کتێبی ئیشراق وەک رامانێکی رەخنەیی بڵاو دەبێتەوە کولتوور

لاڤین عومەر: نوچەنێت

هۆشەنگ شێخ محەمەد، کتێبێکی120لاپەڕەیی بە ناوی ئیشراق وەک رامانێکی رەخنەیی نوسیوە، پێیوایە پێوستە ئەم بابەتە سەدان لاپەڕەی لەسەر بنوسرێت. سەبارەت بە کتێبەکەی خۆی دەڵێت: ئەم کتێبە لە واقیعی ئێستای رەخنەی کوردی لەباشووری کوردستان و ئەم هۆشیارییە کۆمەڵایەتییە دەکۆڵێتەوە.

نوچەنێت: کتێبی ئیشراق چەند لاپەڕەیە، قەبارەی چەندە؟

هۆشەنگ شێخ محمەد: کتێبی (ئیشراق وەک رامانێکی رەخنەیی) لەگەڵ پوختەیەک بە زمانی عەرەبی و پوختەیەک بە زمانی ئینگلیزی، دەبێتە(120)  لاپەڕە. نزیکەی بیست و پێنچ هەزار وشەیە. واتا کتێبەکە گەورە و دوورو درێژ نییە، ئەگەر چی بابەتی کتێبەکە، (ئیشراق وەک رامانێکی رەخنەیی)،  ئەوە هەڵدەگرێ، دەیان و سەدان لاپەڕەی تری لەسەر بنوسرێت، بەڵام من لەم کتێبەمدا ویستوومە بە قوڵی و ستوونی بیربکەمەوە و بنووسم، بۆیە ئەوەندەی پێم کرابێت، بابەتەکەم بە کورتترین و پوختترین زمان دەربڕیوە.

نوچەنێت: ناوەڕۆکی کتێبەکە باس لە چی دەکات؟

هۆشەنگ شێخ محمەد: ناوەڕۆکی کتێبەکە بریتییە لە پێشەکییەکی کورت و دوو بەشی سەرەکی، یەکەمیان بە ناوی ئیشراق وەک ڕامانێکی رەخنەیی و دووەم ئیشراق لە سوورەوەردییەوە بۆ نیتچە. وەک لە پێشەکی کتێبەکە نووسیومە: (ئەم کتێبە لە واقیعی ئێستای رەخنەی کوردی لەباشووری کوردستان و ئەم هۆشیارییە کۆمەڵایەتییە دەکۆڵێتەوە، کە وتاری سیاسی و دینی و رۆشنبیری و کۆمەڵایەتی دەخوێنێتەوە. هەوڵێکە بۆ پەیداکردنی رامان و بیرکردنەوەیەکی رەخنەیی، کە بتوانێت بە ناوەڕۆک و شێوازێکی مرۆڤانە لەنێو رۆشنبیری کوردیدا ئیش بکات). 

لەم لێکۆڵینەوەیەدا لەسەر ئەم بنەمایە ئیشم کردووە، کە تا پێش یەکەم شەڕی جیهانی و دابەشکردنی کوردستان و لکاندنی بە وڵاتانی ئێراق و تورکیا و ئێران و سووریا، سەپاندنی ئەم نەخشە سیاسی و جوگرافی و کۆمەڵایەتییەی، کە تا ئێستا کاریگەری راستەوخۆی لەسەر هۆشیاریی کۆمەڵایەتی ئێمەدا هەیە. کورد خاوەن کەلتوورێکی (ئیشراقی) بووە. 

ئەم کەلتوورە(ئیشراقی) یە بە کاریگەری کۆنە دینەکانی کورد و ناوچەکە، هزری میتراییزم و ئێزیدی و زەردەشتی و یارسانی، هەروەها کاریگەری فەلسەفەی یۆنانی و فەلسەفەی پلاتۆنیزمی نوێ، دواتریش کاریگەری گنوسیزمی جوو و مەسیحی و مانیزم، دواترینیش کە ئیسلام دێت و سۆفی و فەیلەسوفی کورد (سورەوەردی) ئیشراق وەک رێبازێکی فەلسەفی دادەمەزرێنێت، کاریگەری لەسەر کەلتووری ناوچەکە و کورددا دادەنێت.

بۆ ئەوەی لە رەگی مێژوویی فەلسەفەی ئیشراق و (سورەوەردی) و بیرکردنەوەی سۆفیگەری و فەلسەفییانەی کورد بگەین، دەبێت بۆ سەردەمی (سورەوەردی)یەکان بگەڕێینەوە! کە مەبەستمان لێیان (شێخ شەهاب یەحیای سورەوەردی)، ناسراو بە (شێخی مەقتوول) و (شێخی شەهید) و (شێخی ئیشراق) و زۆر ناسناوی تر، لەگەڵ (شێخ شەهاب عومەر سورەوەردی)، ناسراو بە شێخ و ئیمام و مورشید و رێبەری تەریقەتی (سوهرەوەردی)، یان (سورەوەردی)یەکەی کتێبی (عەوارفی مەعارف). هیوادارم ئەم کتێبە بە بیرۆکە و بابەتەکەی دەروازەیەکی نوێ لە رۆشنبیریی کوردی بکاتەوە!

نوچەنێت: خاوەنی چەند کتێبی جگە لەم کتێبە؟

هۆشەنگ شێخ محمەد: جگە لەم کتێبە بیست کتێبی ترم چاپ کردووە، بەڵام لەم دوو ساڵەی دوایی، کە پتر بایەخ بە فەلسەفە و سۆفیگەری دەدەم، ئەم کتێبانەی خوارەوەم چاپ کردوون:

  • خوێندنەوەی حیکمەتی ئیشراقی سورەوەردی. لێکۆڵینەوەیەکی گەورەیە لەبارەی فەلسەفەی ئیشرا ق و ژیان و بەرهەم و رۆشنبیری (سورەوەردی)٢٠٢٠
  • وەرگێڕانی (کتێبی حیکمەتی ئیشراق)ی سورەوەردی لەزمانی عارەبییەوە بۆ کوردی، کە یەکێکە لە گرنگترین کتێبەکانی سورەوەردی و هزری سۆفیگەری فەلسەفی. لە ساڵی ٢٠٢٠
  • وەرگێڕانی سێ نامەی رەمزی سورەوەردی لە کتێبێکدا، بە ناوی (لەنامەکانی سورەوەردی). ٢٠٢٠
  • وەرگێڕانی سێ نامەی تری رەمزیی سورەوەردی لە کتێبی (فریشتەی سوور) و نووسینی پێشەکییەک لەبارەی چیرۆکەکانەوە، لە ساڵی ٢٠٢٠
  • نووسینی رۆمانێکی عیرفانی بە ناوی (میدیا) کە هەر زادەی هزریی ئیشراقی و فەلسەفەی سورەوەردییە، لە ساڵی ٢٠٢٠
  • کتێبێکی تر بە ناوی (ئیشراقا فەقێ تەیران) کە لێکۆڵینەوەیەکە بە زاری کرمانجی سەروو، لەبارەی دەقێکی فەقێ تەیرانە بە ناوی (هەی ئاڤ و ئاڤ) لەساڵی ٢٠٢٠ 
  • کتێبی (ئەفسانەی شاماران) لێکۆڵینەوەیەکە لەبارەی ئەفسانەی نایاب و گرنگی شاماران، ٢٠٢١
  • وەرگێڕانی کتێبی (عەوارفی مەعارف)ی  (عومەری سورەوەردی) کە جەرگەی سۆفیگەریی ئیسلامییە و یەکێکە لە کتێبە هەرە گرنگەکانی هزریی سۆفیگەریی میللی و کاریگەری لەسەر جیهانی ئیسلام، زۆر گەورەیە.لە ساڵی ٢٠٢١
  • ئەپیستمۆلۆگی لای سورەوەردی. ٢٠٢١
  • کۆمەڵێ بەرهەمی تریش، ئامادەن و هیوادارم ئەم ساڵە بە چاپیان بگەیەنم، لەبارەی فەلسەفەی ئیشراق و سورەوەردی و کاوێس ئاغا و بابەتی تری گرنگ بۆ بیرکردنەوەی کورد.

نوچەنێت: کێ بە چاپی گەیاندووە؟

هۆشەنگ شێخ محمەد: ئەم کتێبە ئەکادیمیای کوردی بە چاپی گەیاندووە، بە تیراژی ٢٥٠ دانە و ٢٥ دانەیان بە من بەخشیوە.

نوچەنێت: چۆن بوو ئەو بابەتەت هەڵبژراد و لەسەر ئەو بابەتەت نووسی؟

هۆشەنگ شێخ محمەد: ئەو بابەتە بۆ من بۆتە پڕۆژەیەکی هزری و ئەقڵی و روحی و دەروونی، فەلسەفەی ئیشراق بابەتێکی زەروورییە بۆ ئەوەی شارەزای جۆرە بیرکردنەوەیەکی فەلسەفییانەی کوردی و خۆرهەڵاتی ببینین، ئەو مێژووە ئیشراقییە میراتێکی فەلسەفی و سۆفیگەرییە و لە هۆشیاریی کۆمەڵایەتی ئێمەدا، کاریگەرییەکی گەورەی بووە. هەروەها وزەیەکی راچەنیوی تێدایە هاوکاریمان دەکات، خۆماڵییانە بتوانین رامانێکی رەخنەیی پەیدا بکەین. ناوەکییانە تەماشای جیهان بکەین و ئەزموونی ژیان بکەین.

نوچەنێت: گەڕانەوە بۆ ئەو رابردووەی مەعریفە چ خزمەتێک بەتاکی کورد دەکات؟

هۆشەنگ شێخ محمەد: گەڕانەوە بۆ ئەم رابردووە، بۆ ئەوەیە تێبگەین، رابردوو رانەبردووە، زیندووە، بزۆزە، مێژوو تەنیا ماددە نییە، مێژووێکی قودسی و پاک، روحی و دەروونی هەیە، هێنانەوە و لێکۆڵینەوە لەم رابردووە، کۆمەڵێ پنتی تاریکمان بۆ رووناک دەکاتەوە، ئامرازێکیشە بۆ ئەوەی بزانین ئەم سەد ساڵەی مەعریفیمان چ وێران و پڕ کێشە بوو؟! بۆچ نەمانتوانی بیرکردنەوەمان لە هەڵەکردن بپارێزین؟ بۆ نەمانتوانی رەخنە پەیدا بکەین؟ بۆ کەسێیتی رەخنەگر لە رۆشنبیری کوردی پەیدا نەبوو؟ هەروەها چۆن لە هەژموونی بیرکردنەوەی ئەم سی ساڵەی دوای راپەڕین و میتافیزیکە بێکەڵکەکەی دەرباز دەبین؟ دەمەوی خوێنەر ببەمەوە نێوەخۆی، لەکاتێکدا رۆشنبیری کورد بەگشتی، لە دوای شەڕی جیهانییەوە تا ئێستا خوێنەر لەناوەخۆی دەردەکات! ئیدی هیوادارم ئەم کتێبە بتوانێت خزمەت بە ئەقڵ و روحی کورد بکات!.

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین