مەسرور بارزانى: بەیەکەوە دەتوانین رۆڵێکی کاریگەرمان هەبێت لەپاراستن و رێزگرتن لە مافەکانی ئافرەتان
نوچەنێت:
ئەمڕۆ سێشەممە (8/ئادار/2022)، مەسرور بارزانى، سەرۆکى حکوومەتى هەرێمى کوردستان لە وتارەکەیدا گووتیشى، "ئەمڕۆ ئافرەتان لە هەرێمی کوردستان، رۆڵێکی دیار و کارا لە دامەزراوەکانی هەرێمی کوردستاندا دەگێڕن."
ده‌قی وتاری مه‌سرور بارزانی، سه‌رۆكی حكومه‌تی هه‌رێمی كوردستان له رۆژ (8)ـى مارس دا:
به‌ناوی خودای گه‌وره و میهره‌بان
به‌ڕێزان، سوپاسی ئاماده‌بوونتان ده‌كه‌م
خۆشحاڵم كه له‌گه‌ڵتانم
پێش ئه‌وه‌ی ده‌ست به گوتاره‌كه‌ی خۆم بكه‌م، حه‌ز ده‌كه‌م ئاماژه به گوتاری به‌یان عوسمان بكه‌م، پێی بڵێم كه ئێمه چه‌ند شانازیت پێوه ده‌كه‌ین، شانازی به شێره‌ژنی كوردستان ده‌كه‌ین، به هه‌موو دایك و خوشك و خێزان و كچی شه‌هیدانمان ده‌كه‌ین، ئه‌و قوربانییه‌ی ئێوه داوتانه، ئێمه هه‌رچی بكه‌ین ناتوانین قه‌ره‌بووتان بكه‌ینه‌وه، جگه له‌وه‌ی درێژه‌پێده‌ری ئه‌و رێگه پیرۆزه بین و ئێمه‌ش ئاماده‌بین وه‌ك كوڕه شه‌هیده‌كانت گیانی خۆمان له پێناو گه‌ل و نیشتمانمان به‌خت بكه‌ین.
ده‌مه‌وێت ئاماژه به‌وه بكه‌م، ئه‌و هه‌موو غه‌در و زوڵم و ناحه‌قیه‌ی به‌رامبه‌ر به خوشك و دایكانی ئێزدی كرا، ده‌بینین دیسان ئه‌وان به‌رده‌وامن له كاركردن و خزمه‌تكردن، نه‌ك ته‌نیا وره‌یان نه‌ڕووخا، به‌ڵكو وره به ئێمه‌ش ده‌به‌خشن.
خۆشحاڵم كه ده‌بینم چه‌ندین خانمی سه‌ركه‌وتوو لێره‌ن، هه‌ندێكیان باسی خۆیان كرد، زۆرێكشیان ده‌رفه‌تیان نه‌بوو بێنه ئێره و باسی چیرۆكی سه‌ركه‌وتنی خۆیان بكه‌ن له كوردستان، دڵنیام به به‌شداری كارا و زیاتری ئافره‌ت، ده‌توانین كوردستانێكی ئاوه‌دانترمان هه‌بێت.
سەرەتا بە بۆنەی هەشتی مارس، رۆژی جیهانیی ئافرەتان، پیرۆزباییەکی گەرم لە سەرجەم ئافرەتانی کوردستان و جیهان دەکەم، دەستخۆشی لە ئەنجومەنی خانمان و گەشەپێدان و گشت رێکخەرانی ئەم بۆنەیە دەکەم، کە تایبەتە بە رێزگرتن لە رۆژی جیهانی ئافرەتان لە ژێر ناوونیشانی یەکسانی جێندەری ئەمڕۆ، بۆ داهاتوویەکی بەردەوام.
ئاشکرایە ئافرەتانی کوردستان، لە درێژایی مێژووی گەلی کوردستان و لە قۆناغە جیاوازەکاندا، هەمیشە بەشدارییەکی کاریگەریان لە بوارە جیاکانی ژیان و هەروەها خەبات و تێکۆشانی خەڵکی کوردستاندا هەبووە. لە راپەڕین و شۆڕشەکانی گەلی کوردستان، ئافرەتانی پێشمەرگە نموونەی ئازایەتیی و گیانفیدایی و قوربانیدان بوون و لە رووی وڵاتپارێزی و گیان بەختکردن و پارێزگاریکردن لە خاک و نیشتمان شانبەشانی برا پێشمەرگەکان، رۆڵی بەرچاویان هەبووە و بوێری ئافرەتانی کورد، ناوی کوردستانیان بەرزتر کرد.
ئەمڕۆش ئافرەتان لە هەرێمی کوردستان، رۆڵێکی دیار و کارا لە دامەزراوەکانی هەرێمی کوردستاندا دەگێڕن، ئافرەتانی پۆلیس و ئەفسەرەکانی دەزگا ئەمنییەکان، توانیویانە ئاستی لێهاتوویی رۆڵی کاریگەری ئافرەت بسەلمێنن.
بەرزبوونەوەی رێژەی بەشداریی ژنان و ئافرەتانی کوردستانیش له سەرجەم بواره‌كانی ژیاندا، پێشکەوتنێکی بەرچاو و پەیام و ئاماژەیەکی روونی کۆمەڵگەی کوردستان و حکومەتی هەرێمی کوردستانە، بۆ زیاتر برەودان بە بنەماکانی یەکسانی جێندەری و رووبەڕووبوونەوەی هەموو جۆرە توندوتیژی و جیاکارییەك لە دژی ئافرەتان. بۆ نموونە لە کابینەی نۆیەمدا، رێژەی بەشداری ئافرەتان لە پلە باڵاکانی حکومەت و سەرۆکایەتیکردنی زانکۆکان و بەشداریان لە جومگەکانی تری حکومڕانی و بوارە خزمەتگوزارییەکان و کەرتی تایبەتیش بە رێژەیەکی بەرچاو زیادی کردووە.
بێگومان کارکردن بۆ باشترکردنی بارودۆخی ئافرەتان و پاراستنی مافەکانیان و بەهێزکردنی پێگە و بەشداری ئافرەتان لە هەموو کایەکانی ژیان و بەتایبەتی بەڕێوەبردندا، تەنیا ئەرکی حکومەت و دەسەڵاتی سیاسی نییە، چونکە خێزان و سیستمی پەروەردە و رێکخراوەکانی کۆمەڵگەی مەدەنی و زانایانی ئایینی و دەزگاکانی راگەیاندن و ئێمە هەموومان بەیەکەوە، دەتوانین رۆڵێکی کاریگەرمان هەبێت لە پاراستن و رێزگرتن لە مافەکانی مرۆڤ بە گشتی و رەخساندنی دەرفەتی یەکسان لە بەردەم ئافرەتان و پەرەپێدانی تواناکانیان، بۆ ئەوەی رۆڵی کارای خۆیان لە نێو کۆمەڵگەدا بگێڕن. هەروەها پێویستە کار بۆ نەهێشتنی هەموو جۆرە جیاکارییەکی جێندەری بکەین، لە رێگەی دابینکردن و هێنانەئارای زەمینە و ژینگەیەکی سەقامگیر و لەبار بۆ هەموو تاکەکانی کۆمەڵگە. چونکە دەبێ ئافرەتان، بە پێی توانا و لێهاتوویی خۆیانەوە، رۆڵ و پێگەی شایستەی خۆیان هەبێت لە هەموو کایەکانی ژیاندا، بۆ ئەوەی تواناکانی خۆیان بخەنەگەڕ لە پێناو خزمەتکردنی کۆمەڵگەکەیان.
بەداخەوە لە هەرێمی کوردستانیش، وەک زۆر کۆمەڵگەی دیکەدا، دیاردەی نەگریسی توندوتیژی دژ بە ئافرەتان، بە شێوەی جۆراوجۆر هەیە. حکومەتی هەرێمی کوردستان، بە توندی رووبەڕووی هەموو جۆرە توندوتیژییەک دەبێتەوە و پابەندبوونی خۆشی بە پاراستنی مافەکانی ئافرەتان و رووبەڕووبوونەوەی توندوتیژی بە گشتی و بەتایبەتی توندوتیژی بەرامبەر ئافرەتان دووپات دەکاتەوە. لەم پێناوەشدا حکومەت، بەردەوامە لە کارکردن بۆ بنبڕکردن و سنووردانان بۆ ئەم دیاردە نامرۆڤانەیە، لە رێگەی بەهێزکردنی پێگەی ئافرەتان لە ناو حکومەت و کۆمەڵگە و دابینکردنی هەلی كار و جێبەجێکردنی یاساکان و کاراترکردنی ڕۆڵی دادگاکان و دەستگیرکردن و بە سزاگەیاندنی ئەو تاوانبارانەی توندوتیژی ئەنجام دەدەن. لێرەدا بە پێویستی دەزانم بەتایبەتی داوا لە دەزگاکانی ڕاگەیاندن بکەم کە هاوکار بن و ڕۆڵی گرنگ و ئەرێنی خۆیان لە پەرەپێدانی کولتووری یەکسانیی جێندەری و ڕووبەڕووبوونەوەی توندوتیژی بگێڕن و نابێت ببنە سەکۆیەک بۆ هاندانی توندوتیژی و زیاتربوونی دیاردە کۆمەڵایەتییە نەشیاوەکان.
جارێکی دیکە ڕۆژی جیهانی ئافرەتان لە گشت ئافرەتانی کوردستان و جیهان پیرۆز دەکەم و هیوادارم ئافرەتان و کۆمەڵگە بەگشتی، لە ئاشتی و ئارامی و پێشکەوتندا بن و دووربن لە هەموو جۆرە توندوتیژییەک.
جارێكی دیكه سوپاستان ده‌كه‌م.
0 لێدوانەکان
Karla Gleichauf
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
M Shyamalan
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
Liz Montano
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment