Nuce Logo

ئامادەكردنی: ئیسماعیل تەها

هەرچەندە جەنگەكان لە رووكەشدا لە پێناو دوورخستنەوەی دوژمن و سەپاندنی هەژموون بێت، ئەوەندەش لەپێناو بیروباوەڕە، بەهێزترین بیروباوەڕیش بیروباوەڕی ئایینییە، کۆماری ئیسلامی ئێران گوتارێکی سیاسی ــ ئایینی پەیڕەو دەکات کە لەسەر بنەمای تێڕوانینی مەزهەبی شیعە بۆ کۆتایی زەمان داڕێژراوە.

لە ناو دەوڵەتی ئیسرائیل چەندین رەوتی جیاوازی تێدایە، یەكێكە لەوانە ئەو رەوتە رادیكاڵەیە، بڕوایان بە خاكی بەڵێنپێدراو (ئیسرائیلی گەورە) هەیە، ئەو رەوتە كار بۆ دەستبەسەرداگرتن دەكات.

ئەو رەوتە پێیانوایە ئەوان گەلی هەڵبژێردراوی خودان، خوای گەورە بەڵێنی ئەوەی پێداون كە دەبێت دەسەڵاتی تەواویان بەسەر گەلانی جیهاندا هەبێت، خاكەكانی ئەو ناوچەیە لە مێژوودا خاكی باب و باپیرانیانە، بۆیە دەبێت بگەڕێنەوە سەر خاكی خۆیان، بۆ ئەوەش ئامادەن هەموو رێگەیەك بەكاربهێنن، هەڵگیرسانی جەنگ رێگەیەكە بۆ هاتنەدی ئەو بەڵێنە خوداییە، هەر ئەوەش وایكردووە، هەندێك لە جووەكان لە ناوەوە و دەرەوەی ئیسرائیل بۆچوونی جیاوازیان هەبێت. 

ئەگەرچى لەو جەنگە ئێران و ئیسرائیل کاراکتەرى سەرەکى جەنگەکەن، بەڵام ئەمەریکا وەک زلهێز بەشێکە لەو جەنگە پاڵپشتى تەواوى ئیسرائیل دەکات، گوتارى بەرپرسانى ئەمەریکا هاوشێوەى گوتارى سیخناخە بە باگراوندى ئاینى.

ناوی ئۆپراسیۆنە سەربازییەكان لە دیدی جوو

ئیسرائیل وەک بەشێک لە بەرێوەبردنى جەنگ مامەڵە لەگەڵ ناوى جەنگ و ئۆپراسیۆنە سەربازییەکانى دەکات، ناوەکان لە دیدى ئیسرائیل تەنیا رێکارێکى تەکنیکى ئیداریى نییە، بەڵکوو لە ئەدەبیاتەکانى سەربازیى ئاماژە بەوە دەکەن، کە ناوى هەر ئۆپراسیۆنێک ئەرکێکى گرنگى پەیوەندى جەنگ بە رابردوویان بەڕێوەدەبات.

گریگۆرى سیمینسکى، لێکۆڵەر دەڵێت، ناوى ئۆپراسیۆنى سەربازیى ئامرازێکە بۆ بەهێزکردنى رایگشتى گشتى و ئاراستەکردنى تێڕوانینى  سیاسى سەبارەت بە دەستوەردانى سەربازیى و ئامانجەکانى.

ئەوەش وایكردووە كە سوپاکان سووربن لەسەر هەڵبژاردنى ناوى کورت و روون، بە جۆرێك تواناى درووستکردنى وێنەیەکى دیاریکراوى هەبێت، رەنگدانەوەى ئامانجى گشتى ئۆپراسیۆنەکە بێت، بەبێ ئاشکراکردنى وردەکارییەکانى ئۆپراسیۆنەکان، چونكە لە ئیسرائیل ناوى جەنگ و ئۆپراسیۆنەکان رەهەندێکى سیاسى و ئیعلامى روونى هەیە. 

لەو کاتەوەى سوپاى ئیسرائیل دامەزراوە، سوورە لەسەر پێدانى ناوێکى سیمبوڵى بە جەنگەکانى، چونکە ئەو ناوە دەبێت بە بەشێک لە گوتارى گشتى ئەو جەنگە.

رۆژنامەى مەعاریفى ئیسرائیلى بڵاوى کردەوە، ناوى ئۆپراسیۆنە سەربازییەکانى ئیسرائیل وەک، ئۆپراسیۆنى قادش (1956) و پاسەوانى شووراکان (2021) هەڵگرى دەلالەتى مێژوویى و کلتووریى ئامانجدارن، زۆربەى جار چیرۆکەکانیان لە تەوڕات یاخود لە خاکى ئیسرائیلەوە وەرگیراوە، ئامانج لەو هەڵبژاردنانەش بەستنەوەى ئۆپراسیۆنە سەربازییەکان بە ناسنامەى نەتەوەیى ئیسرائیل و بەستنەوەیان بە چیرۆکێک کە دەبێتە هۆى قووڵکردنەوە لە یادگەى جەماوەریى.

جەنگى دژ بە ئێران و گەڕانەوەى مەسیح 

هاوشێوەى ئیسرائیلییەکان بەشێك لە بەرپرسانى ئیدارەی ترەمپ لەو جەنگە، بایەخى تەواو بە دەرخستنى باگراوندى ئاینییان دەدەن، پیت هیگسیس، وەزیرى جەنگى ئەمەریکا رایگەیاند، نابێت سیستەمێکى توندڕەوى وەک ئێران ــ کە بە وەهمى ئیسلامى ناوى دەبات ــ چەکى ئەتۆمى هەبێت، هەروەك بەشێكیش سەرکردە سەربازییەکانى ئیدارەی دۆناڵد گوتارى جۆراوجۆر پێشکەش بە سەربازەکانیان دەکەن.

یەکێک لە سەرکردەکان ئەفسەرەکانى هان دەدا کە ئەو جەنگە بەشێکە لە پلانى خودا، پاشان لەبەردەم ئەفسەرەکان بەڵگەى بە دەقێکى ئینجیل دەهێنێتەوە، کە باس لە جەنگى هەرمجیدون و گەڕانەوەى مەسیح دەکات، جەخت لەسەر ئەوەش دەکاتەوە، کە دۆناڵد ترەمپ، سەرۆکى ئەمەریکا لە لایەن پەروەردگارى یەسوعەوە رێگەى پێدراوە بۆ هەڵگیرسانى ئەو جەنگە لەگەڵ ئێران بۆ ئەوەى ببێتە خاڵى سەرەتاى هەڵگیرسانى جەنگى هەرمەجیدون، پاشان گەڕانەوەى یەسوعى بۆ زەوى بەدواوە دێت.

بەلاى زۆرینەى مەسحییە ئینجلییەکانى ئەمەریکا، جەنگەکانى رۆژهەڵاتى ناوەڕاست بەشێکە لە گێرانەوەى ئاینى کۆتایى دنیایە، ئەو ریوایەتە دینیانە جەنگێکى بەڵێپێدراوى خودایی لەگەڵ خۆى هەڵگرتووە، کە چاوەڕوانى دەکەن، ئەوەشە بۆتە هاندەرى هەڵگیرسانى جەنگ لەگەڵ ئێران. 

بەگوێرەى راپرسییەکى ناوەندى پیو لە (2022) نزیکەى (39%) ئەمەریکیەکان بەگشتى و لە (47%) لە پڕۆتستانتى ئینجلیى گوتوویانە، ئێمە لە کۆتایی دنیا دەژین، لەو کاتەوەش ئەو رێژەیە زۆر زیادى کردووە، کە هاوکاتە لەگەڵ بەهێزبوون و بڵاوبوونەوەى زیاترى گوتارى کۆتایی دنیا.

ماڵپەڕى (زە ئینترسیت)ى ئەمەریکى ئاماژە بەوە دەکات، دەیان فەرماندەى سەربازیى ئەمەریکا پێیانوایە ئەو جەنگەى دژ بە ئێران رێگەى گەڕانەوەى مەسیحە.

بەگوێرەى راپۆرتێکى رۆژنامەوانى دامەزراوەى ئازادییە ئاینییە سەربازییەکان، کە بارەگاکەى لە ویلایەتى نیو مەکسیکۆیە، زیاتر (200) سکاڵاى لە لایەن ئەفسەران و سەربازان بەدەست گەیشتووە، کە سەرکردەکانیان بۆ پاساوهێنانەوە بۆ ئەو جەنگەى دژ بە ئێران گوتارێکى توندڕەوانەى مەسیحى بەکار دەهێنن، بەڵگەش بە پێشبینییەکانى کۆتایی دنیا و سیفرى روئیا لە پەیمانى نوێى کتێبى پیرۆزى مەسحییەکان دەهێننەوە.

لە یەکێک لەو سکاڵایانە هاتووە، بەرپرسێکى سەربازیى بە ئەندامانى یەکەى سەربازیى راگەیاندوو، کە ئەو جەنگە، "بەشێکە لە پلانى خودایى" وەک ئاماژە بە جەنگى هەرمەجیدون و نزیکبوونەوەى گەڕانەوەى مەسیح.

میکى وینشتاین، سەرۆکى دامەزراوەکە دەڵێت، هەر جارێک ئەمەریکا یان ئیسرائیل دەستوەردانیان لە رۆژهەڵاتى ناوەڕاست کردبێت، چەندین شتمان بۆ دەرکەوتووە، کە بەهۆى باڵادەستى مەسحییەکانى ناو حکومەت و سوپاى ئەمەریکایە. 

ئامارى ناوی جەنگەكانی ئیسرائیل

دەیڤید گیبرئیلی لە لێکۆڵینەوەیەک شیکارى بۆ (81) ناوى ئۆپراسیۆنەکانى ئیسرائیل کردووە، بە گوتەى ئەو لێکۆڵەرە، لەو ژمارەیە (38%) ناوەکانیان لە کتێبى موقەددەس وەرگیراوە، هەروەها نزیکەى (27%) ناوەکان لە سروشت و ئاژەڵان وەرگیراوە، ئەوەش رەنگدانەوەى ئەو ئاراستەیە کە هەوڵێکە بۆ کەمکردنەوەى وێنەى توندوتیژى جەنگ، لە چوارچێوەى بەکارهێنانى سیمبولى کلتوورى، یاخود سروشتى، کە مۆرکى بەریەککەوتنى کەمترە.

ئۆپراسیۆنی ئیسرائیل

ئۆپراسیۆنی ئیسرائیل بە ناوى "نەڕەى شێر"ە گوتارەکەى بنامین ناتەنیاهۆ، سەرۆک وەزیرانى ئیسرائیل رەهەندە سەربازییە راستەوخۆکانى تێپەڕتاندووە، چۆتە ناو بازنەى رەمزە قووڵە ئاینی و نەتەوەییەکان.

هەڵبژاردنى دەستەواژەکان لە سیفرى عامووس لە بەکارهێنانى “نەڕەى شێر” وەک رەمزێکى هەڕەشە ئامێزێکى خودایى بۆ یەکلاکردنەوەى یەکجارەکى ئەو جەنگە دەگەڕێتەوە، لە دەقێکى ئاینیش نەڕەى شێر بە ئایدیایەک دەبەستێتەوە، کە دەنگەکە پێش کردارەکەیە، هۆشدارى پێش وەشاندنى گورزە، هێنانى ئەو سیمبوولە چوارچێوەیەکى هاوچەرخى سەربازیى و پێدانى رەهەندێکى لاهوتییە بە ئۆپراسیۆنى سەربازیی، وەک ئەوەیە ئەو ئۆپراسیۆنە تەنیا هەنگاوێکى ستراتیژى نەبوو، بەڵکوو درێژەپێدەرى گێرانەوەیەکى موقەددەسى مێژووییە.

هەروەک دووبارە بەکارهێنانى ئەو دەستەواژەیە، "ئیسرائیل مەترسە، تۆ بەچکە شێرى" گێرانەوەى رەمزێکى تەوڕاتى زۆر کۆنە، کە نەوەیەکى یەهودا لە سیفرى تەکوین (49:9) بە بەچکە شێر دەبەستێتەوە.

ئەو رەمزە بۆتە بەشێک لە خەیاڵدانى نەتەوەیى جوو، کە بەو بەواتایەى قەوارەى ئیسرائیل میراتگرێکى مێژوویی هێزى یەهودایە.

بەکارهێنانى دەستەواژەى "بێچووە شێر" لە گوتارى زەمەنى جەنگ بەهێزکردنى وێنەى ئەو وڵاتەیە کە تواناى دەستپێشخەرى و هێرشى هەیە، تەنیا پشت بە بەرگرى نابەستێت، هەستى هەمووان بەهێز دەکات کە تواناى مێژووییان نەک بژاردەى سیاسى راگوزەر.

ئەو گورزە هاوکات بوو لەگەڵ جەژنى بوریم ئەوەش رەمزێکى دیکە بوو، بوریم زیندووکردنەوەى یادى رزگاربوونى جووە لە پیلانى کۆمەڵکوژیان لە ئیمپراتۆرى فارسى، هەروەک لە سیفرى ئەستیر هاتووە کە هامان ستەم کارى فارسى شکستى هێناوە.

ئامانج لە هێنانەوەى لەو بۆنەیە لە ململانێ لەگەڵ ئێران کە میراتگرى مێژوویى جوگرافیاى فاسە، درووستکردنى هاوسەنگییەکى روونە لە نێوان رابردوو و ئێستا، هەروەها دەرخستنى ئەوەشە کە ئەو شەڕە حەلقەیەکە لە ململانێیەکى چەندین سەدەیى.

شکاندنى کەوانەکەى ئیلام 

یەكێك لەو بنەمایانەی رەوتی رادیكاڵی ئیسرائیل پەیڕەوی دەكەن، پێدانی لێكدانەوەی سیاسیە بۆ دەقە ئاینییەكان، هەوڵیان داوە ئەو لێكدانەوانە بە تەواوی بخەنە خزمەت ئامانجی سیاسی خۆیان، دەقە ئاینبیەكان دەكەنە هانەدەرێ بۆ بڕیارە سیاسییەكانیان، لە مانگى حوزەیرانى (2025) کەسایەتییەکى ئیسرائیلى لە تۆڕى کۆمەڵایەتى ئاماژە بە دەقێک  دەكات لە سیفرى ئەرمیا سەبارەت بە پێشبینى ئیلام هەیە، کە لە سیحاحى چل و نۆیە، وەک ئەوەیە بڵێت، جەنگى داهاتوو لەگەڵ ئێران لە پرسى کات زیاتر نییە، کاتێک دەگەڕێیەوە بۆ ئەو دەقە لە کتابى موقەددەس، وەک ئەوەیە بڵێت، پەروەردگارى سەربازەکان کەوانەکەی ئیلام دەشکێنم، کە هێزی یەکەمی ئەوان بوو، چوار با لە دوورایى ئاسمانەکانەوە دەهێنمە سەر ئیلام، پاشان بۆ ئەو هەموو بایانە پەرش و بڵاویان دەکەمەوە، هیچ نەتەوەیەکى دەربەدەری ئیلام نایەتە ئەوێ. ئیلام لەبەردەم دوژمنەکانیان و ئەوانەی بەدوای ژیانی خۆیاندا دەگەڕێن دەلەرزێنم، تووڕەییم بەسەریاندا دادەهێنم، تەختەکەم لە ئیلام دادەنێنم و پاشا و میرەکانیان لەناو دەبەم.

ئەو دەقە ئاینییە وێنەى چرکەساتى داڕوخانى هێزێکى سیاسى و سەربازیى لە رۆژهەڵات دەکات لەگەڵ هەڵوەشاندنەوەى وڵاتێک و پەرتبوونى دانیشتوانى، پاشان ئەگەرى گەڕانەوەى دەبێت لەدواى قۆناغى کەوتن.

جوگرافیاى ئیلام بەشێکە لە خاکى ئێران، لە رووى مێژووییەوە دەکەوێتە بەشى باشوورى رۆژئاواى ئێران لە چوارچێوەى ناوچەیەک کە ئەمرۆ کەوتۆتە ناو هەرێمى خوزستان لە ئێران، ئیلام پێکهاتووە لە یەکێک لە شانشینە گرنگەکان لە رۆژهەڵاتى دوور لە هەزارەى دووەمى پێش زاین، هەژموونى بۆ ناوچەکان لە ئێرانى ئێستا و بەشەکانى عێراق درێژ دەبۆوە، شارى سوسە ناوەندى سیاسى و پایتەختى سەرەکى بوو، بەکارهێنانى دەستەواژەى شکاندنى کەوانەکەى ئیلام بەوە شرۆڤە دەکرێت کە تێکشاندنى ناوەندى هێزى سەربازیى دەوڵەتە.

 لە سوپاکانى کۆن لە رۆژهەڵات کەوان، رەمزى جەنگە، ئیلام بە لێهاتوویە لە تیرهاوێژتن ناسراوە، بۆیە بەکارهێنانى ئەو دەقە لەو وێنەیە گوزارشتنە لە تێکشاندنى تواناى سەربازیى.

باسکردنى چوار با ئاماژە بۆ پەرشوبڵاوى سیاسى و مرۆیى، واتا دەوڵەت هەڵدەوەشێتەوە و دانیشتوانەکەى بۆ چەند ناوچەیەک دابەش دەبێت، لە ئەدەبى هەواڵدان بە زۆرى ئەو وێنەیە گوزارشتە لە کۆتایى دەسەڵاتێکى فەرمانڕەوا، کە خاوەن هێزێکى دیارى سەربازیى بووە لەو ناوچەیە.

لە پاڵ ئیسرائیل بەرپرسانى ئەمەریکا راشکاوانە ئەو جەنگە بە جەنگى ئاینى ناو دەبەن، لیندسى گراهام، سیناتۆرى دیارى کۆمارییەکان دەڵێت، ئەو جەنگ جەنگێکى ئاینییە، داهاتووى رۆژهەڵاتى ناوەڕاست بۆ هەزار ساڵ دیارى دەکات.

گراهام جەخت لەسەر ئەوەش دەکاتەوە، کە ئەوەى روودەدات چرکەساتێکى یەکلاکەرەوەیە لە مێژووى ئەو ناوچەیە، دەشڵێت، ئەو جەنگە بەرەنگاربوونەوەى تیرۆرستانى ئیسلامییە توندڕەوەکانە، کە دەیانەوێت هەموو جوو بکوژن.

مایک هاکابى، باڵیۆزى ئەمەریکا لە ئیسرائیل رایگەیاند لە داهاتوو دەسەڵاتى ئیسرائیل بە بەشتبەستن بە تەفسیرە ئایینییەکان بە، "پەیمانى کۆن" کاریکى قبووڵکراو دەبێت. 

لە بەشێکى دیکەى قسەکانى گوتى، ئەگەر ئەوە بێتەدى، کارێکى باش دەبێت، یان قبووڵ کراو دەبێت، ئەوە واتاى ئەوە ناگەینێت کە ئێستا ئیسرائیل بە کردەیى هەوڵیى ئەو کارە دەدات.

گەڕانەوەی مەهدی و عیسا لە فیكری سوننە و شیعەدا

سەرچاوەی موسڵمانان یەك دەنگن لەسەر ئەوەی كە پێغەمبەر بە ئومەتەكەی گوتووە، كە لە كۆتایی دنیا مسوڵمانان لە فەڵەستین شەڕ لەگەڵ جوو دەكەن.

گەڕانەوەی عیسا لە فیكری سوننە

هاتنی مەهدی و دابەزینی عیسا بەشێكە لە پێكاتەی فیكری عەقائیدی لە لای مسوڵمانانی سوننە، گەورەترین نیشانەی كۆتاییهاتنی ژیانی دنیا، دابەزینی ئەو نیشانەیە راستەوخۆ پەیوەندی بە جەنگ لەگەڵ جوو هەیە، لە فەرموودەیەكی پێغەمبەر هاتووە، "يقاتل المسلمون اليهود، فينصرون عليهم، حتى يقول الشجر والحجر: يا مسلم، يا عبدالله، هذا يهودي تعال فاقتله"

موسڵمانان شەڕ لەگەڵ جوو دەكەن، بەسەریاندا زاڵ دەبن، تەنانەت دار و بەرد بانگی مسوڵمانان دەكەن و دەڵێن، مسوڵمان، ئەی بەندەی خودا ئەوە جووە، وەرە بیكوژە. 

ئیبن باز، زانای دیاری رەوتی سەلەفی و موفتی سعوودیە، كە لە ساڵی (1999) كۆچی دواییكردووە، دەڵێت، سەبارەت بە ئێستامان شوێنی تێڕامانە، كە دەكرێت لە داهاتوو بێت، كاتێك دۆخی مسوڵمانتن باش دەبێت، ئەوكاتە هەموویان لەسەر رێگەی راست كۆدەبنەوە، ئەوە لەو كاتەدایە كە عیسا شەڕی جووەكان دەكات و خوای گەورە عیسا و مسوڵمانان بەسەر جوودا سەردەخات، دەجال دەكوژێت.

دابەزینی عیسا لە فیكری شیعەدا

لە كەمالەدین هاتووە، ئەیوبی مەخزوومی دەڵێت، ئەبوو جەعفەری كوڕی محەمەدی كوڕی عەلی باقر باسی كرد، دوازدەهەمین ئیمام نوێژ لەدوای عیسای كوڕی مەریەم دەكات. 

لە فەرموودەیەكی دیكە هاتووە، ئەبوو جەعفەر دەڵێت، گوتمە خوسیمە زەمەنێك دێت كەس خوا ناناسێت، نازانن یەكتاپەرستی چییە، تا ئەو كاتەی دەجال دێت و عیسا لە ئاسمان دادەبەزێت و خوای گەورە لەسەر دەستی عیسا دەجال دەكوژێت، پیاوێك لە ئێمە لە ئەهلی بەیت پێشنوێژیان بۆ دەكات، ئایا نابینی عیسا لەدوای ئێمەیە، عیسا پێغەمبەرێكە لەپشت خەلیفەكانمان نوێژ دەكات، هەرچەندە ئەو پێغەمبەرە، بەڵام ئێمە لەو گەورەترین.

كەراچكی لە كتێبی "التفضیل" دەڵێت، ئەوەی شیعە و هەندێك لە فەرموودەناسانی گشتی نەقڵیان كردووە، ئەوەیە، كاتێك مەهدی دەردەكەوێت خوای گەورە مەسیح دادەبەزنێ، دەگەن بە یەكتری، كاتی نوێژی فەرزە، مەهدی دەڵێت، عیسا علیه السلام پێشكەوە، مەسیح دەڵێتە، مەهدی ئێوە ئەهلی بەیتن كەس بە پێش ئێوە ناكەوێت، مەهدی پێشنوێژی بۆ مەسیح دەكات.

لە كتێبەكانی شیعە ریوایەت كراوە، كە عەلی كوڕی ئەبوو تاڵیب گوتوویەتی، مەهدی وڵاتانی عەرەب لە جوو پاك دەكاتەوە، هەروەك گوتوویەتی لە میسر مینبەرێك درووست دەكەم، خشبەخشتی دیمەشق هەڵوەشێنمەوە، بۆ ئەوەی جوو لە وڵاتانی عەرەب دەربكات، پاشان بەو دار دەستم عەرەب راپێچ دەكەم، گوتم، ئەی ئەمیری ئیمانداران دەڵێی، پێتگوتراوە دوای مردن زیندوو دەكرێیتەوە، ئەویش گوتی، زۆر دوور رۆریشتووی، ئەو كارە پیاوێك لە ئێمە دەیكات ناوی مەهدیی.

ئەو كەسەی فەرموودەكەی شەرح كردووەڵێت، واتای ئەو قسەی عەلی كوڕی ئەبوو تاڵیب ئەوەیە، جووەكان لە فەڵەستین دەردەكات و كۆتایی بە دەوڵەتە رەگەز پەرستییەكەیان دەهێنێت.

ناوی مووشەك و ئۆپراسیۆنەكانی ئێران 

ئێران وەڵامدانەوەکانى خۆى بەناوى بەڵێنى راستگۆ "الوعد الصادق" دەستپێکرد، کە ئەوەش هەڵگرى رەمزێکى قووڵی ئاینییە، پابەندى بە بەڵێن، لە ئەدەبیاتى ئاینى، یەکێکە لە نیشانەکانى مرۆڤى ئیماندار، لە بەرانبەردا بێ بەڵێنى، یەکێکە لە نیشانەکانى مرۆڤى دووڕووە.

لە پاڵ ئەوەشدا ئەو  مووشەکەکانى ئێران ئاراستەى ئیسرائیلى دەکات، هەڵگرى ناوێکن کە هەریەکەیان ئاماژەی رەمزیی و مێژوویى ئایینیان تێدایە.

شیهاب: ئەو مووشەکە ئاماژەیە ئەو ئایەتە، کە دەفەرموێت، وَلَقَدْ جَعَلْنَا فِي السَّمَاءِ بُرُوجًا وَزَيَّنَّاهَا لِلنَّاظِرِينَ (16) وَحَفِظْنَاهَا مِن كُلِّ شَيْطَانٍ رَّجِيمٍ (17) إِلَّا مَنِ اسْتَرَقَ السَّمْعَ فَأَتْبَعَهُ شِهَابٌ مُّبِينٌ، لەم ئایەتە وشەى، "شهاب" ئاماژەیە بۆ ئەو بڵێسە ئاگرانەى کە ئاراستەى شەیتانەکان دەکرێت، کاتێک دەیانەوێت لە ئاسمانەکان نزیک بێتەوە. 

زولفەقار: بە ناوبانگترین شمشێرە، کە پێغەمبەر بە دیارى داویەتى بە عەلى کوڕى ئەبوو تاڵیب.

فاتح، ئاماژەیە بۆ ئەو سەربازە موسڵمانانانەى کە لە ئەدەبیاتى ئیسلامى فەتحى وڵاتانى ئیسلامییان کردووە، هەروەک رەمزێکى سەرکەووتنیشە. 

قیام: هەم بە واتای هەڵسانەوە دێت، هەم بە واتاى شەونوێژدێت. 

سەجیل: ئاماژەیە بۆ ئەم ئایەتە لە سووڕەتى فیل کە دەفەرمووێت، "ترميهم بحجارةٍ من سِجِّيل" ناوە بۆ ئەو بەردانەى کە لە هێرشى ئەبرەهە بۆ سەر کەعبە باڵندە هەڵیان گرتووە ئاراستەى سوپاى ئەبرەهەیان دەکرد. 

قەدەر: بەکارهێنانى ئەو ناویە، ئاماژەیە بۆ یەکێکە لە رووکانەکانى ئیمان، کە ئەویش پرسى قەزا و قەدەرە. 

عیماد: یەکێکى دیکە لە ناوى مووشەکەکانى ئێران، وشەى عیماد کە لە زمانى کوردى پێى دەڵێن، کۆڵەگە، لە ئەدەبیاتى ئاینى بە چەندین واتا لە فەرموودەیەکیش هاتووە، “رأس الأمر الإسلام، وعموده الصلاة، وذروة سنامه الجهاد. لەو فەرموودە، نوێژى بە کۆڵەگە ناوبردووە.

خەیبەر: خەیبەر ناوى یەکێکى دیکە لە مووشەکەکانى ئێران، ئەو ناوە رەهەندێکى مێژوویى لەگەڵ جوو هەیە، ئاماژەیە بۆ فەتحى قەڵاى خەیبەر و کۆتاییهێنان بە هەژمووونى جوو شارى مەدینە.

قادر: ناوى یەکێک لە مووشەکەکانى ئێران، ئەو ناوە یەکێکە لە ناوەکانى خوداى گەورە،  کە بە واتاى هێز دەسەڵات دێت.

ئەنجام: 

هەریەك لە ئەمەریكا و ئیسرائیل گوتارەكانیان بارگاویە، بە تێڕوانی ئاینی مەسیحی و جووە، جووەكان پشت بە دەقە تەوڕاتییەكان دەبەستن، ئەمەریكییەكان دەگەڕێنەوە بۆ دەقەكانی ئینجیل.

كۆماری ئیسلامی ئێران لە رووی دیپلۆماسییەوە هەوڵی داوە زامنێكی سیاسی بەكار بهێنێت، بەڵام لەسەر ئاستی ناوخۆ و لە رەهەندە سەربازییەكانیدا گوتارەكەی گوتارێكی ئایینی و مەزهەبییە.

ناوی مووشەكەكانی ئێران، بەشێكیان هەڵگری ئاماژەی راستەوخۆن بۆ زاڵبوونی مێژوویی بەسەر جوو، وەك ناوی مووشەكی خەیبەر، كە ئاماژەیە بۆ كۆتاییهێان بە هەژموونی جوو لە مەدەینە.

هەندێك لە ناوەكان رەگێكی قووڵی مێژووییان هەیە لە شكستی بەرانبەرانبەرەكان وەك بەكارهێنانی سیجیل، كە ئاماژەیە بۆ شكستی ئەبرەهە لە هێرشەكەی بۆ سەر كەعبە. 

هەندێك ناوی دیكە ئاماژەن بۆ ناوی خودای گەورە كە نیشانەی دەسەڵات و هێزە.

هەریەك لە ئەمەریكا و ئێران خۆیان بە خاوەنی كۆتایی دنیا دەزانن، لە رێگەی هاتنەخوارەوەی عیسای مەسیح و مەسیحی دەجال، دەركەوتنی مەهدی، كە لە توراسی سوننە و شیعە یەك دەنگن لەسەر ئەوەی كە لە نەوەی پێغەمبەرە. 

سەرچاوەكان:

نزول النبي عيسى "ع" من السماء ونصرته الإمام المهدي

بيان حديث قتال المسلمين لليهود، وفي أي زمن؟
اليهود والمعركة في عصر ظهور الإمام المهدي "عج"

اللاهوت بدل الإستراتيجية العسكرية.. الجيش الأمريكي يبرر حرب إيران بخطاب ديني

الطريق إلى هرمجدون.. الأبعاد الدينية لحرب ترمب ونتنياهو ضد إيران

بعضها قادر على الوصول لأوروبا وحمل رؤوس نووية.. صواريخ إيران التي استهدفت إسرائيل

إيران تطلق صواريخ "ثقيلة ودقيقة" وتتحدث عن بنك أهداف يفوق قدرات واشنطن

بالإنفوغراف.. تعرّف على صواريخ إيران المواجهة للدفاعات الإسرائيلية

ماذا نعرف عن الصواريخ الإيرانية وقدراتها؟

الرموز الدينية تشعل الحرب في الشرق الأوسط.. ما الذي يجرى خلف صراع إيران؟

كيف تُعيد إسرائيل توظيف النبوءة التوراتية في حربها مع إيران؟

الدلالات الرمزية في خطاب نتنياهو بإعلان الحرب على إيران

من النيل إلى الفرات قراءة في تصريحات السفير الأمريكي في إسرائيل مايك هاكابي