عێراق پێداچوونه‌وه‌ بۆ سه‌رجه‌م گرێبه‌سته‌ نه‌وتییه‌كان ده‌كات کوردستان- عێراق

نوچه‌نێت

له‌دوایین كۆبوونه‌وه‌ى حكومه‌تى عێراق كه‌ ئێواره‌ى دوێنێ به‌ سه‌رۆكایه‌تى مسته‌فا كازمى به‌ڕێوه‌چوو، به‌ ئامانجى گێڕانه‌وه‌ى داهات بڕیار دراوه‌ پێداچوونه‌وه‌ به‌ سه‌رجه‌م گرێبه‌سته‌كانى نه‌وت بكرێت كه‌ عێراق له‌گه‌ڵ كۆمپانیا بیانییه‌كان كردوویه‌تى.

ئاژانسى ئه‌نادۆڵى توركى بڵاوى كردووه‌ته‌وه‌، له‌ كۆبوونه‌وه‌كه‌ى حكومه‌تى عێراق كه‌ به‌ سه‌رۆكایه‌تى كازمى دوێنی سێشه‌ممه‌ یه‌كى حوزه‌یران له‌ به‌غدا به‌ڕێوه‌چووه‌، بڕیارى پێداچوونه‌وه‌ بۆ سه‌رجه‌م گرێبه‌سته‌كانى نه‌وت دراوه‌ كه‌ عێراق له‌گه‌ڵ كۆمپانیاكانى نه‌وت ئه‌نجامى داوه‌.

ئه‌وه‌ روونكراوه‌ته‌وه‌ ئه‌و بڕیاره‌ به‌پێى ماده‌ى 56ى یاساى بودجه‌ى گشتى عێراق بۆ ساڵى 2021 دراوه‌ و هه‌موو ئه‌و گرێبه‌ستانه‌یش ده‌گرێته‌وه‌ كه‌ له‌ بوارى گه‌ڕان و گواستنه‌وه‌ى نه‌وت و گاز له‌سه‌رانسه‌رى عێراق له‌گه‌ڵ كۆمپانیاكان ئه‌نجام دراون.

په‌رله‌مانى عێراق حكومه‌ته‌كانى پێشووى عێراق به‌وه‌ تۆمه‌تبار ده‌كات، رێككه‌وتنیان له‌گه‌ڵ كۆمپانیا بیانییه‌كان كردووه‌ به‌ شێوه‌یه‌ك خه‌رجى ده‌رهێنان و گواستنه‌وه‌ زۆر له‌ به‌رانبه‌ر نزمى نرخى نه‌وت وه‌رده‌گرن، ئه‌مه‌یش بۆته‌ هۆى ئه‌وه‌ى به‌ ملیۆنان دۆلار له‌ سامانى عێراق به‌فیڕۆ بچێت.

بۆیه‌ حكومه‌تى عێراق وه‌زاره‌تى نه‌وت و ته‌واوى لایه‌نه‌ په‌یوه‌ندیداره‌كانى راسپاردووه‌ بۆ ئه‌وه‌ى به‌ شێوه‌یه‌ك پێداچوونه‌وه‌ بۆ گرێبسه‌ته‌كان بكه‌ن كه‌ له‌گه‌ڵ بنه‌ماكانى ده‌ستوورى عێراق بگونجێت.

تا ئێستا دیار نییه‌ ئه‌و پێداچوونه‌وه‌یه‌ گرێبه‌سته‌كانى هه‌رێمى كوردستانیش ده‌گرێته‌وه‌ یان نا، به‌ڵام دووپات له‌سه‌ر ئه‌وه‌ كراوه‌ته‌وه‌ كه‌ ده‌بێت سه‌رانسه‌رى عێراق بگرێته‌وه‌. 

دوێنێ وه‌زاره‌تى نه‌وتى عێراق بڕى نه‌وتى هه‌نارده‌كراو و داهاتى نه‌وتى مانگى رابردووى ئاشكرا كرد  وگوتى، "عێراق له‌ مانگى رابردوو 89 ملیۆن و 881 هه‌زار و 268 به‌رمیل نه‌وتى هه‌نارده‌ كردووه‌، داهاته‌كه‌یشى پێنج ملیار و 882 ملیۆن و 356 هه‌زار دۆلار بووه‌".

 

بابەتی پەیوەندی دار

0 لێدوانەکان

نەزەری خۆتان بنووسن

ئیمەیلەکەتان بە هیچ شێوەیێک بڵاو نابێتەوە. هەموو فیڵدە ئەستێرە دارەکان ئیجبارین