تەڵعەت تاهیر: من بۆ خوێنه‌رانم ده‌نووسم نه‌وه‌ك بۆ ده‌رخستنى گرنگى خۆم کولتوور

لاڤین عومەر، تایبه‌ت نوچە نیت

ته‌ڵعه‌ت تاهیر شاعیر و نووسه‌ر دوو كتێبى نوێ بڵاو ده‌كاته‌وه‌ و له‌ لێدوانێكى تایبه‌ت به‌ نوچه‌نێت، باس له‌ دوو كتێبه‌ نوێیه‌كه‌ى و ئامانجى نووسینى شیعره‌كانى ده‌كات و ده‌ڵێ، " من بۆ خوێنه‌رانم ده‌نووسم نه‌وه‌ك بۆ ده‌رخستنى گرنگى خۆم".

ته‌ڵعه‌ت تاهیر ساڵانێكه‌ شیعر و نووسین بڵاو ده‌كاته‌وه‌، جیا له‌ نه‌وه‌ى پێشوو به‌هۆى تۆڕه‌ كۆمه‌ڵایه‌تییه‌كانیش نه‌وه‌ى نوێش به‌ شیعره‌كانى ته‌ڵعه‌ت تاهیر ئاشنان و خوێنه‌رێكى زۆرى هه‌یه‌. له‌ چه‌ند رۆژى رابردوودا ئه‌م شاعیره‌ دوو كتێبى نوێى بڵاوكرده‌وه‌ كه‌ یه‌كێكیان تێكسته‌ بڵاونه‌كراوه‌كانیه‌تى له‌ 15 ساڵى رابردوودا به‌ ناوى " ناوی تۆ ئیمزای منە" له‌ دوو توێى 400 لاپه‌ڕه‌ بڵاوكردووه‌ته‌وه‌. ئه‌ویتریشیان به‌ ناوى "رۆژگارى وشك و چاوى ته‌ڕ" بڵاو كردووه‌ته‌وه‌ ئه‌ویش له‌ 400 لاپه‌ڕه‌ چاپ كراوه‌.

له‌ لێدوانێكى بۆ "نوچه‌نێت" سه‌باره‌ت به‌ ناوه‌ڕۆكى ئه‌م كتێبانه‌ ته‌ڵعه‌ت تاهیر گوتى، "ناوەڕۆکی کتێبی( ناوی تۆ ئیمزای منە) سەرجەم تێکستەکانی پانزە ساڵی رابردووە کە چاپم نەکردوون ئیتر ئەمە شیعر و پەخشان و تێکستی نەسرییە یاخود با بڵێین تێکستی پەخشانییە. کتێبەکەی دیم ( رۆژگاری وشک و چاوی تەڕ) بریتییە لە وتار و توێژینەوە و دنیابینی من سەبارەت بە ئەدەبیات، بە زمان، بە مێژووی ئەدەبیات، ئەزموونی خۆم سەبارەت بە نووسین و هەروەها ئاوڕدانەوە لە ئەزموون و نووسینی ئەدیبان وشاعیرانی تری کوردی و جیهانی".

ئه‌و دوو كتێبه‌ نوێیه‌ى ته‌ڵعه‌ت تاهیر له‌لایه‌ن ده‌زگاى "فام" له‌ هه‌ولێر چاپكراوه‌. ئه‌و شاعیره‌ پێشتر چوار كتێبى ترى بڵاوكردووه‌ته‌وه‌ "لەبەر ئاوازێک نایەوێ ببێ بە گۆرانی"  شیعرە، "دەرچوون لە سورەی نووسین" وتارە، هەروەها "عەتری ئەو عاشقانەی مردن" وەرگێڕانی هەڵبژاردەیەکە لە شیعری شاعیری گەورەی عەرەب ئەدۆنیس، هەروەها کتێبی"بنەچەی سەوسەن" کە ئەویش قەسیدەیەکی دوورودرێژە شاعیری گەورەی عەرەب ئەدۆنیس بۆ کوردستانی نووسیوە.

سەنتەر لای من خوێنەرە

 

ته‌ڵعه‌ت تاهیر یه‌كێكه‌ له‌و شاعیرانه‌ى زۆر بایه‌خ به‌ خوێنه‌ران ده‌دات و ته‌نانه‌ت له‌ لێدوان و گفتوگۆكانى دووپات له‌سه‌ر ئه‌م خاڵه‌ ده‌كاته‌وه‌، له‌ لێدوانه‌كه‌یشى بۆ نوچه‌نێت له‌سه‌ر بایه‌خدانى به‌ خوێنه‌ران ته‌ڵعه‌ت تاهیر گوتى، "راستیەکەی ئەوەی من سەنتەرە وشە نییە، سەنتەر لای من خوێنەرە من گرنگی بە خوێنەر دەدەم. پێشموایە ئەوەی لە کۆتاییدا چێژ دەبینێ و دەیخوێنێتەوە، ئەوەی لای من گرنگە خوێنەرە. من بۆ خوێنەرەکانی خۆم دەنووسم، ئەم کتێبانە بۆ ئەوە نەنووسراون کە گرنگی نووسەرەکە، یان گرنگی من و خۆبەشتزانی من پیشان بدەن، ئەوەی لای من پێویست بووە خوێنەر دنیابینەیەکی جوان و تازەی لەبارەی ئەدەبیات و مێژووی ئەدەبیات و ئەفسانە و شیعری کلاسیک و شیعری تازەی کوردی و شیعری تازە و ئەدەبیاتی جهیانی هه‌بێت. بۆیه‌ ئەوەی چاوەرێیان لێ دەکەم ئەوەیە بەدڵیان بێت هیوادارم بەدڵیان بێت هیوادارم ببێتە مایەی ئەوەی کە هیچ نەبێت پەنجەرەیەکی تر، دەلاقەیەکی تر لە ژووری هەستیان، ماڵی هەستیان بكاته‌وه‌. بۆ ئەوەی لەو پەنجەرەیەوە بروانێتە دنیای تر".

له‌ كۆتایى قسه‌كانیشى ته‌لعه‌ت تاهیر بۆ نوچه‌نێت گوتى، " نووسەر کەره‌ستەکانی لە خوێنەر و خەڵک وەردەگرێت بەسەرهات و چیرۆک، بێگومان ئەرکی نووسەرە کە ئەم کەره‌ستانە لەخەڵک وەردەگرێت بە شێوەیەکی جوان و بە شێوەیەکی پاراو و ئیستاتیکی دیسان سەر لەنوێ بیبەخشیتەوە خوێنەر

 

 

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین