عێراق و توركیا بۆ هەناردەی نەوتی هەرێمی كوردستان كۆدەبنەوە کوردستان- عێراق

نوچه‌نێت

باسم محەمەد بریكاری وەزیری نەوتی عێراق بە ئاژانسی رۆیتەرزی راگەیاندووە، 19ی ئەم مانگە بەرپرسانی عێراق و توركیا بۆ دەستپێكردنەوەی هەناردەی نەوتی هەرێمی كوردستان كۆدەبنەوە.

ئەمڕۆ پێنجشەممە 15ی حوزەیرانی 2023 باسم محەمەد بریكاری وەزیری نەوتی عێراق بۆ كاروباری پشكنین و هەڵكەندن، لە لێدوانێكی بۆ ئاژانسی رۆیتەرز ئاشكرای دەكات 19ی حوزەیران بەرپرسانی نەوتی عێراق لە بەغدا لەگەڵ شاندێكی توركیا كۆدەبنەوە بۆ تاوتوێكردنی دەستپێكردنەوەی هەناردەی نەوتی هەرێمی كوردستان.

باسم محەمەد دەڵێ‌، "لەسەر ئەوە رێككەوتووین بە زووترین كات هەناردەی نەوتەكە دەست پێ بكاتەوە، ئامادەین 500 هەزار بەرمیل نەوتی رۆژانە هەناردە بكەین".

رۆیتەرز ئاماژەی بۆ ئەوە كردووە بەهۆی هەڵبژاردنی سەرۆكایەتی توركیا گفتوگۆی نێوان عێراق و توركیا لەسەر هەناردەی نەوتی هەرێمی كوردستان دواكەوتووە.

لە 25ی ئاداری 2023 هەناردەی نەوتی هەرێمی كوردستان بۆ توركیا لە بڕیارێكی لیژنەی ناوبژیوانی نێودەوڵەتی سەر بە ژووری بازرگانی جیهانی لە پاریس وەستاوە، بەمەیش زیانێكی زۆری دارایی و ئابووری بەر هەرێمی كوردستان كەوتووە. هەرێم و حكومەتی فیدڕاڵی لە نیسانی رابردوو رێكەوتوون، بەڵام تا ئێستا توركیا رەزامەندی بۆ دەستپێكردنەوەی پرۆسەكە نەداوە.
 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین