Nuce Logo

ڕاپرسییەکە، کە چوارشەممەی 1ی 12ی 2021 بڵاوکراوەتەوە، دەریخستووە کە زۆرینەی ئەمریکییەکان ترسیان هەیە لە هەڵایسانی جەنگ لەنێوان واشنتن و پەکین.

ئەنستیتۆی ڕۆناڵد ڕیگن، کە ڕاپرسییەکەی ئەنجام داوە، دەڵێت ئەمە یەکەمجارە زۆرینەی ئەمریکییەکان یەک وڵات وەکو هەڕەشەی هەرە گەورە لەسەر ئەمریکا دەبینن، کە ئەویش چینە.

لە داتا ڕاگەیەنراوەکاندا هاتووە کە 52%ی ئەمریکییەکان کاتێک لێیان پرسراوە گەورەترین هەڕەشە لەسەر ئامریکا لە کام وڵاتێکەوەیە؟ وتوویانە وڵاتی چین، کەچی تەنیا 14%ی یان ئاماژە بە ڕووسیا کردووە وەکوو گەورەترین هەڕەشە لەسەر ئەمریکا.

ئەم داتا نوێیە لەکاتێکدایە کە ساڵی 2018 و لە ڕاپرسییەکی هاوشێوەدا تەنیا 20%ی ئەمریکییەکان ئاماژەیان بە چین کردووە وەکوو هەڕەشەی گەورە لەسەر ئەمریکا، لە کاتێکدا 30%یان ئاماژەیان بە ڕووسیا کردبوو.

بەپێی راپرسییەکەی ئەمساڵ ئەندامانی کۆمارییەکان 64%یان چین وەکو هەڕەشەی هەرە گەورە دەبینن و ئەندامانی دیموکراتەکان 44%یان چین وەکو هەڕەشەی هەرە گەورە لەسەر ئەمریکا دەبینن.

لە مانگی شوبات هەمان راپرسی لەناو دیموکراتەکان کرابوو، ئەوکاتە تەنیا 20% یان ئاماژەیان بە چین کردبوو وەکوو گەورەترین هەڕەشە لەسەر ئەمریکا.

لەبارەی سروشتی هەڕەشەکانی چین، 20%ی بەشداران وتوویانە هەڕەشە گەورەکان بریتین لە چالاکییە بازرگانی و ئابوورییەکانی چین، 19%یان وتوویانە هەڕەشە گەورەکە بریتییە لە پێشکەوتنە سەربازییەکانی چین و 17%یان وتوویانە هەڕەشە هەرە گەورەکان بریتین لە پێشێلکردنی مافەکانی مرۆڤ لەلایەن چینەوە.

ڕاپرسییەکە لە سەرو بەندی ئەو گرژییانەدایە کە لەنێوان چین و ئەمریکا دروست بووە و تەنانەت 71%ی بەشداران وتوویانە ترسیان هەیە دۆخەکە بگاتە ڕووبەڕووبوونەوەی سەربازیی نێوان هەردوو هێزی زەبەلاحی چینی و ئەمریکی.

بەپێی ئەندامانی حیزبەکانیش بەمجۆرە بووە: 79%ی کۆمارییەکان و 66%ی دیموکراتەکان ترسی خۆیان دەربڕیوە لە سەرهەڵدانی جەنگی سەربازیی نێوان چین و ئەمریکا.

سەرچاوە: وۆڵ ستریت جۆرناڵ