سوپای ئێران هەڕەشە لە خۆپیشاندەران دەكات ئێران
كۆماری ئیسلامی ئێران لەسەر چەند ئاستێك دەستی بە دامركاندنەوەی خۆپیشاندانەكانی دژ بە گیان لەدەستدانی ژینا ئەمەینی كردووە، سوپای ئێران لە راگەیێندراوێكدا هەڕەشەی توند لە خۆپیشاندەران دەكات و ئاشكرایكرد، "دەست دەكەن بە رێگری لە دەستدرێژییەكان." ئەوەش بەپاساوی پارێزگارییە لە ئاسایش.

ئەمڕۆ هەینی (23/ئەیلوول/2022) ماڵپەڕی (ئەلعەرەبیە) بڵاویكردەوە سوپای رایگەیاند، "ئەو خۆپیشاندانانە بەشێكە لە ستراتیژیەتی دوژمنانی وڵاتەكەمان و لاوازكردنی سیستەمی ئیسلامی، بۆ رێگری لە پیلانی دوژمنانمان و پارێزگاری لە ئاشتی و ئاسایش رێگە لە خۆپیشاندانەكان دەگرین."

ئەو هەڕەشانەی سوپای ئێران لەكاتێدایە، خۆپیشاندان تاران و شارەكانی تری گرتۆتەوە، لە چەند شارێكیش هێرشكراوەتە سەر بنكەكانی پۆلیس.

سەبارەت بە كوژرانی خۆپیشاندەرانیش ناوەندی مافەكانی مرۆڤ لە ئێران (ICHRI) كە بارەگاكەی لە نیۆركە رایگەیاند، “ژمارەی كوژراوانی خۆپیشاندانەكان گەیشتە (36) كەس لە چەندین شارش خۆپیشاندانەكان بەردەوامە."

لە لایەكی ترەوە دوێنێ پێنجشەممە دەسەڵاتدارانی ئێران لە تاران و ناوچەكانی تر تۆڕی كۆمەڵایەتی ئینیستگرام و واتس ئەپی راگرت، ئەوەش بۆ رێگریكردنی لە پەیوەندی خۆپیشاندەران و بڵاوكردنەوەی چالاكییەكانیان.

رۆژى سێشه‌ممه‌ى (13) ئەم ئەیلوول ژینا ئەمینی تەمەن (22) ساڵ له‌گه‌ڵ خێزانه‌كه‌ى ده‌چێته‌ تاران و له‌وێ له‌لایه‌ن پۆلیسى ئاكار "ئه‌خلاق" به‌ بیانووى پابه‌ندنه‌بوون به‌ حیجاب، توندوتیژى ده‌رهه‌ق ده‌كرێت و بۆیه‌ تووشى بێهۆشى ده‌بێت، دوای سێ رۆژ له‌ نه‌خۆشخانه‌یه‌كى تاران گیانى له‌ده‌ست دا.

مردنی ژینا بووە هۆی سەرهەڵدانی ناڕەزایی تووند لە زۆربەی شارەكانی ئێران و لەسەر ئاستی جیهانیش چەندین رێكخراوی جیهانی دژ بە مامەڵەی دەستەڵادارانی ئێرانی هاتنە دەنگ. 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین