ئەمنیدارى وەزارەتى پێشمەرگە: هاوپەیمانان گلەییان هەیە و وەک یەک هێز مامەڵەمان لەگەڵ دەکەن کوردستانی

نوچەنێت:

لیوا ڕوکن بەختیار محەمەد، ئەمینداری گشتی وەزارەتی پێشمەرگەی هەرێمی کوردستان ئاشکراى دەکات، پەیوەندیی تیمى وەزارى پارتى و یەکێتى لەم وەزارەتە لە دۆخێکى خراپ دایە و بڕیارى دابەشکردنى پۆستەکان بە سیستەمى (57%) بە (43%) هۆکارى سەرەکی ئەو کێشەیە.

ئەمڕۆ یەکشەممە (30/تەمموز/2023) لیوا ڕوکن بەختیار محەمەد، ئەمینداری گشتی وەزارەتی پێشمەرگەی هەرێمی کوردستان بەدەنگى ئەمەریکاى ڕاگەیاند، پەیوەندی نێوان تیمی یەکێتی و پارتی لە ناو وەزارەتی پێشمەرگە پچڕاوە و وەزعێکی زۆر خراپە.

وتیشی، بریکاری وەزیری پێشمەرگە فەرمانێکی دەرکردووە و وتویەتی، دەبێت پشکی یەکێتی و پارتی لە وەزارەتی پێشمەرگە (57٪) بۆ پارتی و (43٪) بۆ یەکێتی بێت، منیش بە نووسراوی فەرمی وەڵامم دایەوە، ئەو دەسەڵاتەی نییە بڕیارێکی لەو جۆرە بدات و (50) بە (50) کاتی خۆی و لە دۆخێکی سیاسیدا بڕیاری لێدراوە.

لیوا روکن بەختیار محەمەد نایشارێتەوە، بڕیارەکەی بریکاری وەزارەتى پێشمەرگە کاریگەریی لەسەر پەیوەندی نێوان یەکێتی و پارتی و هێزەکانی (70) و (80)ش دەبێت، کاریگەریشی لەسەر جێبەجێکردنی یاداشتی لێکتێگەشتن دەبێت کە بە سەرۆکی حکومەت و جێگرەکەی و وەزارەتە پەیوەندییدارەکان و هاوپەیماناناوە، هەشت لایەن واژۆی کردووە.

سەبارەت بە هەڵوێستى هاوپەیمانان ئەمینداری گشتی وەزارەتی پێشمەرگە ئاماژەى بەوەکرد، هاوپەیمانان وەکو کورد و یەک هێز دەیانەوێت مامەڵەمان لەگەڵ بکەن، کێشەکە ناو خۆمانە لای ئەوان نییە، ئەوانیش گلەییان هەیە.

دەشڵێت، چارەسەرکردنى کێشەکانى وەزارەتى پێشمەرگە بە دانانی وەزیرێک و ڕێگرتنە لە شۆڕبوونەوەی ناکۆکی سیاسی بۆ نێو وەزارەتی پێشمەرگە، هەروەک دووپاتى دەکاتەوە، دەبێت بگەڕێینەوە بۆ جێبەجێکردنی یاداشتی لێکتێگەشتن و کاری پێکەوەیی، نەک تاکڕەویی.

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین