Nuce Logo

ڕۆژی پێنجشەممە (22/10/2026) ئەنجوومەنی دادوەریی هەرێمی کوردستان ڕایگەیاند، لە ماوەی (17) ساڵی رابردوودا (2009 تاوەکو 2025)، زیاتر لە (812) هەزار گرێبەستی هاوسەرگیری و نزیکەی (158) هەزار جیابوونەوە لە دادگەکان تۆمار کراون و ساڵی (2025) بە تۆمارکردنی (61) هەزار و (328) گرێبەستی هاوژینی و (15) هەزار و (826) جیابوونەوە، ڕیکۆردی بەرزترین ئاستی لە هەردوو بوارەکەدا لە مێژووی هەرێمی کوردستاندا شکاندووە.

بەپێی ئامارەکە لەم ماوەیەدا کۆی گشتیی (812) هەزار و (238) گرێبەستی هاوسەرگیری ئەنجامدراون، لە بەرامبەردا (157) هەزار و (736) جیابوونەوە ڕوویانداوە؛ ئەمەش بەو مانایەیە، کە بە تێکڕا لە بەرامبەر هەر پێنج هاوژینییەکدا، یەک جیابوونەوە تۆمار کراوە.

هاوکات وەک لەم ئامارەدا دەردەکەوێت پێکهێنانی ژیانی هاوژینی راستەوخۆ بەستراوەتەوە بە دۆخی ئابووری و تەناهیی هەرێمی کوردستانەوە، بۆ نموونە کەمترین ئاست لە ئەنجامدانی ئەم پڕۆسەیە ساڵی (2016) تۆمار کراوە، کە تەنیا (32) هەزار و (625) گرێبەستی هاوسەرگیری بووە، ئەمەش هاوکات بوو لەگەڵ سەختیی شەڕی داعش و لووتکەی قەیرانی دارایی لە هەرێمی کوردستاندا. هەروەها بەرزترین ئاستیش ساڵی (2025) بووە بە (61) هەزار و (328) گرێبەستی هاوسەرگیری. 

ئەو گرێبەستە هاوسەرگیرییانەی بۆ ساڵی (2025) کراون و بەگوێرەی پارێزگاکان بەمشێوەیەن، هەولێر (19) هەزار و (620) مامەڵە، سلێمانی (25) هەزار و (678) مامەڵە، ئیدارەی سەربەخۆی گەرمیان سێ هەزار و (66) مامەڵە، دهۆک (12) هەزار و (955) مامەڵە ئەنجام دراون. 

ئاماری جیابوونەوەش بۆ ساڵی (2025) بە گوێرەی پارێزگایەکان بەم شێوەیەن، پارێزگای هەولێر (7113) جیابوونەوە، پارێزگای سلێمانی (5369) جیابوونەوە، ئیدارەی سەربەخۆی گەرمیان (990) جیابوونەوە، پارێزگای دهۆک (2354) جیابوونەوە.