عێراق و ئێران رێگەی بۆڕیی نەوتی كەركووك – كرماشان خۆش دەكەن

0

نوچەنێت: روداو

دوای راگەیاندنی ئۆپەراسیۆنی نەهێشتنی ئاڵا سپییەكان لە رۆژهەڵات و باشووری خورماتوو، حكومەتی عێراق رایدەگەیەنێت كە بۆ لەمەودوا مەترسییەكانی داعش لە ناوچەكەدا نەماوە، هاوكات ئەوەشی راگەیاند كە فڕۆكەكانی هاوپەیمانان بەشداری ئۆپەراسیۆنەكەیان كردووە و بە ئۆپەراسیۆنێكی سەركەوتووشی ناوبرد.

بەپێی راگەیەندراوەكەی حكومەتی عێراق بێت، ئۆپەراسیۆنەكە حەوتی شوبات دەستیپێكردووە و چەند رۆژێك بەردەوام بووە. بەڵام هاووڵاتییەك لە گوندی داوێ‌ لە رۆژهەڵاتی خورماتوو بە (رووداو)ی گوت “لەم ناوچەیە هیچ رووبەڕووبوونەوەیەك نەبووە. چەكدارە ئاڵا سپییەكان بە پێنج هەلیكۆپتەر گواسترانەوە، دیار بوو رێككەوتن كرابوو”.

دەركەوتنی ئاڵا سپییەكان لە ناوچەكە و باسكردنیان بەشێوەیەكی چڕ لە میدیاكانەوە رێك دوای 16ی ئۆكتۆبەر بوو. هەندێك كەس پێیانوابوو باسكردنی گرووپی چەكداریی توندڕەو لە ناوچەكە جگە لە سیناریۆیەكی حكومەتی عێراق شتێكی دیكە نییە.

قسەی ئەو هاونیشتمانییەی گوندی داوێ مانای ئەوە نییە كە هێزە عێراقییەكان نەچوونەتە ناوچەكە، چونكە یەكێك لە دانیشتووانی گوندی “لەك” كە ژنێكی تەمەن 63 ساڵە، دەڵێت: “چەكدارانی حەشد هاتن هەرچی لە ماڵەكەماندا بوو بۆ خۆیانیان برد، 300 هەزار دیناریشیان لە ماڵەكەی دراوسێمان برد كە خەڵك خێری پێكردبوون”.

ئەو گوندانەی دەكەونە رۆژهەڵاتی خورماتوو، ژمارەیان وەك باسدەكەن هەزار گوندێك دەبێت، نزیكەی 100 گوند كە دەكەونە نێوان پێشمەرگە و حەشدی شەعبی، چۆڵكراون. چەكدارانی حەشدی شەعبی هەر بەناوی ئۆپەراسیۆنی قەڵاچۆكردنی ئاڵاسپییەكانەوە چوونەتە ئەو ناوچانە و هەڵیانكوتاوەتە سەر كوردنشینانی گوندەكانی ناوچەكە.

گوندی “لەك” كە پێشتر زیاتر لە 100 خێزانی لێدەژیان، ئێستا تەنیا پێنج خێزانی تێدا ماوە، حەشد ئەمجارەش هەڕەشەیەكی دیكەیە بۆ سەر كوردنشینانی ناوچەكە و هەندێك لە چاودێران بە “تەعریبێكی دیكە ” ناوی دەبەن.

رۆژی حەوتی شوبات حكومەتی عێراق ئۆپەراسیۆنی قەلاچۆكردنی ئاڵا سپییەكانی راگەیاند، بەڵام “ل” كە دانیشتوویەكی گوندی لەكە، دەڵێت لە ناوچەكەی ئێمە چوار بیری نەوت و دوو بیری غازی سرووشتی لێیە و لە ماوەی دوو رۆژدا هێزە عێراقییەكان دەستیان بەسەردا گرت. گوتیشی “ئێستا بیرە نەوتەكانی پەلكانە بەدەست چەكدارانی حەشدی شەعبییەوەن”.

رێگای گوندەكانی ناوچەكە راستەوخۆ رێگایەكی قیرتاوكراو دەیگەیەنێتە ناحیەی زینانە و لەوێشەوە بۆ قەزای كفری و كەلار، هەر ئەمەیە گرنگیی ناوچەكە روون دەكاتەوە، بەتایبەتی بۆ كۆماری ئیسلامیی ئێران كە بەنیازە نەوتی كەركووك و ناوچەكانی دەوروبەری بە هێڵی بۆڕیی نەوتی كرماشانەوە ببەستێتەوە.

هەوڵەكانی حكومەتی عێراق هەر بۆ بیرە نەوتەكانی پەلكانە نەبوو، دەستبەسەرداگرتنی كێڵگەی غازی كۆرمۆر یەكێكی دیكە لە پلانەكانە، چونكە بەپێی گوتەی پۆلیسی نەوت و گاز بێت، ماوەی چەند رۆژێكە حكومەتی عێراق كێوماڵی گوندەكانی دەوروبەری دەكات و شەڕ و پێكدادان لە نێوان خۆبەخشەكانی خورماتوو و چەكدارانی حەشدی شەعبیش روویداوە.

ئەفسەرێكی پۆلیسی نەوت و گاز دەڵێت: “ئێمە لێرەین تاوەكو پارێزگاری لەو بۆڕیە غازە بكەین كە غازی لێوە رەوانە دەكرێت بۆ هەردوو وێستگەی بەرهەمهێنانی كارەبای چەمچەماڵ و هەولێر، هێزە عێراقییەكان رۆژانە بە ناوچەكەدا دێن و دەچن و ئامێری پشكنینیان پێیە و هۆكاری هاتنەكەشیان روونە كە بۆ كێڵگەی غازی كۆرمۆرە”.

پێدەچێ نەوت و غازی ناوچەكە هەمووی یەك پاكێج بێت بۆ حكومەتی عێراق بە نەوتی كەركووكیشەوە، چونكە بەپێی نووسراوێكی نهێنی و بەپەلە و تایبەتی نووسینگەی وەزیری نەوتی عێراق، عەبدولجەبار لعێبی بێ كە رۆژی 16ی ئۆكتۆبەری 2016 (واتە ساڵێك پێش رووداوەكەی 16ی ئۆكتۆبەر) ئاراستەی وەزیری نەوتی ئێرانی كردووە، پێشنیازی راكێشانی بۆڕییەكی نەوت كراوە لە كەركووكەوە بۆ پاڵاوگەی نەوتی كرماشان لە ئێران.

نووسراوەكە بۆ ساڵێك لەمەوبەر دەگەڕێتەوە، بەڵام لێكەوتەكانی وردە وردە دەردەكەون. ئێستا حكومەتی عێراق بە هاوبەشی لەگەڵ ئێران سەرگەرمی كۆنترۆڵكردنی هەموو ئەو رێگایانەن كە دەبێت بۆڕییە نەوتییەكەی پێدا تێپەڕێت و ناوچەكانی گەرمیان بە كفری و كەلار و كوڵەجۆ و خانەقین لە بازنەی ئەو پلانەدان كە بۆ نەوتی ناوچەكە داڕێژراوە.

Share.

About Author

بوچون نوسین داخراوە.

Social Media Auto Publish Powered By : XYZScripts.com