Nuce Logo

فەلاح مستەفا، ڕاێژکارى باڵاى سەرۆکى هەرێمى کوردستان دەڵێت، پەیوەندیى هەرێمى کوردستان لەگەڵ شانیشینى ئوردنى هاشمى، پەیوەندییەکى لەمێژینەیە، وە بنەمایەکى پتەوى هەیە، بەڵام بۆ بەرەوپێشبردنى زیاترى ئەو پەیوەندییانە و بوونى تێگەیشتنى هاوبەش و ئالۆگۆڕى بیروڕا لەسەر ئەو پرسانەى جێگەى بایەخى هەردوولایە، بۆ نموونە پرسە سیاسییەکان، پرسەکانى پەیوەندار بە ئاسایش و پەرەسەندنەکانى ناوچەکە، ئەو گۆڕانانەى کەوا هاتوونەتە کایەوە، گرنگە بۆ ئەوەى باس بکرێ.

جگە لە خاڵى هاوبەش لە نێوان ئوردن و هەرێمى کوردستان، هەندێک نیگەرانى هاوبەشیش لە نێوان هەردوولادا هەیە.

پەیوەست بە سەردانییەکەى سەرۆکى هەرێمى کوردستان بۆ ئوردن، نیاز بارزانى، بەرپرسى دەرەوە و دیپلۆماسى لە سەرۆکایەتیى هەرێمى کوردستان دەڵێت، نیگەرانییەکان هاوبەش وجددین، بێگومان نیگەرانییەکان خراپبوونى دۆخى ئەمنى و هاتنەکایەى ناسەقامگیرى لەبەرژەوەندى هیچ وڵاتێکدا لە ڕۆژهەڵاتى ناوەڕستدا نییە، بە هەمان شێوەیە لە بەرژەوەندى ئوردن و هەرێمى کوردستان و عێراقیش نییە، بۆیە هەردوولا زۆر لەسەر ئەوە هەماهەنگ و هاوکارن کە دڵنیابن ڕێ لە بەرزبوونەوەى توندوتیژى لە ڕۆژهەڵاتى ناوەڕاست و بەتایبەتى لەو ناوچەیەى خۆمان بگرین.

پەیوەندییەکانى نێوان عێراق و ئوردن تەوەرەێکى دیکەى گفتوگۆکانى سەرۆکى هەرێمى کوردستان و شا عەبدوڵڵاى دووەم بوو. حەیدەر عەرارى، باڵیۆزى عێراق لە ئوردن دەڵێت، سەردانەکەى سەرۆکى هەرێمى کوردستان، پەیوەندییەکانى نێوان ئوردن و عێراقیش بەهێز دەکات و دەشڵێت، سەردانى فەخامەتى بەڕێز نێچیرڤان بارزانى بارزانى، سەرۆکى هەرێمى کورستان بۆ عەممان سەردانێکى گرنگە، پێموایە ڕەنگدانەوەى لە سەر پەیوەندییەکانى عێراق و ئوردن دەبێت لەسەر هەموو ئاستەکانى، ئەمەش سەردانێکى گرنگە و ڕەنگدانەوەى خواستى شکۆدارى شاى عەبدوڵڵاى دووەمە لە تۆکمەکردن و بەرەوپێشبردنى پەیوەندییەکانى عێراقى – ئوردنى، کە ئێمە بەردەوام هەوڵ بۆ پەرەپێدانى پەیوەندییەکانمان دەدەین، بۆ گەیاندنیان بە ئاستێکى بەرزتر، پێمانوایە ئەمە سەردانێکى گرنگە و پشت بە خوا هەوڵدەدەین بۆ ئەوەى زیارت پەرەى پێبدرێت.

دوا بە دواى کۆبوونەوەى دوو بە دووى سەرۆکى هەرێم و شاندى یاوەرى لەگەڵ شا عەبدوڵڵا و چەند وەزیرێکى ئوردن تاوتوێ ورترى پرسەکانى نێوانیان کرد.

هەرێمى کوردستان و شانیشینى ئوردنى پەیوەندیى مێژووى و تێڕوانینى هاوبەشیان لەسەر پرس و ئاڵۆزییەکانى ڕۆژهەڵاتى ناوەڕاست هەیە، لە ڕۆژهەڵاتى ناوەڕاست و ناوچەکەدا پێشهاتى نوێ دێنەئاراوە، بە ڕێگەى سەردانى لەم شێوەیەوە هەردوولا خوازریان بۆچوون و تێڕوانین و شرۆڤەى یەکدى لەسەر پرسە ئاڵۆزەکانى ڕۆژهەڵاتى ناوەڕاست بزانن.

س: رووداو