به‌ بڕیارێك په‌یوه‌ندى ژێربه‌ژێرى پزیشك و ده‌رمانخانه‌كان نامێنێ تەندرووستی

سیهام میران – تایبەت بە نوچەنێت

سه‌ندیكاى پزیشكان به‌ بڕیارێك نووسینى راچێته‌ به‌ ده‌ستوخه‌تى پزیشكه‌كان قه‌ده‌غه‌ ده‌كات و سه‌رۆكى لقی هه‌ولێرى سه‌ندیكاى ده‌رمانسازان ده‌ڵێ، "به‌و بڕیاره‌ كۆنتاكتى نێوان پزیشك و ده‌رمانخانه‌كان نامێنێ".

دوێنێ یه‌كشه‌ممه‌ 29ى ئاب سه‌ندیكاى پزیشكانى هه‌رێمى كوردستان بڕیارى دا چیتر راچێته‌ ده‌رمان به‌ ده‌ستوخه‌تى پزیشكه‌كان نه‌نووسرێت، له‌باره‌ى ئه‌و بڕیاره‌وه‌ د. ره‌نج محه‌مه‌د سه‌رۆكى لقى هه‌ولێرى سه‌ندیكاى ده‌رمانسازان ده‌ڵێ، "بڕیارێکی لەو جۆرە ئەرکی پزیشك ئاسانتر و سووکتر دەکات. هەرچەندە ئەو بڕیارە لە کاتی زوو دراوە بەڵام تاکو ئێستا جێبەجێ نەکراوە، بە جێبەجێکردنی ئەو بڕیارە خەڵك نەجاتی دەبێت لە دەستوخەتی ناخۆش، یا لە بەدوا گەڕانی دەرمان لەبەر ئەوەی بە شێوازێك بنووسرێت کەس تێنەگات".

د. ره‌نج محه‌مه‌د سه‌رۆكى لقى هه‌ولێرى سه‌ندیكاى ده‌رمانسازان دووپاتى ده‌كاته‌وه‌ كه‌ له‌ زۆربه‌ى وڵاتان راچێته‌ به‌ كۆمپیوته‌ر ده‌نووسرێت و بۆیه‌ پێویسته‌ له‌ كوردستانیش بكرێت به‌ كۆمپیوته‌ر جیا له‌مه‌یش ئاماژه‌ بۆ ئه‌وه‌ ده‌كات لایه‌نێكى ئه‌رێنى بڕیاره‌كه‌ ئه‌وه‌یه‌ په‌یوه‌ندى نێوان پزیشك و ده‌رمانخانه‌كان نامێنێ.

ره‌نج محه‌مه‌د گوتى، "ئەو بریارە کۆنتاکتی نێوان دکتۆر و دەرمانخانەکان ناهێڵێت ئیتر خەڵکەکە ئازاد دەبێت لە هەر کوێ بیەوێت دەرمانەکە بکرێت. هەندێك شوێن هەبوو بە شێوازێك دەرمانەکەیان دەنووسی تەنیا دەرمانخانەکەی لای خۆی تێدەگەیشت. ئەمەش ئاسانکاریەکی زۆرە بۆ هاووڵاتیان ئیتر سەربەست دەبن لە دۆزینەوەی چارەسەرەکان چونکە بە کۆمپیوتەر دەنووسرێت بە ئاسانی دەتوانرێت بخوێنرێتەوە. ئەوەش وا دەکات هەڵەی پزیشکی کەم ببێتەوە".

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین