سەرۆک نێچیرڤان بارزانى: دەبێ هەموو دەرگاکانى دەستوەردانى حیزبى ناو هێزەکانى پێشمەرگە دابخرێت کوردستانی

نوچەنێت:

سەرۆک نێچیرڤان بارزانى، سەرۆکى هەرێمى کوردستان، بۆ کۆبوونەوەى لایەنەکان سیاسییەکان و یەکرێزیى سیاسى ڕایدەگەیێنێت، "زه‌مینه‌یه‌كى باش بۆ نه‌هێشتنى ناكۆكییه‌كان هه‌یه‌."

ئەمڕۆ پێنجشەممە (26/ئایار/2022) نێچیرڤان بارزانی، سه‌رۆکی هه‌رێمی کوردستان، به‌شداری له‌ ڕێوڕه‌سمی ده‌رچوونی خولی (27)ى کۆلێژی سه‌ربازیی دوودا له‌ زاخۆ کرد، تیێدا، "(499) ده‌رچووى پێشمه‌رگه‌ له‌ هه‌موو ناوچه‌كانى هه‌رێمى كوردستانه‌وه‌ مه‌شق و ڕاهێنان و خوێندنى ئه‌كادیمییان ته‌واو كردووه‌ و به‌ پله‌ى ئه‌فسه‌ر له‌ ڕیزه‌كانى پێشمه‌رگه‌دا ده‌ست به‌ خزمه‌ت ده‌كه‌ن."

سەبارەت بە چاکسازییەکانى وەزارەتى پێشمەرگە، سەرۆک نێچیرڤان بارزانى، لە بەشێکى وتارەکەیدا ڕاگەیاند، "هەتا ئێستا هێزى پشتوانى (1) و () لەگەڵ (22) لیواى هێزەکانى یەکەى (70) و (80) گوزارینەوە سەر وەزارەتى پێشمەرگە، ئەو هەنگاوانە زۆر گرنگە، بەڵام ئەوە بەس نییە و پێویستە هەموو هێزى پێشمەرگە ببێتە یەک هێز و هەموو دەرگاکانى دەستوەردانى حیزبى دابخرێت."

سەبارەت بە پەیوەندییەکانى هەولێر – بەغدا، فەرماندەى گشتیى هێزى پێشمەرگەى کوردستان دەڵێت، "داوا له‌ به‌غدا ده‌كه‌م، ئه‌گه‌ر به‌ جددى به‌غدا وه‌ك به‌شێك له‌ عێراق سه‌یرى هه‌رێمى كوردستان ده‌كات. ئه‌گه‌ر به‌غدا هاووڵاتییانى هه‌رێمى كوردستان به‌ به‌شێك له‌ هاووڵاتییانى عێراق ده‌زانێت، ده‌بێ به‌ زووترین كێشه‌كانى ‌نێوان هه‌رێمى كوردستان و به‌غدا، چاره‌سه‌ر بكات. نابێ و دروست نییه‌ هاووڵاتییانى هه‌رێمى كوردستان وه‌ك به‌شێك له‌ هاووڵاتییانى عێراق، هه‌میشه‌ له‌ دڵه‌ڕاوكێدا بن له‌وه‌ى ئاخۆ له‌ عێرقه‌وه ‌مووچه‌یان بۆ دێت، یان نا."

دەقى وتارەکەى سەرۆک نێچیرڤان بارزانى، سەرۆکى هەرێمى کوردستان:

ئاماده‌بوویێن ڕێزدار،

پێشمه‌رگێن قه‌هره‌مان،

فه‌رماندار و مامۆستا و ڕاهێنه‌رێن ڕێزدار،

ده‌رچوویێن خۆشتڤى یێن خولا (27)ێ ‏یا بنەڕەتی ل کۆلیژا سەربازی یا دو ل ‏زاخۆ،

كه‌سوكارێن ڤان عه‌زیزا،

هه‌مى لایه‌ك ب خێر بێن، سه‌ر چاڤا

بخێرهاتنا نێرده‌یێن ولاتێن هه‌ڤپه‌یمان دكه‌م ئه‌وێن كو د شه‌ڕێ داعشێدا هاریكاریا مه‌ كرى. هاریكاریا وان به‌رز دنرخینین و بخێرهاتنا وان دكه‌ین. بخێرهاتنا نێردێن دیپلۆماسى یێن ولاتێن بیانى دكه‌ین ل هه‌ولێرێ. هه‌مى لایه‌ك ب خێر بێن، سه‌ر چاڤا.

خۆشحالم کو ئەڤرۆ ل ڤێرەمە ل زاخۆ ‏دگەل هەوەیێن ڕێزدار، ‏داكو ئەم هەمی ژ دل و پێکڤە ‏پیرۆزباهیێ ل ئێك ب ئێكى وان (٤٩٩) ‏دەرچوویێن خولا (٢٧)ێ بنەڕەتی یا ‏کۆلیژا سەربازی یا دو ل زاخۆ بکەین. ‏

پیرۆزباهیێ ل هەوەیێن خۆشتڤی و ‏دایکوباب و کەسوکارێن هەوە دکەم بۆ ڤێ سه‌ركه‌فتنێ، ته‌مه‌ندرێژ بن، سه‌ركه‌فتى بن بۆ خزمه‌تكرنا ولاتێ خۆ. من دڤێت لێره‌ سه‌ره‌ڕاى پیرۆزباهیێ ل وه‌ هه‌میا، پیرۆزباهییەکا تایبەت ل ‏ئه‌فسه‌ر (ئیلداد ئەبریم یلدەخانی) بکەم، ‏کو تاکە قوتابی و دەرچوویێ مەسیحییە ‏دڤێ خولێدا. ‏

هیڤیدارم خولێن داهاتی هژمارەکا زۆر ‏مەسیحی، تورکمان و هژمارەکا زۆر ‏خوشک و برایێن ئێزدی ژی به‌شدار بن. گەلەك دلخۆش بووم کو ل کۆلیژا ‏سەربازی یا سێ ل قەلاچۆڵان من ‏هژمارەکا دەرچوویێن ئافرەت دیتن. به‌رى نها ژى لێره‌ ئافره‌ت ل ڤان خولێن كو ل زاخۆ هاتینه‌ كرن، ده‌رچووینه‌. هیڤیدارین د خولێن داهاتیدا، هژماره‌كا زێده‌تر و به‌رچاڤتر ل ڤانه‌ ببینین. ‏خۆشحالم کو ئەڤرۆ دبینم دەرچوویێن ‏ڤێ خولێ خەلکێ هەرچار پارێزگەهێن ‏هەرێما کوردستانێ و ده‌رڤه‌ى هه‌رێمێنه‌.

بەشدارییا خەلکێ هەمی ده‌ڤه‌را دڤا ‏خولادا و پێکڤەبوونا وان د یه‌ك جهدا، هاریکارییە بۆ ‏یەکخستن و یەکبوونا هێزا پێشمەرگەیێ ‏کوردستانێ.‏ دەستخۆشییەکا تایبەت ل ڕاگرێ کۆلیژا ‏سەربازی یا دو ل زاخۆ دکەم، هەروەسا ‏دەستخۆشیێ ل هەمی وان مامۆستا و ‏ڕاهێنەرێن سەربازی دکەم ‏کو ب درێژاهییا ڤێ خولێ قوتابی فێری ‏زانست و تەکنیکێن سەربازی کرینە و ‏ڕوحا بلندا پێشمەرگانە فێری قوتابیا كرینه‌ دڤێ خولێدا.‏

سوپاسییا کارێ بەردەوامێ وەزارەتا ‏پێشمەرگەى دکەم بۆ سەرکەفتنا ڤێ ‏خولێ، هەروەسا سوپاسییا هاریکارییا ‏وەزارەتا بەرگرییا عێراقێ دکەم.‏ جهێ دلخۆشیێ یە کو کۆلیژا سەربازی ‏یا دو ل زاخۆ، د ئاستەکێ هەرە بلندایه‌ ‏ل عێراقێ و ژ دەمێ دامەزراندنا وێ ل ‏ساڵا ١٩٩٦ و تا نها (٥٦) خولێن ‏بنەڕەتی و ئەفسەرا ژ ڤێ کۆلیژێ ‏دەرچووینە.‏

دامەزراندن و پێشئێخستنا کارێ کۆلیژا سەربازییا ‏زاخۆ، هەردەم ژ ڕۆژا دامه‌زراندنێڤه‌ جهێ بایه‌خا تایبەتى یا سەرۆک بارزانی بوویە. ئەم ب ‏ناڤێ خۆ و هەوە هەمیا، سپاسییا جەنابێ وى دکەین. هه‌روه‌سا دڤێ ده‌لیڤێدا (60) سالییا پێشمه‌رگاتیا سه‌رۆك بارزانى و خزمه‌تا جه‌نابێ وى بۆ دۆزا ڕه‌ویا كوردستانێ، پیرۆز دنرخینین.

پێشمەرگەیێن قارەمان و خەلکێ ‏خۆشتڤیێ کوردستانێ..‏

ئەڤرۆ ٢٦ی گوڵانێیە و بیرهاتنەکا ‏پیرۆزه‌ د دیرۆکا شۆڕەشدا، شۆڕشگێڕى و به‌رخودانا كوردستانێیه‌. ‏‏٢٦ی گوڵانێ بیرئینانا خۆڕاگری و ‏سەرهلدانەڤا خەباتا پێشمەرگایەتیێیە ‏ل کوردستانێ د ڕۆژەکا گەلەك ‏دژواردا. ‏کەسێن كو وی دەمی گۆتینە دوژمنا، ‏پێشمەرگە مایە و کوردستان دێ هەر ‏مینیت، ئه‌ڤرۆ پشتى ڤان هه‌مى سالا، دیسا ب ڕێز و پێزانینڤه‌ بیرئانینا وان خه‌باتكه‌را، وان دلسۆزا، وان پێشمه‌رگێن قه‌هره‌ڤان دكه‌ین.

سڵاڤ ل هەمی وان قه‌هرەمانێن ڕۆژێن ‏شۆڕەش و خەباتا پێشمەرگایەتیێ ‏دەستپێکری. ‏سڵاڤ ل گیانێ پاک و پیرۆزێ وان ‏قه‌هره‌مانان بیت گیانێ خۆ کریە فیدا، كریه‌ قوربانى ژبۆ ‏مانا کوردستانێ و نەهێلانا دیکتاتۆریه‌تێ و ‏بدەسڤەئینانا ئازادیێ بۆ گەلێ ‏کوردستانێ و هەمی عێراقێ. ‏سڵاڤ ل بیرەوەرییا هەردوو شۆڕەشێن ‏‏٢٦ی گوڵانێ و شۆڕەشا نوى كو بۆ ئازادیێ و خه‌باتێ و به‌رخودانێ و ڕزگاركرنا ملله‌تێ مه‌ ده‌ست پێكر و خه‌بات بۆ كر.‏

گەلەك خۆشحالم کو دڤێ ده‌لیڤێدا لێرەمە، ل زاخۆ، زاخۆیا خۆڕاگر، زاخۆیا شۆڕەشگێڕ. ‏زاخۆ و زاخۆییا، ڕۆلەکێ زۆر کاریگەر و ‏سەرەکی د شۆڕەشا گولانێدا گێڕا، ‏شۆڕەشا گوڵانێ ژی ل ڤێ ده‌ڤه‌رێ ‏دەستپێک و بناغێ سەرکەفتنێ دانا. ‏زاخۆ ژبەرکو ناڤەندەکا سەرەکییا خەباتا ‏پێشمەرگەی بوویە، لەوما ئەڤ کۆلیژە ‏ژی ل ڤێرێ هاتە دامەزراندن.‏

ئامادەبوویێن بەڕێز..‏

هێزا پێشمەرگەیێ کوردستانێ، هێزا ‏پارێزەرا کوردستانێ یە و بەشەکە ژ ‏سیستەمێ بەرگرییێ عێراقێ. ‏لێ لسەردەمێ شەڕێ داعش وەک هێزەکا ‏سەرەکییا بەرهنگاربوونا داعش، بوو ‏بەشێک ژ هەڤپەیمانییەکا نێڤدەولەتی بۆ ‏تێکشکاندن و ژناڤبرنا داعشێ و پاراستنا ئارامییا ‏ده‌ڤه‌رێ و ئازادیێ و ئارامیێ ل جیهانێ.‏

مخابن داعش هێشتا مایە و، هێرشێن ‏وێ زێدە دبن ل هنده‌ك ده‌ڤه‌را، بتایبەتی ژی ‏ل ده‌ڤه‌رێن ناکۆکی لسەر. ‏ڕۆژانە ئەڤ هێرشێن داعش دبنە سەبەبێ ‏شەهیدبوونا خەلکێ ڤان ده‌ڤه‌را و ‏پێشمەرگە و حەشد و سەربازێن سوپایێ ‏عێراقێ. ‏ده‌ڤه‌رێن ناکۆکی لسەر، بووینە بنگەهـ و ‏کۆریدۆرێ تیرۆریستێن داعش و جهێ ‏خۆڕێکخستنا وان، ‏ئەڤە ژی گەفه‌ و مەترسییەکا گەلەك ‏مەزنە بۆ سەر هەرێما کوردستانێ و ‏هەمی عێراقێ، هەروەسا مەترسییە بۆ ‏سەر هه‌مى جیهانێ ژی.‏

زێدەبوونا هێرشێن داعشێ و گەفێن وێ ‏یێن ڕۆژانە لسەر ژیانا گوند و ‏شارۆچکەیێن ده‌ڤه‌رێن ناکۆکی لسەر، ‏ب دیتنا مە پێویستی ب پێکەڤە ‏کارکرنەکا هەمەلایەنە هه‌یە. دڤێت ئەم دڕندەیی و مەترسییا داعشێ ‏کێم نەبینین، ‏چونکى داعشێ کۆمکوژیێن زۆر مەزن ‏بەرامبەر گەلێ مە ئەنجام داینە و ‏چەندین ده‌ڤه‌ر وێران کرینە و بوونە ‏مەترسی بۆ عیراقێ و كوردستانێ و هەمی جیهانێ. ‏

نوکە ژی داعش خودانا هەمان فکر و ‏ئاراستەیا کوشتن و وێرانکرنێ یە. ‏لەوما زێدە كارکرنا پێكڤه‌ یا ‏پێشمەرگە و سوپایێ عێراقێ و، ‏دەستبکاربوونا بلەز و دەمودەست یا ‏هەردوو لیوایێن هەڤبەشێن سوپا و ‏پێشمەرگەی، زۆر پێویستە ل وان ‏ده‌ڤه‌را.‏

دڤی باردۆخیدا دابینکرنا پێداویستیێن ‏پێشمەرگەی، پێشخستنا مەشق و ‏ڕاهێنانا پێشمەرگەی، پێویستییەکا زۆر ‏گرنگە بۆ بەرهنگاربوونا داعش. ‏پێشمەرگه‌ى پێدڤى ب هەمی ‏پێداویستی و تەکنەلۆژیا پێشکەفتی یا ‏سەربازی هەیە.‏

پێشمەرگە هەتا نۆکە ب چەکێ گەلەك ‏سادە، لێ ب فیداکارییەکا مەزن و ‏خوینا خۆ قه‌هرەمانییەکا زۆر نیشاندایە و ‏گەلەك داستانێن مه‌زن د به‌رخودانێدا تۆمار كرینه‌.‌ نۆکە پشتەڤانیکرنا پێشمەرگەی ژلایێ ‏حکوومەتا فیدرالییا عێراقێ و ‏هەڤپەیمانانڤە، زۆر پێویستە، نها گه‌له‌ك پێویستتره‌ ژ جارا. داخوازێ ژ حکوومەتا فیدرالییا عێراقێ و ‏هەڤپەیمانا دکەم پتر هاریکارییا ‏پێشمەرگەی بکەن ب مەشق و ئامێر و ‏چەکێن پێشکەفتی و ڕاهێنانێ.

ئامادەبوویێن خۆشتڤی و لایەنێن ‏سیاسی یێن كوردستانێ..‏

ناڤودەنگ و ڕێزا پێشمەرگەی ئەڤرۆ ل ‏جیهانێ ژ هەمی دەمەکی زێده‌تره‌. بەشدارییا پێشمەرگەی د پاراستنا هەمی ‏پێکهاتەیاندا ژ هەر دەمەکی دیارترە، كو ئه‌ڤه‌ ئه‌و خاله‌ یا كو ئه‌م هه‌مى گاڤا پێ سه‌رفراز و سه‌ربلندین. لێ مانا دەستێوەردانا حزبی د کاروبارێن ‏پێشمەرگەیدا، ڕێگرە ل پێشکەفتنا هێزا ‏پێشمەرگەیێ کوردستانێ.

هەروەسا هەبوونا دەستێوەردانا حزبی ‏وەدکەت بەردەوام مەترسییا وێ چەندێ هەبیت ‏کو پێشمەرگەى بکەنە بەشەك ژ ‏ناکۆکیێن سیاسی یێن حزبان ل هەرێما ‏کوردستانێ، ئەڤە ژی گەفه‌كا زۆر جددییه‌ لسەر پرۆسەیا ‏دیموکراسی و بڕێڤەبرن و یەکێتییا ‏هەرێما کوردستانێ.‏

ژبەر ڤێ چەندێ جارەکا دی ل ڤێرێ وەک ‏داخوازییەکا خەلکێ کوردستانێ، وەک پێویستییەکا نیشتمانی، وەک ‏ئەرکێ خۆ یێ یاسایی، داخوازێ ژ پارتی دیموکراتی کوردستان ‏و یەکێتیی نیشتمانیی کوردستان دکەم دەستێوەردانا حزبی د کاروبارێن ‏پێشمەرگەیدا ڕابگرن و بێی ‏پەشێمانبوون و بێ دودلى، ڤێ ده‌ستێوه‌ردانێ ب دویماهی ‏بینن.‏

هەتا نۆکە هەردوو هێزێن پشتەڤانی یێن ‏‏(1) و (2)، هەروەسا (٢٢) لیوایێن هێزێن ‏‏(70) و (80) کەفتینە سەر وەزارەتا ‏پێشمەرگەی، ئەڤە پێنگاڤەکا گرنگە. ‏ به‌لێ ئه‌ڤه‌ به‌س نییە و دڤێت هەمی ‏هێزا پێشمەرگەی ببیتە ئێك و هەڤدەم ‏هەمی دەرگەهێن دەستێوەردانا حیزبی ‏ژی بهێنە گرتن.

 

سەرۆکاتییا هەرێما کوردستانێ، وەک ‏فەرماندەیا گشتی یا هێزا پێشمەرگەی، ‏هەمی هەولا ددەت و ب تەمامی ‏پشتەڤانیێ ل کارێ وەزارەتا پێشمەرگەی ‏ژی دکەت بۆ یەکخستنا پێشمەرگەی. ‏لێ ژبۆ ڤێ سەرکەفتنێ، ‏دڤێت دویماهیئینان ب دەستێوەردانا هه‌مى لایه‌كى، بتایبه‌تى پارتی و یەکێتیڤه هه‌بیت و ئه‌م ژڤێ قۆناغێ ده‌رباس ببین و هێزێن پێشمه‌رگێ كوردستانێ ببنه‌ ئێك‌ بۆ وێ سویندا وان خارى كو دێ هه‌رتم به‌ره‌ڤانیێ ل كوردستانییا و ل كوردستانێ كه‌ن.

ئەڤە چەند ساڵە وەڵاتێن هەڤپەیمان ‏پلان هه‌یه‌ بۆ ئێکخستنا پێشمەرگەی و ب سپاسیڤه‌ ‏لسەر ڤێ چه‌ندێ كاردکەن، ‏ئەڤە دەرفەت و پشتەڤانییەکا زۆرا مەزنە ‏بۆ پێشمەرگە و گەلێ کوردستانێ. خەلك ‏داخوازا ئێکخستنا هێزا پێشمەرگەیێ ‏کوردستانێ دکەت، نۆکە ئەم دشێین ڤێ ‏پرۆسەیێ ب هاریکارییا هەڤپەیمانا ‏سەربێخین. خه‌لكێ كوردستانێ داخوازا ئێكبوونا هێزا پێشمه‌رگه‌ى دكه‌ت، ‏لەوما داخازێ ژ پەرلەمانێ کوردستانێ ژى ‏دکەم وەک نوینەرێ خەلکی، ب هویری ‏چاڤدێرییا پرۆسەیا ئێكبوونا هێزا پێشمه‌رگه‌ى بکەت.‏

پێشمەرگە دەمێ دروستبووی، بۆ گەلێ ‏کوردستانێ و بۆ پاراستنا کوردستانیا ‏دروست بوو، نە بۆ حزب و پاراستنا حزبا. ‏ئەڤە دەرفەتەکا زێڕینە ‏کو هێزا پێشمەرگەی ب تەمامی ببیتە ‏هێزەکا سەربەخۆ یا دویر ژ دەستێوەردانێ.‏

خەلکێ خۆشتڤیێ کوردستانێ..

ناکۆکیێن ناڤبەرا حزبا ل هەرێما ‏کوردستانێ هوین ماندی کرینە، ‏زیان گەهاندییە بازاڕ و کەسابەتا هەوە و ‏ڕێ ڤەکرییە بۆ مەترسی و فشارێن ‏زێدەتر لسەر هەرێما کوردستانێ. ‏ئەرکێ مەیە بەرامبەری هەوە وەک ‏سەرۆکاتییا هەرێما کوردستانێ کو هەوڵا ‏کۆمکرن و تفاقا ناڤبەرا حزبا بدەین لسەر ‏پرسێن نیشتمانی. ‏

هیڤیدارین د دەمەکێ نێزیکدا گفتوگۆ و ‏ڕێککەفتنا هەمی حزبا ب کریار لسەر ‏ئارمانج و پرسێن سیاسی یێن نیشتمانی ‏ببینین. ‏دەما کۆمبوونێن مە ل سلێمانیێ، مە ‏ئامادەییەکا زۆر باش ژ هەمی لایەنا دیت ‏بۆ پێکڤەڕوینشتن و نەهێلانا ناکۆکییا. ‏نۆکە زەمینە یا گونجاو بۆ گفتوگۆ و ‏ڕێککەفتنا هه‌یه‌. ‏

دوهى كۆبوونه‌كا باش د ناڤبه‌را یه‌كێتیى نیشتمانیى كوردستان و پارتى دیموكراتى كوردستاندا بڕێڤه ‌چوو، ب پشته‌ڤانیا خودێ دڤی ‏ماوەیدا دێ زنجیرەکا کۆمبوونێن دى بینن. ب هیڤیا هندێ كو بگه‌هینه‌ ڕێككه‌فتنه‌كا باش و ئارامیێ و سه‌قامگیریێ و خۆشگوزه‌رانیێ بۆ ملله‌تێ خۆ دابین بكه‌ین. ‏گەلەك پێویستە تاک ب تاکێن گەلێ ‏کوردستانێ ژی پشتەڤانییا ڤێ ئاراستەیێ ‏بکەن و ئەز هەوە پشتڕاست دکەم کو ‏هیچ کێشەیەک نینە ل هەرێما ‏کوردستانێ كو ئەم نەشێین ب ‏پێکڤەڕوینشتنێ چارەسەر بکەین.‏

ئاڵۆزی و نەسەقامگیری ل هەر ده‌ڤه‌ره‌كا ‏عێراقێ، کاریگه‌رى لسه‌ر ڕەوشا هەمی ‏ده‌ڤه‌رێت دی یێن عێراقێ هه‌یه‌. ‏بەرژەوەندی و سەروەرییا مە وەک عێراقی ‏ل هەمی ده‌ڤه‌را هەڤبەش و یەکە. ‏ئەم هەمی و ئەڤ پێشمەرگەیێن ئەڤرۆ ژ ‏ڤێ خولێ دەرچووین و سویند خوارى، ‏تەماشەی سەقامگیری و سەروەرییا كوردستانێ و عێراقێ ڤێكرا دكه‌ین.‏

ناکۆکیێن ناڤبەرا لایەنێن سیاسی ل ‏بەغدا کاریگەرییه‌كا خراب ل هەمی ‏عێراقێ و هه‌رێما كوردستانێ ژى کرییە. ‏ناکۆکیێن ناڤبەرا حزبا ل هەرێما ‏کوردستانێ ژی کێشەیێن زێدەتر بۆ ‏پرۆسەیا سیاسی ل عێراقێ چێكریه‌. ‏هەمی هەوڵێن ڕێککەفتنا سیاسی ل ‏بەغدا و هەولێرێ تەمامکەرێن ئێکن.

نە‌هێلانا ناکۆکیێن ناڤبەرا حزبا ل هەرێما ‏کوردستانێ، بەشەکێ تەمامکەره‌ ژ ‏نەهێلانا چەقبەستنا سیاسی یا ناڤبەرا ‏لایەنێن سیاسیێن هەمی عێراقێ، ‏لەوما دڤێت ئەم هەمی هاریکارێن ‏ئێکودو بین ژبۆ دەربازکرنا ڤێ ‏چەقبەستنا سیاسی.‏

گرانیێ، ئه‌ڤرۆ ژیانا هەمی خەلکێ جیهانێ ‏زەحمەت کرییە. هەبوونا ناکۆکیێن سیاسی و چەقبەستنا ‏سیاسی ل عێراقێ، وەسا کرییە كو ‏خەلکێ عێراقێ زۆرتر بکەڤیتە بن ڤی ‏بارێ گران. ‏لەوما پێویستە هه‌مى هێزێن عێراقى نەرمییەکا زێدەتر بەرامبەر ‏ئێکودو نیشان بدەین، ‏دا ڤەکرنەکا تەمام د پرۆسەیا سیاسییا ‏عێراقێدا دروست ببیت. ‏

ئەم هەمی عێراقینە و بەشەکین ژ ‏عێراقێ، لەوما ژی دڤێت ئەم هەمی ب ‏ڤێ ڕوحێ بەرەف چارەسەرییا کێشەیان ‏بچین ل عێراقێ. دڤێت ئه‌م هه‌مى ڤێكڕا ڕوینین و چاره‌سه‌را هه‌ڤپشك ڤه‌بینین و شكاندن و ئێكودوقه‌بوونه‌كرن دڤێت بدویماهى بێت.

ل ڤێرێ من دڤێت د هه‌مان ده‌مێدا ‏داخوازێ ژ حکوومەتا فیدرالییا عێراقێ و ‏هەمی دەسەڵات و دامەزراوەیێن فیدرالی ‏ل عیراقێ كو بکەم، کو ب چاڤێ تەمامکەر و ‏هەڤبەش به‌رێ خۆ بده‌نه‌ هەرێما کوردستانێ ‏بکەن. ‏چونکی ئەم هەمی ئێکین و، سەرکەفتن ‏و شکەستنێن مە ژی هەڤبەشن. ‏

پاراستن و بەرژەوەندی و پێکڤەژیانا مه‌ ل هه‌مى ده‌ڤه‌رێن عیراقێ وه‌ك ئێكه‌ و ‏ئەرکێ حکوومەت و دامەزراوەیێن ‏فیدرالى یێن عێراقێ یە ب پلەیا ئێکەم. خەلکێ عێراقێ پێویستی ب ئارامی و ‏پێشکەفتنێ یە و ب هیچ شێوەیەکی ‏حەژ کێشەیێن زێدەتر ناکەت. ‏ژبەرهندێ چێنابیت به‌غدا باوه‌ریا وێ ئه‌و بیت كو بێدەسهەلاتکرنا ‏هەرێما کوردستانێ كرداره‌كێ باشه‌. ‏

ئه‌ز لێره‌ داخوازێ ژ به‌غدا دكه‌م، ئه‌گه‌ر ب جددى به‌غدا هه‌رێما كوردستانێ وه‌كى به‌شه‌ك ژ عیراقێ دبینیت، ئه‌گه‌ر به‌غدا هه‌ڤوه‌لاتیێن هه‌رێما كوردستانێ وه‌كى به‌شه‌ك ژ هه‌ڤوه‌لاتیێن عێراقێ دبینیت، دڤێت ب زویترین ده‌م كێشه‌یێن كو دناڤبه‌را هه‌رێما كوردستانێ و به‌غدادا هه‌نه،‌ چاره‌سه‌ر بكه‌ت. نابیت و دروست نیه‌ هه‌ڤوه‌لاتیێن هه‌رێما كوردستانێ وه‌كى به‌شه‌ك ژ عێراقێ هه‌ر هه‌یڤ د دله‌ڕاو‌كێدا بن كا ئایا بودجه‌ دێ ژ عیراقێ بۆ هێت یان نه‌؟!

ئاخفتنا من بۆ ده‌سه‌لاتدارێت عێراقێ ئه‌وه‌ ڤێ مه‌سه‌لێ بدویماهى بینن. ئه‌گه‌ر وه‌ دڤێت و هوین دبینن هه‌ڤوه‌لاتى یێن هه‌رێما كوردستانێ به‌شه‌كن ژ عێراقێ، دڤێت دویماهیێ ب ڤێ فشارێ بینن یا كو ڤێ گاڤێ هند ل به‌غدا تێته‌ سه‌ر هه‌رێما كوردستانێ. ئه‌ز باوه‌ر دكه‌م مه‌ ڤێكڕا ده‌رفه‌تا هه‌ى كو هه‌مى ئاریشه‌ و كێشه‌یان ل سه‌ر مێزا گفتوگۆیا دگه‌ل به‌غدا چاره‌سه‌ر بكه‌ین. مه‌ جددییه‌ت دڤێت، حكوومه‌تا هه‌رێما كوردستانێ یا جددییه‌ ڤا ئارێشا ل سه‌ر مێزا گفتوگۆیێ و ل سه‌ر بنگه‌هێ ده‌ستوورێ عێراقێ چاره‌سه‌ر بكه‌ت.

حه‌ژێكرنا باژێڕێن عیراقێ، حه‌ژێكرنه‌ بۆ هه‌رێما كوردستانێ. خه‌لكێ مویسل، به‌غدا، به‌سرا، ئه‌نبار، كه‌ركووك، هه‌ولێرێ و سلێمانیێ، ئێكودو دڤێت. خه‌لكى چ ئارێشه‌ دگه‌ل ئێكودو نینه‌. خه‌لكى پێنه‌خۆشه‌ و حه‌ز ناكه‌ن ئه‌ڤه‌ یا به‌رده‌وام بیت. هیڤیا من ئه‌وه‌ دویماهیێ ب ڤێ مه‌سه‌لێ بینن و دیسا ب زویترین ده‌م كێشه‌ و ئارێشه‌یێن ناڤبه‌را هه‌رێما كوردستانێ و به‌غدا ب دیالۆگ و ل سه‌ر مێزا گفتوگۆیێ چاره‌سه‌ر ببن.

جاره‌كا دى پیرۆزباهیێ ل هه‌وه‌ هه‌میا دكه‌م، هیڤیا من ئه‌وه‌ سه‌ركه‌فتى بن بۆ خزمه‌تا كوردستانییا، ته‌مه‌ندرێژ بن، وه‌فادار بن بۆ وێ سویندا كو وه‌ خوارى بۆ به‌ڕه‌ڤانیێ ل خاكا پیرۆزا كوردستانێ و هوین هه‌مى لایه‌ك ب خێر بێن سه‌ر چاڤا.

زۆر سپاس.

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین