Nuce Logo

ماڵپەڕی (بیرگون) بڵاویکردەوە، ڕەجەب تەیب ئەردۆغان سەرۆک کۆماری تورکیا لەنوێترین لێدوانیدا لە مەراسیمی کردنەوەی باخچەی نیشتیمانی فڕۆکەخانەی ئەتاتوک هەڵوێستی خۆی سەبارەت بە کشانەوەی هێزەکانی پەکەکە ڕاگەیاند و گوتی، "پشتیوانی هەر هەنگاوێکی ئەرێنی دەکەم کە بمانگەیێنێتە ئامانجەکەمان و لەلای ئێمە هەنگاوێکی بە نرخە."، لەبارەی بەردەوامیدان بە پرۆسەکە دەشڵێت، "ساڵێک دەبێت دەستمان کردووە بە پرۆسەی تورکیایەکی بێ تیرۆر، بەماوەیەکی کەم توانیومان پێشکەوتنی باش بەدەست بهێنین و زۆر بە وردیی و گرینگییەوە چاودێری پرۆسەکە دەکەین ، کارەکانی کۆمسیۆنی چارەسەری ئاشتی لە پەرلەمانی تورکیا بەردەوامە."

سەرۆک کۆماری تورکیا لەبارەی کۆبوونەوەیان لەگەڵ شاندی ئیمراڵی دەم پارتی ڕایدەگەیێنێت، "لە کۆشکی سەرۆکایەتی پێشوازیمان لە شاندی ئیمراڵی کرد، تابڵێی کۆبوونەوەیەکی بنیاتنەر و بەرهەمدار و ئومێدبەخشمان بۆ چارەسەری کێشەکان لە داهاتوو ئەنجامدا."ئەردۆغان لە درێژەی قسەکانیدا دووپاتی دەکاتەوە کە دەرئەنجامی ئەو کۆبوونەوەیەیان لەگەڵ شاندی ئیمراڵی لە ڕۆژانی داهاتوو دەبینن و دەگەین بە ناوچەیەکی دوور لە تیرۆر."

ڕەجەب تەیب ئەردۆغان دووپاتی دەکاتەوە کە دەبێت بەردەوامی بە پرۆسەکە بدرێت و دەڵێت، "وەک هاوپەیمانی گەڵ، گرینگە لەم پرۆسەدا بەخێرایی هەنگاو بنێن کە سوودی بۆ میللەتەکەمان و وڵاتەکەمان هەبێت، لەئێستادا لە کارەکانمان لە قۆناغێکی هەستیاردایە و دەبێت بە هەنگاوی بنیاتنەر و گشتگیر بڕیار لە کارەکانمان بدەین لە چوارچێوەی پرۆسەی تورکیایەکی دور لە تیرۆر." 

هاوکات، لە کۆبوونەوەی شاندی ئیمراڵی و ئەردۆغان هەریەک لە ئەفکان عەلا جێگری سەرۆکی ئەکپارتی و ئیبراهیم کاڵن سەرۆکی دەزگای هەواڵگریی میت بەشداری کۆبوونەوەکە بوون، دەم پارتی لە دوای کۆبوونەوەکە لە ڕاگەیێندراوێکدا ڕایگەیاند، "لە کۆبوونەوەکەدا دوایین پێشهات و هەنگاوەکەکانی قۆناغی ئێستای پرۆسەی ئاشتی و کۆمەڵگەی دیموکراسی و هەنگاوەکانی داهاتوومان تاوتوێ کرد، زۆر خۆشحاڵین لەنێوان ئێمە و حکوومەت بیروبۆچوونی هاوبەش و کۆدەنگییەک هەیە لەبارەی هەنگاوەکان و دڵنیابوونەوە لەوەی کە دەبێت لە داهاتوویەکی نزیکدا پێشکەتنی خێرا و تەندروست لە پرۆسەکە بنرێت." 

جێگەی ئاماژە پێدانە، لەدوای ڕاگەیێندراوی پەکەکە کە تیایدا کشانەوەی هێزەکانیان لە تورکیا ڕاگەیاند، لە (2025/10/30)، هەریەک لە پەروین بوڵدان جێگری سەرۆکی پەرلەمانی تورکیا و میتحەد سانجار پەرلەمانتاری دەم پارتی وەک شاندی ئیمراڵی لە کۆشکی سەرۆکایەتی لەگەل ئەردۆغان کۆبوونەوە و بڕیارە لە سەرەتای ئەم مانگە سەردانی ئیمراڵی بکەن و لەگەڵ عەبدوڵڵا ئۆجەلان ڕێبەری زیندانیکراوی پەکەکە بکەن و تاوتوێی دوایین پێشهاتەکانی پرۆسەی ئاشتی بکەن.