نەبیل مەرسوومی: عێراق هاوشێوەی حكومەتی هەرێم گرێبەست لەگەڵ كۆمپانیای شیفرۆن واژۆ دەكات کوردستان- عێراق

نوچەنێت

پسپۆڕێكی ئابووری رایدەگەینێت، حكومەتی عێراق هاوشێوەی گرێبەستییە نەوتییەكانی هەرێمی كوردستان، كە لە كابینەی پێنجەم واژۆكرابوون، گرێبەستی هاوبەش لەگەڵ كۆمپانیای شیفرۆنی ئەمەریكی واژۆ دەكات.

ئەمڕۆ چوارشەممە (2026/11/18) نەبیل مەرسوومی، پسپۆڕی ئابووری لە لاپەڕەی فەرمی خۆی نووسیوویەتی، دوای چەندین گفتوگۆی لەسەرەخۆ، سەبارەت بە كێڵگەی نەوتی ناسرییە لە رۆژئاوای قورەنە/2 بەگوێرەی مەرجە بارزگانییەكانی نێوان وەزارەتی نەوت و كۆمپانیای شیفرۆنی ئەمەریكی،  لەسەر گرێبەستی هاوبەش لە بەرهەمهێنان یان قازانج (لەسەر هاوشێوەی گرێبەستەكانی كوردستان) رێككەوتن، ئەوەش بە تەواوی جیاوازە لەگەڵ ئەو گرێبەستە خوزمەتگوزاریەی كە حكومەتی عێراق لەگەڵ كۆمپانیای لۆك ئۆیلی رووسی واژۆی كردبوو، كە لە بەرانبەر هەر بەمیلێكی دەرهێندراو، (1.15) دۆلاری لێ وەردەگیرا.

ئەو پسپۆڕە ئابوورییە لە بەشێكی دیكەی قسەكانی ئاماژە بەوە دەكات، كۆمپانیا ئەمەریكیەكە لە ماوەیەكی نزیكدا دەست بەكارەكانی دەكات بۆ ئەوەی بەرهەمهێنانی رۆژانەی بگەینێتە (800) هەزار بەرمیل نەوت، كە لە ئێستادا كۆمپانیا رووسییەكە بەرهەمی رۆژانەی تەنیا (400) هەزار بەرمیل نەوتە.

سەبارەت بە پەلەكردنی بەغداش مەرسوومی نووسیوویەتی، پەلەكردنی بەغدا بۆ ئەو رێككەوتنە لەگەڵ شیفرۆن بۆ سێ هۆكار دەگەڕێتەوە، پاشەكشە لە هەناردەی نەوتی عێراق و پێویستی تەكنەلۆژیای شیفرۆن و داراییەكەی، پاڵپشتی سیاسی ئەمەریكی. 

دەربارەی وادەی واژۆكردنی گرێبەستەكەس ئەو پسپۆڕە ئابوورییە دەڵێت، چاوەڕوان دەكرێت، پێش كۆتایی ئەمساڵ گرێبەستەكە بە فەرمی لەگەڵ كۆمپانیای شیفرۆن واژۆ بكرێت.

شایەنی باسە، حكومەتی هەرێمی كوردستان، لە كابینەی پێنجەم بەسەرۆكایەتی سەرۆك نێچیرڤان بارزانی، چەندین گرێبەستی لەگەڵ كۆمپانیای جیهانی لە بواری نەوت و گاز بەشێوەی گرێبەستی هاوبەش واژۆكردووە.

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین