Nuce Logo

بۆریس جۆنسۆن و نێچیرڤان بارزانى بە ئەنیشک سڵاوى خۆپارێزیان لە یەکترکردوو و دواتر بۆ کۆبوونەوە چوونەژوورەوە.

بۆریس جۆنسۆن بە گێڕانەوەى بیرەوەرى سەردانى ساڵى (2015)ى خۆى بۆ هەولێر گفتوگۆکەى کردەوە و گووتى، "نێچیرڤان بارزانى باشترینە، فەرموون لێرە دابنیشین، دڵخۆشم بە بینینتان لێرە، زۆر خۆشحاڵم"، بۆریس جۆنسۆن لە ئۆفیسى تایبەتى خۆى، بەردەوام لە قەسەکانى و سەرێکى وەرگێرا بۆ لاى میدکاران گووتى،"کوا میدیاکان؟!"، دواتر ڕووى لە سەرۆک نێچیرڤان بارزانى کرد و گووتى، "زۆر خۆشحاڵم بەبینینیتان، ماوەیەکى زۆرە ئێوەم نەبینیووە، من دەمەوێ ئێوە ئەوە بزانن کە پەیوەندیى بەریتانیا لەگەڵ ئێوە ئێجگار گرنگە، ئێمە ئەو پەیوەندییە ڕاستەوخۆ و پەیوەندییە ئابوورییە ڕوو لەزیادبووەکەمان بەرز دەنرخێنم، لەبیرمە کە لە هەولێر بووم، ویستم ئۆتۆمبێلێکى جۆرى جاگوار لاندرۆڤەر لێبخوڕم، ئێوە گەورەترین پێشانگاى جاگوار لاندرۆڤەرتان لەو بەشەى جیهاندا هەبوو."

نێچیرڤان بارزانى و بۆریس جۆنسۆن لە کۆبوونەوەکەیاندا باسیان لە زۆر بابەت کرد، کە جێگەى بایەخى هەردوولا بوون و ویستى خۆشیان بۆ پەرەدان بە پەیوەندییەکانى نێوان هەولێر و لەندەن دوپاتکردەوە.

نێچیرڤان بارزانى، سەرۆکى هەرێمى کوردستان لە لەندەن بە ڕۆژنامەنووسانى ڕاگەیاند، "لە کۆبوونەوانە بەشێوەیەکى گشتى، ئێمە بارودۆخى عێراق، هەڵبژاردنەکان، چۆنیەتى پێشخستنى پەیوەندیى نێوان هەرێمى کوردستان و بەریتانیامان تاوتوێکرد، هەم لەگەڵ سەرۆک وزیران و لەگەڵ بەرپرسانى تر، وە ئێمە هیوادارین بتوانین کە ئەم پەیوەندییە بەرەوپێشەوە ببەین، بابەتى داعش مەسەلەیەکى ئەساسى کۆبوونەوکانى ئێمە بوو، وە هەروەها چۆنیەتى بیرکردنەوە لەوەى کە ئێمە چۆن بتوانین پەیوەندیى ئابوورى و بازرگانى خۆمان لەگەڵ بەریتانیا بەرەوپێشەوە ببەین."

کۆنسوڵى گشتیى بەریتانیا لە هەولێر، کۆبوونەوەکەى نێوان سەرۆک وەزیرانى وڵاتەکەى و سەرۆکى هەرێمى کوردستان، بە ساتێکى پڕ بایەخ لە پەیوەندییەکانى نێوان هەردوولا ناودەبات و باڵیۆزى بەریتانیاش لە عێراق گووتى، کۆبوونەوەکە نایاب بوو، دەشڵێت، "ئەمە پەیوەندییەکى لەمێژینە و مێژووییە، بۆ نموونە (30) ساڵ لەمەوبەر ئۆپراسیۆنى دابینکردنى ناوچەى دژەفڕین بەڕێوەچوو، پەیوەندییەکە ئەمڕۆش بەردەوامە لە ڕێگەى پێشکەشکردنى پاڵپشتى لە چوارچێوەى هاوبەشى ستراتیژی لە نێوان عێراق و بەریتانیا، ئێمە پابەندین بە پێکەوە کارکردن لە بوارى ئەمنى، ئابوورى و بازرگانى و بوارەکانى دیکە، ئەمڕۆ هەردوو سەرۆک گفتوگۆیان لەسەر چۆنیەتى بەرەوپێشبردنى ئەو پەیوەندییانە کرد."

لە سێیەم و کۆتاڕۆژى گەشتە دیپلۆماسییەکەیدا، سەرۆکى هەرێمى کوردستان لەگەڵ نەدیم زەهاوى، وەزیرە بەڕەچەڵەک کوردە تازە دەستبەکاربووەکەى وەزارەتى پەروەردەى بەریتانیا کۆبووە و پیرۆزبایى پۆستە نوێیەکەى لێکرد.

هەروەها لە کۆتا وێستگەى سەردانەکەیدا نێچیرڤان بارزانى بە هەلیکۆپتەر سەردانى ئەکادیمیاى سەربازیى شاهانەى ساندهێرستى بەریتانى لەدەرەوەى شارى لەندەن کرد و لەوێش دوو کچە ئەفسەرى کورد کە مەشق و ڕاهێنانى سەربازی وەردەگرن خەڵاتکرد و هیواى خواست کە دەرفەت بەرەخسێت بۆ ئەوەى لە وەزارەتى پێشمەرگەوە خەڵکى زیاتر بۆ ئەو ئەکادیمیایە بنێدرێت.