بۆردومانى توركیا ته‌واوى ئه‌ندامانى خێزانێك له‌ رۆژئاواى كوردستان دەکاتە قوربانى کوردستانی

نوچه‌نێت

هێزه‌كانى سووریاى دیموكرات "هه‌سه‌ده‌" رایگه‌یاند به‌ره‌به‌یانى ئه‌مڕۆ له‌ گوندێكى عه‌ین عیسا له‌ رۆژئاواى كوردستان به‌هۆى بۆردومانى تانكه‌كانى سوپاى توركیا ته‌واوى ئه‌ندامانى خێزانێك گیانیان له‌ده‌ست دا.

ئه‌مڕۆ چوارشه‌ممه‌ چوارى ئاب، ماڵپه‌ڕى فه‌رمى هێزه‌كانى سووریاى دیموكرات"هەسەدە" بڵاوى كردووه‌ته‌وه‌، له‌ گوندێكى رۆژهه‌ڵاتى عه‌ین عیسا به‌هۆى بۆردومانى تانكه‌كانى سوپاى توركیا ته‌واوى ئه‌ندامانى خێزانێك گیانیان له‌ده‌ست داوه‌.

ماڵپه‌ڕى هه‌سه‌ده‌ ده‌ڵێ، به‌ره‌بەیانى ئه‌مڕۆ بۆردومانه‌كه‌ کراوه‌ و ئه‌ندامانى خێزانه‌كه‌ له‌ چوار كه‌س پێكهاتوون و ته‌رمه‌كانیان به‌ یارمه‌تى خه‌ڵك له‌ژێر ماڵه‌ رووخاوه‌كه‌یان ده‌رهێنراون و ره‌وانه‌ى نه‌خۆشخانه‌ كراون.

قوربانییه‌كانه‌یش ئه‌مانه‌ن: زه‌ید خه‌له‌ف عیسا، زیاد زه‌ید عیسا، مونا زه‌ید عیسا، هودا زه‌ید عیسا. جگه‌ له‌مانه‌یش هه‌ر به‌ بۆردومانه‌كه‌ى توركیا دایك و كچێك بریندارن كه‌ له‌ هه‌مان خێزانن، به‌هۆى ئه‌وه‌ى برینه‌كه‌یان سه‌خت بووه‌ ره‌وانه‌ى نه‌خۆشخانه‌ى رقه‌ كراون.

له‌ ساڵانى رابردوودا توركیا سێ ئۆپراسیۆنى گه‌وره‌ى له‌ناو خاكى سووریا بۆ داگیركردنى ناوچه‌ كوردییه‌كان ئه‌نجام داوه‌ و له‌ زۆربه‌ى هێرش و ئۆپراسیۆنه‌كانیش خه‌ڵكى سڤیل بوونه‌ته‌ قوربانی، ئه‌مه‌یش له‌لایه‌ن رێكخراوه‌ مرۆییه‌ نێوده‌وڵه‌تییه‌كان توركیاى رووبه‌ڕووى ره‌خنه‌ كردووه‌ته‌وه‌.
 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین