نێچیرڤان بارزانى داواى پێكهێنانى هێزى هاوبه‌ش ده‌كات کوردستانی

نوچه‌نێت

له‌باره‌ى هێرشه‌كه‌ى تیرۆریستانى داعش بۆ سه‌ر پێشمه‌رگه‌ له‌ شه‌وى رابردوودا، نێچیرڤان بارزانى سه‌رۆكى هه‌رێمى كوردستان په‌یامێكى بڵاوكرده‌وه‌ و داوا له‌ په‌رله‌مانى عێراق و حكومه‌تى فیدڕاڵى و هاوپه‌یمانى نێوده‌وڵه‌تى ده‌كات به‌په‌له‌ كار بكه‌ن بۆ پێكهێنانى هێزێكى هاوبه‌ش له‌ هێزى پێشمه‌رگه‌ و سوپاى عێراق له‌ ناوچه‌ ناكۆكى له‌سه‌ره‌كان.

شه‌وى رابردوو له‌ میحوه‌رى رۆژئاواى كه‌ركووك تیرۆریستانى داعش هێرشێكیان كرده‌ سه‌ر لیواى 10ى پێشمه‌رگه‌ و له‌ ئه‌نجامدا سێ پێشمه‌رگه‌ شه‌هید بوون و دووانیش بریندار بوون. ئه‌مڕۆ شه‌ممه‌ یه‌كى ئایار له‌سه‌ر ئه‌م رووداوه‌ نێچیرڤان بارزانى سه‌رۆكى هه‌رێمى كوردستان په‌یامێكى بڵاوكردووه‌ته‌وه‌ و له‌ په‌یامه‌كه‌ى هاتووه‌، "ئێمە چەندین جار حكومەتی فیدرالیی عێراق و هاوپەیمانیی نێودەوڵەتیی دژی داعشمان لە مەترسیی بەهێزبوونەوەی داعش و سوود وەرگرتن لە بۆشاییە ئەمنییەكانی ناوچە ناكۆكی لەسەرەكان ئاگاداركردووەتەوە".

له‌ به‌شێكى ترى په‌یامه‌كه‌ى نێچیرڤان بارزانى ده‌ڵێ، "لێرەدا جارێكی دیكە داوا لە پەرلەمان و حكومەتی فیدرالیی عێراق و هاوپەیمانی نێودەوڵەتیی دژی داعش دەكەین، بەخێرایی كاربكەن لەسەر دروستكردنی هێزی هاوبەش لەنێوان پێشمەرگە و سوپای عێراق دا لە ناوچە ناكۆكی لەسەرەكان".

دەقی پەیامەكەی نێچیرڤان بارزانی، سەرۆكی هەرێمی كوردستان:

كاتژمێر 12:30ی شەوی رابردوو، چەكدارانی گرووپی تیرۆریستیی داعش لە میحوەری رۆژئاوای كەركووكی هێزی پێشمەرگەی كوردستان، هێرشیان كردە سەر سەنگەرەكانی پێشمەرگە لە نزیك گوندی قایەباشی لە سنووری شارۆچكەی پردێی پارێزگای كەركووك، لە ئەنجامدا سێ پێشمەرگە كە بە قارەمانانە بەرەنگاری داعش بوونەوە، گیانیان لەدەستدا و شەهیدبوون. سەرەخۆشی لە بنەماڵەی هەرسێ پێشمەرگەی شەهید دەكەین و هیوای زوو چاكبوونەوە بۆ برینداران دەخوازین.

ئێمە چەندین جار حكومەتی فیدرالیی عێراق و هاوپەیمانیی نێودەوڵەتیی دژی داعشمان لە مەترسیی بەهێزبوونەوەی داعش و سوود وەرگرتن لە بۆشاییە ئەمنییەكانی ناوچە ناكۆكی لەسەرەكان ئاگاداركردووەتەوە. هێرشی شەوی رابردووی داعش لەو میحوەرەی پێشمەرگەدا هاوكات بووە لەگەڵ چەند هێرشێكی دیكەی داعش دا.

لێرەدا جارێكی دیكە داوا لە پەرلەمان و حكومەتی فیدرالیی عێراق و هاوپەیمانی نێودەوڵەتیی دژی داعش دەكەین، بەخێرایی كاربكەن لەسەر دروستكردنی هێزی هاوبەش لەنێوان پێشمەرگە و سوپای عێراق دا لە ناوچە ناكۆكی لەسەرەكان، بۆ ئەوەی چیدیكە ئەو ناوچانە وەك كۆریدۆری جموجۆڵە تیرۆریستییەكان لەلایەن داعشەوە بەكارنەهێندرێت، چونكە ئەوە مەترسییەكی زۆر گەورەیە لەسەر هەرێمی كوردستان و هەموو عێراق و هەڕەشەیە لەسەر ئاسایشی هەموو ناوچەكە و جیهان. هەرێمی كوردستان ئامادەیە بۆ هەموو جۆرە هاوكارییەك لەپێناو دروستكردنی ئەو هاوبەشی و هاوئاهەنگییە بەشێوەیەكی خێرا.


نێچیرڤان بارزانی

سەرۆكی هەرێمی كوردستان
 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین