جەمال كۆچەر: قەرزە نوێیەكەی عێراق بۆ ساڵی داهاتووە کوردستان- عێراق

سیهام میران – تایبەت بە نوچەنێت

جەمال كۆچەر پەرلەمانتاری كورد و ئەندامی لیژنەی دارایی پەرلەمانی عێراق لە لێدوانێكی بۆ نوچەنێت رەتی كردەوە عێراق بتوانێ‌ بودجەی تەواوكاریی هەبێت و سەبارەت بەو قەرزەیش كە عێراق بە نیازە بیكات، ئەو پەرلەمانتارە گوتی، "قەرزەكە بۆ ساڵی داهاتووە".

كۆتایی هەفتەی رابردوو عەلی عەلاوی وەزیری دارایی عێراق رایگەیاند، وڵاتەكەی داوای چوار ملیار دۆلار قەرزی لە سندووقی دراوی نێودەوڵەتی كردووە. ئەمە لە كاتێكدایە كە لە عێراق بەهۆی زۆربوونی داهاتەوە باسی دانانی بودجەی تەواوكاریی دەكرا.
ئەمڕۆ یەكشەممە هەشتی ئاب، جەمال كۆچەر پەرلەمانتاری كورد و ئەندامی لیژنەی دارایی لە پەرلەمانی عێراق باسی لەوە كرد، "ئەو پەرلەمانتارانەی باسی بودجەی تەواوكاریی دەكەن لە ئابووری نازانن". جەمال كۆچەر لە لێدوانەكەی بۆ نوچەنێت گوتی، "ئەو چوار ملیارە بۆ بابەتی بودجەی تەواوکاری نییە، بوجەی تەواوکاری لە دەوڵەتی عێراقی باسی لێوە نەکراوە، هەندێ ئەندام پەرلەمان كە هیچ لە ئابووری نازانن باسی بودجەی تەواوکاری دەکات". 
ئەو پەرلەمانتارە دەڵێ‌، "عێراق دەتوانێ‌ لە سێ‌ حاڵەت داوای بودجەی تەواوكاریی بكات، لەوانە یەکەم ئەگەر پارەیەکی زۆری بۆ گەڕابێتەوە ( داهاتەکە زۆرتر بێت) لەوەی كە لە بودجەی یەكەمی دارێژراوە، ئەمەش لە عێراق نییە. هی دووەم ئەگەر شتی دیکە هەبێت و پێویستی بە بودجەی تر هەبێت، یاخود ئەگەر بودجەی پێشتر ئەوەی پەسەند کراوە هەمووی جێبەجێ کرابێت".جەمال كۆچەر دووپاتی دەكاتەوە تا ئێستا لە ٧٠٪ی بودجەی ئەمساڵ جێبەجێ نەکراوە.
لە كۆتایی لێدوانەكەیشی دووپاتی كردەوە ئەو چوار ملیار دۆلارەی عێراق دەیەوێ‌ قەرزی بكات، بۆ ساڵی داهاتووە نەوەك ئەمساڵ.
 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین