سەرۆكی ئەنجومەنی دادوەری بانگهێشتی تاران دەكرێت عێراق ناوچەکە و جیهان

نوچه‌نێت

فائق زێدان سەرۆكی ئەنجومەنی باڵای دادوەری عێراق بانگهێشتی ئێران كرا و ئاژانسێكی ئێرانیش دەڵێ‌، بەم نزیكانە ئەنجامی لێكۆڵینەوە لە دۆسیەی كوشتنی قاسم سولەیمانی فەرماندەی پێشووی فەیلەق قودسی سوپای پاسداران و ئەبومەهدی موهەندیس جێگری سەرۆكی حەشدی شەعبی بڵاودەكرێتەوە.

ئەمڕۆ سێشەممە نۆی ئایاری 2023 فائق زێدان لەسەر داوای غولام حوسێن موحسینی سەرۆكی دەسەڵاتی دادوەری ئێران، گەیشتە تاران و هەر یەكە لە سەرۆكی دادگای باڵای فیدڕاڵی و سەرۆكی داواكاری گشتی و سەرۆكی دادگای تێهەڵچوونەوەی عێراق یاوەری بوون.

هەرچەندە ئامانجی بانگهێشتكردنەكە ئاشكرا نەكراوە، بەڵام بە دوور نازانرێ‌ پەیوەندی بە دۆسیەی كوشتنی قاسم سولەیمانی فەرماندەی فەیلەق قودس و ئەبومەهدی هومەندیس هەبێت. جەبار عۆدە سەركردە لە چوارچێوەی هاوئاهەنگی شیعە بە ئاژانسی تەسنیمی ئێرانی راگەیاندووە، بەم نزیكانە ئەنجامی لێكۆڵینەوەكان ئاشكرا دەكرێت، كە بەگوتەی ئەو سێ‌ لایەن بەرپرسیارن یەكەمیان ئەمریكا و دووەمیان ئیسرائیل و سێیەمیان چەند لایەنێكی ناوخۆیین

لە سێی كانوونی دووەمی 2020 قاسم سولەیمانی فەرماندەی فەیلەقی قودسی سوپای پاسدارانی ئێران و ئەبومەهدی موهەندیس جێگری سەرۆكی حەشدی شەعبی لە فڕۆكەخانەی بەغدا بە هێرشێكی ئەمریكا كوژران و ئەمریكا دەستبەجێ بەرپرسیارێتی كوشتنی ئەوانی لە ئەستۆ گرت.
 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین