرکردنەوەی ئەم کۆمەڵگایەیان بەجۆرێک فراوان و پێشخست، کە بوونە ناونیشان و لۆگۆی پێشکەوتن و شانازی نەوەکانی داهاتوو.
ناونیشانی سەرەکی پێشەنگاکە (سەد نونی عێراقی)ە، نون لە (نون النسوة)وە هاتووە و مەبەست لێی ژنانە، شێوەی لۆگۆی گشتی پێشانگاکەش لە کارێکی هونەرمەندی ناوداری شێوەکار جەواد سەلیمەوە وەرگیراوە، کە تابلۆیەکە بەناوی (دایکایەتی/ الامومة ١٩٥٤) و بریتییە لە بەرجەستەی نەحتێک لە شێوەی پیتی نوندا، هەڵبژاردنی ئەم تابلۆیە وەک لۆگۆ کارێکی زیرەکانەیە چ وەک یادێک بۆ جەواد سەلیم و چ وەک ڕەمزێک بۆ ژنان.
هەڵبژاردنی سەد کەسایەتی وەک کاریزما و ژنی داهێنەر، زۆر بە ئاگایی و زیرەکانەیە و تەواوی ئەو ژنانە نەک هەر لەعێراقدا بەڵکو لە ناوچەکە و جیهانیشدا ناسراون و کاریگەریی گەورەیان لەسەر پێشکەوتنی کۆمەڵگا و بیری پێشکەوتنخوازی هەبووە و لە تێکڕای بوارەکاندا ڕێچکەشکێن و داهێنەر بوون.
دوور لە ئاگاداری ڕێکخراوەکانی ژنانی لای خۆمان، کە پێویست بوو لەپەراوێزی پێشانگاکەدا چەندین کارو چالاکیان هەبووایە، لە نێو ئەو سەد ژنە داهێنەرەدا چەند ژنێکی ناودار و ڕێچکەشکێنی کوردیش بوونەتە گوڵی ڕازاوەی نێو دیوانی سەد ژنی داهێنەر لەعێراقدا، لەوانە حەپسەخانی نەقیب، وەک سەرکردەی نەتەوەیی و دامەزرێنەری یەکەمین قوتابخانەی کچان لەعێراقدا، سانیحە ئەمین زەکی بەگ وەک یەکەمین خانمە پزیشکی موسڵمان، زەکیە ئیسماعیل حەقی وەک یەکەمین ژنە دادوەر لەوڵاتانی عەرەبیدا و...هتد.
بەم ناونیشان و گرنگیدانە بە ژنان و بە بەشداری زیاتر لە ملیۆنێک ناونیشان لە بیستوسێ دەوڵەتەوە، پێشانگای کتێب لەبەغدا و شاری بەغدا دەچێتەوە دۆخی ڕۆشبیری ئاسایی خۆی، کە پێشتر لە ناوچەکەدا بەسەنتەری خوێندنەوە و کتێب و ڕۆشنبیری ناسرابوو، جاران دەگوترا کتێب لە قاهیرە دەنوسرێت و لە بەیروت چاپدەکرێت و لەبەغداش دەخوێندرێتەوە، بەئومێدی گەڕانەوەی ئەو ڕۆژگارە، سەرکەوتن بۆ هەموو پێشەنگاو فێستیڤاڵێکی کتێب و چالاکی ڕۆشنبیری.
0 لێدوانەکان
Karla Gleichauf
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
M Shyamalan
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
Liz Montano
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment