نێچیرڤان بارزانى: پارێزگارى هه‌ولێر ده‌بێت پارێزگارى هه‌موو پێكهاته‌كانى هه‌ولێر بێت کوردستانی

نوچه‌نێت

ئه‌مڕۆ ئومێد خۆشناو پارێزگارى نوێى هه‌ولێر له‌ به‌رده‌م نێچیرڤان بارزانى سه‌رۆكى هه‌رێمى كوردستان سوێندى یاسایى خوارد و له‌ وته‌یه‌كدا نێچیرڤان بارزانى گوتى، "پارێزگارى هه‌ولێر ده‌بێت پارێزگارى هه‌موو پێكهاته‌كانى هه‌ولێر بێت".

سه‌رۆكایه‌تى هه‌رێم له‌ راگه‌یه‌نراوێكدا باسى له‌ به‌ڕێوه‌چوونى مه‌راسیمه‌كه‌ كردووه‌ و ئه‌مه‌ ده‌قه‌كه‌یه‌تى:


ئەمڕۆ پێنجشەممە، 2021/2/18 بەڕێز نێچیرڤان بارزانى، سەرۆکى هەرێمى کوردستان، فەرمانى هەرێمى بۆ دەستبەکاربوونى بەڕێز ئومێد خۆشناو وەک پارێزگارى تازەى هەولێر ئیمزا کرد. ئینجا لە ڕێوڕەسمێکدا بە ئامادەبوونى بەڕێز ڕێبەر ئەحمەد وەزیرى ناوخۆ، بەڕێز پارێزگارى تازەى هەولێر، لەبەردەم بەڕێز سەرۆکى هەرێمى کوردستاندا، سوێندى یاسایى خوارد.

نێچیرڤان بارزانى: ئەرکى پارێزگارى هه‌ولێر قورسه‌

 

لە وتەیەکدا سەرۆک نێچیرڤان بارزانى، پیرۆزبایى له‌ پارێزگارى تازه‌ى هه‌ولێر کرد و هیواى سه‌ركه‌وتنى بۆ خواست، هەروەها ئاماژەى بەوە دا کە ئەرکى به‌ڕێز پارێزگارى هه‌ولێر قورسه‌، به‌تایبه‌تى له‌م دۆخه‌دا كه‌ كۆمه‌ڵێك كێشه‌ و قه‌یران ڕووبه‌ڕووى هه‌رێمى كوردستان بوونه‌ته‌وه‌. جەختیشى لەوە کردەوە کە پارێزگارى هه‌ولێر ده‌بێ پارێزگارى هه‌موو خه‌ڵكى پارێزگاى هه‌ولێر به‌ هه‌موو پێكهاته‌كانییه‌وه‌ بێت و به‌ یه‌ك چاو سه‌یرى هه‌موو لایه‌نه‌كان بكات.

سەرۆک نێچیرڤان بارزانى هەروەها یادى خوالێخۆشبوو پارێزگارى پێشوو د. فه‌رسه‌ت سۆفى کردەوە کە بە نەخۆشیى کۆڤید_19 کۆچى دوایى کرد، پرسە و سەرەخۆشى لە هەموو ئەو خێزانانەش کرد کە بەهۆى ئەو نەخۆشییەوە، ئازیزانیان لە دەست داوە. بەڕێزیان پارێزگارى شەهید خوالێخۆشبوو فرەنسۆ هەریریشى بەبیر هێنایەوە کە ئەمڕۆ 18ى شوبات، یادى شەهیدبوونیەتى.

سەرۆک نێچیرڤان بارزانى، بەڕێز ئومێد خۆشناوى دڵنیا کردەوە كه‌ هه‌موو هاریكارى و پشتگیرییه‌كى خۆیان و سه‌رۆكایه‌تیى هه‌رێمى كوردستان و حكوومه‌تى هه‌رێمى كوردستانى ده‌بێت بۆ ئه‌وه‌ى له‌ ئه‌ركه‌كه‌یدا سه‌ركه‌وتوو بێت و بتوانێت به‌ باشترین شێوه‌ خزمه‌ت به‌ پارێزگاى هه‌ولێر و هاووڵاتیان بكات.

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین