قوباد تاڵەبانی: گەرەنتی بەردەوامی مووچە پەیوەستە بە یەکڕێزی کورد لە بەغدا کوردستان- عێراق

نوچەنێت: هێلان مزەفەر

قوباد تاڵەبانی، جێگری سەرۆکی ئەنجوومەنی وەزیرانی هەرێمی کوردستان رایگەیاند، حکومەتی هەرێم ئامادەیە داهاتی نانەوتی رادەستی بەغداد بکات، جەختیشی لەوەکردەوە کە گرەنتیی بەردەوامیی مووچە پەیوەستە بە یەکڕیزیی کوردەوە لە بەغداد.

ئەمرۆ شەممە (11/10/2025) لە لێدوانێکدا بۆ میدیا یەكێتی، قوباد تاڵەبانی ئاشكرای دەكات، کە حکومەتی هەرێمی کوردستان ئامادەیی تەواوی هەیە بۆ ڕادەستکردنی داهاتە نانەوتییەکان بە حکومەتی فیدراڵی لە بەغداد، سەبارەت بە گرەنتی دابەشکردنی مووچەکانی داهاتووی مووچەخۆرانی هەرێم، قوباد تاڵەبانی رایگەیاند، "بەردەوام دەبین لە پەیوەندییەکانمان لەگەڵ بەغداد بۆ ئەوەی بیانوو بۆ نەناردنی مووچە نەمێنێت."

جێگری سەرۆکی ئەنجوومەنی وەزیران جەختی لەوە کردەوە، کە گرەنتی راستەقینە بۆ بەردەوامبوونی ناردنی مووچە لەلایەن بەغدادەوە، بەندە بە یەکدەنگی فراکسیۆنە کوردستانییەکان لە بەغداد، هەروەها راشیگەیاند: "گرەنتی بەردەوام ناردنی مووچە لەلایەن بەغدادەوە کاتێک دەبێت، کە کورد لە بەغداد بەهێز بێت و بەشێک بێت لە بڕیاری سیاسی."

بەگوێرەی دوایین ڕێككەوتنی هەولێر و بەغدا، وا بڕیارە هاتنی مووچەی فەرمانبەرانی هەرێم لە كاتی خۆیدا لە لایەن بەغداوە ڕەوان بكرێت و چیتر بەربەستی بۆ دروست نەبێت.

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین