Nuce Logo

داوی ئەوەی خاتوو فەتووش گونەی، هاوسەری هونەرمەندی کۆچکردووی کورد یەڵماز گونەی، لە نامەیەکدا بۆ حەمەی حەمەسەعید، وەزیری رۆشنبیری و لاوان كردووە، لەو نامەیە داوای دەكات، میراتی هونەری و بەرهەمەکانی هونەرمەندی کۆچکردوو یەڵماز گونەی لە زانکۆدا بخوێنرێن بۆ ئەوەی رۆ‌ڵەکانی کورد ئاشنای کار و بەرهەم و ڕێچکە هونەرییەکەی هونەرمەند و دەرهێنەری بەناوبانگی کورد، یەڵماز گونەی بن.

لە رۆژی (14/9/2025) وەزیری رۆشنبیری و لاوان بە نووسراوێکی رەسمی، داواکارییەکەی ئاراستەی وەزارەتی خوێندنی باڵا و توێژینەوەی زانستیی کرد، وەزارەتی خوێندنی باڵا و توێژینەوەی زانستیی، نووسراوێکی ئاراستەی زانکۆی سلێمانی کردووە بۆ ئەوەی لە کۆلێژی هونەری زانکۆکە، میراتی هونەری و بەرهەمەکانی هونەرمەندی کۆچکردوو یەڵماز گونەی بخرێنە چوارچێوەی پڕۆگرامەکانەوە و بخوێندرێن و لێتوێژینەوەی زیاتریان لە بارەوە بکرێت.

خاتوو فەتووش گونەی، لە نامەیەکدا، بەناوی بنەماڵەکەیان سوپاسی وەزیری رۆشنبیری و لاوان دەكات.

هاوسەرەكەی دەشڵێت، یەڵماز گونەی، کامێراکەی دەستی وەک چەکێک بۆ ئازادی بەکاردەهێنا و دەیویست لە ڕێگەی بەرهەمە هونەرییەکانییەوە و لە سینەمادا، "چیرۆکە نەگێڕدراوەکانی کورد بۆ جیهان بگێڕێتەوە".

هەر لە نامەكەی جەخت لەسەر ئەوە دەكاتەوە، ئێوە وەک ئازادیخواز و پێشمەرگەیەکی رێگەی ئازادی، زۆرتر لە یەڵماز گونەیەوە نزیکن، تا ئەوانەی لە رووی فیزیکییەوە لە دەوروبەری بوون. ئێوە، کە ئامێزتان بۆ پێشوازی لە بەرهەمەکانی کردووەتەوە، مایەی شانازین.

یەڵماز گۆنەی، دەرھێنەر، سیناریست و ڕۆماننووسی کوردی لە (1-4-1937) لە ناوچەی ئەدەنە لە باكووری كوردستان لە دایكبووە، زۆربەی کارەکانی بۆ چینی کرێکاران لە تورکیاتەرخانکردووە، خەڵاتی چڵە خورمای ئاڵتوونی وەرگرتووە لە فیستیڤاڵی کان ساڵی (1982) بۆ فیلمی رێگا، بەبەردەوامی لە دژایەتی و ململانێی دەسەڵاتی تورکیادا بووە بەھۆی نیشاندانی کەلتوور و خەڵک و زمانی کوردی لەناو فیلمەکانیدا، لە (9/9/1984) لە پاریس كۆچی دوایی كردووە.