ئایا ناوچەی ئارام، بۆ کورد ئارامی دەبێت؟

0

نوچە

بڕیارەکەی دۆناڵد ترەمپ بۆ کشانەوەی هێزەکانی وڵاتەکەی لە رۆژئاوای کوردستان و باکووری سووریا، کاردانەوەی ناوخۆیی و جیهانیی بەدوای خۆیدا هێنا، ترسی سەرەکی هەڕەشەکانی ئەردۆغان بۆ هێرشکردنە سەر رۆژئاوای کوردستان و شەڕڤانانی هەسەدە، کە قوربانییەکی زۆریان لە شەڕی داعشدا داوە.

دواتر رۆژی دوشەممە (١٤-١-٢٠١٩) ترەمپ لە پەیامێکی تویتەریدا رایگەیاند “ناوچەیەکی ئارام لەسەر سنووری تورکیا و سووریا دادەمەزرێنین”، بەم پەیامە تویتەریەی دۆناڵد ترەمپ پرسی دروستکردنی ناوچەیەی ئارامی لەسەر سنوری رۆژئاوای کوردستان تورکیا هێنایە ئاراوە.

بەرپرسانی ئەمەریکا لەسەر ئاستی وەزارەتی بەرگری و دەرەوە و کۆنگرێسی ئەو وڵاتە داوایان لە ترەمپ کرد، کورد کە هاوپەیمانی سەرەکییە لە شەڕی تیرۆر لە هەڕەشەی و هێرشەکانی تورکیا بپارێزێت، دوای پەیامی ترەمپیش هەڕەشەی لەناوبردنی ئابووری تورکیا و دروستکردنی ناوچەیەکی ئارام بوو بە درێژایی (٢٠) میل لەسەر سنوورەکانی سووریا و تورکیا، وەک چارەسەرێک بۆ پاراستنی کورد و رۆژئاوای کوردستان لە هەر پەلامارێکی چاوەڕوانکراوی تورکیا.

ناوچەی ئارام کوێ دەگرێتەوە (١)

ناوچەی ئارام، شار و ناوچەکانی حەڵەب، ئیدلەب و رەققە دەگرێتەوە بەدریژایی (٤٦٠) کیلۆمەتر و بە قوڵایی (٣٢) کیلۆمەتر.

بەوپێیە، ناوچەی ئارام لە مەنبجەوە دەستپێدەکات و بەدرێژایی سنوورەکانی رۆژئاوای کوردستان تادەگاتە سنووری عێراق و ناوچەکانی قامیشلۆ، سەرێکانی، تەلتەمر، درباسییە، عامودا، وەردیە، تەلحەمیس، قەحتانییە، یەعریبیە، مالکیە لە سنوری حەسەکە و کۆبانی لە حەڵەب و ناوچەی گرێ سپی لە پارێزگای رەققە دەگرێتەوە.


مەترسی هەیە تورکیا کۆنتڕۆڵی بکات

رامی‌ عه‌بدولڕه‌حمان به‌ڕێوه‌به‌ری‌ روانگه‌ی‌ سوری‌ بۆ مافه‌كانی‌ مرۆڤ رونیکردەوە؛ ناوچه‌ی‌ ئارام كه‌ به‌ قوڵایی‌ زیاتر له‌ (٣٠) كیلۆمه‌تر ده‌بێت بۆ ناو خاكی‌ سووریا، له‌ بنه‌ڕه‌تدا داواكاری‌ توركیایه‌ بۆ دورخستنه‌وه‌ی‌ هێزه‌ كوردییه‌كان له‌سه‌ر سنورەکانی و مەترسییش هەیە هەر لە بنەڕەتدا ئەو ناوچەیە بکەوێتە ژێر کۆنتڕۆڵی تورکیاوە.

بەپێی پێشبنییەکانی روانگەی سوریی، ناوچه‌ی‌ ئارام له‌ شارۆچکەی مه‌نبجەوە‌ درێژ ده‌بێته‌وه‌ و ده‌گاته‌ سنووره‌كانی‌ سووریا و عێراق و به‌ناوچه‌ی‌ خۆبه‌ڕێوه‌به‌ری‌ رۆژئاوادا تێده‌په‌ڕێت كه‌ له‌لایه‌ن ئەنجوومەنی سوریای دیموکراتەوە به‌ڕێوه‌ده‌برێت.

سەبارەت بەو پرسەش رەجەب تەیب ئەردۆغان رایگەیاند: لە دوای پەیوەندیی تەلەفۆنیدا کە رۆژی سێشەممە (١٥-١-٢٠١٩) لەگەڵ دۆناڵد ترەمپ، ئەنجامیداوە لێکتێگەیشتن دروست بووە بۆ دروستکردنی ناوچەیەکی ئارام لە باکووری سووریا بۆ رەواندنەوەی گرژییەکان و دورخستنەوەی مەترسیی پێکدادان.

لە وتەیەکیشدا کە لەبەردەم فراکسیۆنی پارتەکەی لە پەرلەمانی تورکیا پێشکەشی کرد، ئەردۆغان رایگەیاند: لەسەردانە چاوەڕوانکراوەکەی بۆ رووسیا، ئەو پرسە لەگەڵ ڤلادیمێر پۆتین تاوتوێ دەکات و ئامانجیان ئەوەیە بە درێژیی (٣٢) کیلۆمەتر ناوچەیەکی ئارام لەناو خاکی سووریا و سەرسنوورەکانی تورکیا دروست بکەن و مەترسی “تیرۆر” لە وڵاتەکەیان دروبخەنەوە.

بەپێی هەواڵی ئاژانسی ئەنادۆڵ؛ مانگی ئایاری ساڵی (٢٠١٣) و لەکاتی سەردانەکەی بۆ واشنتۆن، ئەردۆغان پێشنیازی دروستکردنی ناوچەی ئارامی داوەتە بەرپرسانی واشنتۆن بۆ پاراستنی ئەو ئاوارانەی لە ناو سووریا لە ترسی شەڕ لەو وڵاتە هەڵدێن.

بەرپرسانی رۆژئاوای کوردستان گومانیان لە ناوچەی ئارام هەیە و داوا دەکەن رێگە بە تورکیا نەدرێت کۆنتڕۆڵی ئەو ناوچەیە بەدەستەوە بگرێت و ناوچەکە بخرێتە ژێر چاودێریی نێودەوڵەتییەوە.
ئاڵدار خەلیل بەرپرسی پەیوەندییەکانی دەرەوەی تەڤگەری کۆمەڵگەی دیموکراتی (تەڤدەم) رایگەیاند: تورکیا دەیەوێت کۆنتڕۆڵی ناوچەی ئارام لە سنووری نێوان سوریا و تورکیا بگرێتەدەست و ئامانجەکانی بۆ داگیرکردنی ئەو ناوچانە بهێنێتەدی.

هەڵوێستی ئەمەریکا لەسەر پێکهێنانی ناوچەی ئارام روون نییە
راشیگەیاند: ئەگەر ئەمەریکا پشتیوانی لە پێکهێنانی ناوچەی ئارام دەکات دەبێت ئەوە لەبەرچاو بگرێت کە هێزێکی نێودەوڵەتی ئەو ناوچانە بپارێزن، چونکە ئەگەر ئەو ناوچەیە بکەوێتە ژێر دەستی تورکیا ئەوا مەترسیی بۆ رۆژئاوای کوردستان و باکووری سووریا دروست دەبێت.

هەر لەوبارەیەوە، ساڵح موسلیم بەرپرسی پەیوەندییەکانی دەرەوەی پارتی یەکێتی دیموکراتی سوریا (پەیەدە) رایگەیاند: هەڵوێستی بەرپرسانی ئەمەریکا لەسەر دانوستانەکان و پێکهێنانی ناوچەی ئارام  روون نییە و پێکهێنانی ئەو ناوچەیە وەک رازیکردنی ئەنقەرەیە لەلایەن واشنتۆنەوە.

موسلیم ئەوەشى گووت: دروستکردنی ناوچەی ئارام بە قوڵایی (٣٠) کیلۆمەتر لە سنوورەکانی نێوان سووریا تورکیا روون نییە، بەڵام تورکیا بە بەردەوامی ئامانجی داگیرکردنی رۆژئاوای رووباری فورات و باکووری سووریا بووە، بۆیە دروستکردنی ئەو ناوچەیە، ئەگەر لەسەر خواستی کورد بێت و لەلایەن هێزەکان کورد، یان هێزى نێودەوڵەتییەوە بەڕێوەببرێت لە بەرژەوەندییان دەبێت.

لەژێر چاودێریی نێودەوڵەتیدا بێت

هەر سەبارەت بە پرسی ناوچەی ئارام لەسەر سنوورەکانی تورکیا و باکوور و رۆژهەڵاتی سووریا، فەرماندەیی گشتی هێزەکانی سوریای دیموکرات (هەسەدە) جەختی کردەوە؛ لەسەرەتای شەڕی داعشەوە بە پشتیوانی هاوپەیمانی نێودەوڵەتی ئەرکیان پاراستنی سەرجەم پێکهاتەکانی باکوور و باکووری رۆژهەڵاتی سوریا بووە، ئەو ناوچانەش ئارامترین و تاکە ناوچەیە، کە سەرجەم پێکهاتەکانی سووریا پێکەوە و بە ئاشتی تێدا دەژین و هیچ مەترسییەکیان بۆ سەر دراوسێیەکانیان دروست نەکردووە.

هەسەدە؛  ئامادەی هاوکاریی و پاڵپشتی نیشانداوە بۆ دروستکردنی ناوچەیەکی ئارام لە باکوور و باکووری رۆژهەڵاتی سووریا، بۆ پاراستنی سەرجەم نەتەوە و پێکهاتە ئیتنییەکان لە مەترسی کۆمەڵکوژیی و بە گرەنتی و چاودێریی نێودەوڵەتی لەپێناو بەرقەرارکردنی ئارامی و سەقامگیریی و رێگرییکردن لە دەستوەردانی دەرەکی.

هەڵوێستی رووسیا (٢)

لەبارەی ناوچەی ئارام، ڤیلادیمێر پۆتین لە دوای کۆبوونەوەی لەگەڵ ئەردۆغان گوتی “ئێمە زۆر باش لە هەستیاریی تورکیا تێدەگەین. پێویستە ئاسایشی باشووری وڵاتەکەی بپارێزرێت، کە ئەمە مافێکی رەوای خۆیەتی. دروستکردنی ناوچەیەکی ئارام لە سووریا بۆ پاراستنی یەکێتی خاکی سووریا باش دەبێت”.

هەسەدە چەکە قورسەکانی کشاندەوە (٣)

هێزەکانی سووریای دیموکرات (هەسەدە) چەکە قورسەکانی لەو ناوچە سنوورییانە کشاندەوە، کە دەبنە ناوچەی ئارام. 

موعاز عەبدولکەریم، سەرۆکی نووسینگەی قامشلۆی پارتی پاشەڕۆژی سووریا دەڵێت، بەتەنها چەکە قورسەکان لەو ناوچانە دەکشێنەوە و چەکە سووکەکان دەمێنن.

هەوڵدەدرێت بڕیارێکی نێودەوڵەتی لە پشت بێت (٤)

ئەنجوومەنی نیشتیمانیی کورد لە سووریا (ئەنەکەسە) شاندێکی ناردووە بۆ بەرلین و دەیەوێ ئەڵمانیا و وڵاتانی بڕیاربەدەست رۆڵیان هەبێت لە دروستکردنی ناوچەی ئارام. شاندەکە پێشتر چووەتە واشنتن و مۆسکۆش، هەوڵدەدەن بڕیارێکی نێودەوڵەتی بۆ دروستکردنی ناوچەی ئارام هەبێت.

شانده‌كه‌ی ئه‌نجوومه‌نی نیشتیمانی كورد لە سووریا له‌ پێنچ كه‌س پێكهاتوون، لەگەڵ به‌رپرسانی وه‌زاره‌تی ده‌رەوه‌ی ئەڵمانیا له‌ به‌شی رۆژهەڵاتی ناوەڕاست تایبه‌ت به‌ كه‌یسی سووریا كۆبوونه‌وه‌. ئەنەکەسە داوای لە وەزارەتی دەرەوەی ئەڵمانیا کردووە، پشتگیری هەوڵەکانیان بکات و نەهێڵن ناوچەی ئارام تەنها بە رێککەوتنی تورکیا و ئەمریکا تەواو بێت.

ئه‌نه‌كه‌سه دەیەوێت ناوچەی ئارام، له‌ژێر چاودێریی كۆمەڵگه‌ی نێوده‌وڵه‌تی بێت و ئەڵمانیاش به‌شداربێت، هه‌روه‌ها ئه‌ڵمانیا پشتگیری لە پاراستنی مافی كورد له‌ ده‌ستووری سووریادا بكات.

بە چوارەم ناوچەی ئارامكردنەوە ناودەبرێت (٥)

ئەم پێشكەوتنە مەیدانیانە لە رۆژهەڵاتی فورات هاوكاتە لەگەڵ پێشكەوتنی مەیدانی لە ناوچەكانی باكووری حەماو باشووری ئیدلب كە ئەمانە بە چوارەم ناوچەی ئارامكردنەوە ناودەبرێت كە هەرسێ وڵاتی رووسیا – توركیا – ئێران لە دانوستاندن و رێككەوتنەكانی ئەستانا لەسەری رێككەوتوون. ئەگەر هێزەكانی سووریا كە لەلایەن هێزەكانی رووسیاوە پشتگیری دەكرێن دەست بەسەر شاری خان شیخۆنی ستراتیژی بگرن لە باشووری ئیدلب (٧٠ كیلۆمەتر) لەسەر رێگەی نێودەوڵەتی ئیم ٥ ، كە شاری حەلەب بە حەماوە دەبەستێتەوە، ئەگەری فراوانكردنی ئەمە بۆ دەستبەسەرداگرتنی تەواوی ناوچەكانی دەورووبەری باكووری پارێزگای حەما هەیە، كە پێشتر لەژێر دەسەڵاتی هەیئەی تەحریری شام (بەرەی نوسرەی جاران) و هاوپەیمانەكانیان دابوو لە گرووپەكانی ئۆپۆزسیۆنی سووریا.

ئەم دوو پێشكەوتنە كە هاوكاتن، واقیعێكی نوێ بۆ قەیرانی سووریا بەگشتی و رۆژهەڵاتی فورات بەتایبەتی دروستدەكەن. هەندێك لە ئەنجامەكانیشیان بەیەكداچوون و پەیوەستن بەیەكترەوە.

 لەسەر ئاستی رۆژهەڵاتی فورات:

ئەگەر لەنێوان ئەمریكاو توركیا رێككەوتن لەسەر میكانیزمی ئەمنی بكرێت (كە ئەمە ناولێنانی ئەمریكییە كە توركیا بە رێرەوی ئاشتی یان ناوچەی ئارام ناوی دەبات)، ئەمە دەبێتە هۆی رێگەگرتن لە هێرشی توركیا بۆ ناوچەكانی رۆژهەڵای فورات، لە هەمانكاتدا هەڵوێستی ئیدارەی خۆسەر و هێزە سەربازییەكانی سووریای دیموكرات  (بەشە كوردییەكەی) لاواز دەكات.

لەگەڵ دوورخستنەوەی یەكینەكانی پاراستنی گەل لە ناوچە سنوورییەكان، هەڵوێستیان لە بەرژەوەندی یەكە عەرەبییەكان لەناو هێزەكانی سووریای دیموكرات لاوازتر دەبێت كە ئێستا ژمارەیان لە زیادبووندایە و لەلایەن ئەمریكاوە باشتر چەكدار دەكرێن و زیاتر پشتیوانی هەندێك وڵاتی كەنداویش لەپێش هەمووشیانەوە سعوودییەیان پێدەگات. هەروەها نەمانیان لە ناوچەكانی سنووری سووریا لەگەڵ توركیا، لە هەر دانوستاندنێكدا كە ئەگەر بكرێت لەگەڵیاندا( ئەگەر ئیدارەی خۆسەر بژاردەی رێككەوتنی لەگەڵ حكومەتی سووریا گرتەبەر) هەڵوێستیان بەرامبەر حكومەتی سووریا لاواز دەكات. بۆیە دەشێ ئیدارەی خۆسەر یاری بەو كارتە بكات بۆ هەندێك دەستكەوت لە حكوومەتی سووریا سەبارەت بە دەسەڵاتەكانی ئیدارەكەی.

لەلایەكی دیكەوە لێكتێگەیشتنی ئەمریكا-توركیا و، جەختكردنەوەی ئەمریكا لەسەر ئەوەی كە بەردەوام دەبێ لەسەر هاوكارییەكانی بۆ هێزەكانی سووریای دیموكرات و هەوڵە ئەمریكی و ئەوروپاییەكان لەپێناو بەرپاكردنی پرۆسەیەكی سیاسی كە ببێتە هۆی داڕشتنەوەی ئەو ئیدارەیەی لە رۆژهەڵاتی فورات هەیە، دەبێتە هۆی تەسككردنەوەی ئەو پەراوێزەی هەیە لەبەردەم حكومەتی سووریا كە جورئەتی نەدەكرد بەهۆی بوونی هێزەكانی نەمریكاوە پەلاماری رۆژهەڵاتی فورات بدات.

مەترسییە ئەمنییەكان لە رۆژهەڵاتی فورات
جگە لە رێككەوتنی ئەمریكا-توركیا سەبارەت بە ئاسایشی سنوور، پێشكەوتنی ئەمنی لە ناوچەكانی رۆژئاوای كوردستان و رۆژهەڵاتی فورات هەن كە دەبنە هۆی هەڕەشەیەكی جیددی بۆ سەر سەقامگیری ناوچەكە. زانیاری هەیە لەسەر ئەوەی كە هەندێك لە شانە خەوتووەكانی داعش لە ناوچەی شەدادی (٦٠ كیلۆمەتر باشووری حەسەكە) و ناوچەی هۆل هەن ( كە كامپێكە زیاتر لە ٧٠ هەزار كەس لەخۆدەگرێت كە زۆربەیان خێزانی چەكدارەكانی داعشن و ژینگەیەكی هاوسۆزە لەگەڵ رێكخراوەكەدا) ئەمەش وایكردووە ببێتە هێزێكی رێكخراوی چەكداركراو. هەروەها ئێرانیش هێزی هاوشێوەی حەشدی شەعبی لە هەندێك گوندی دەورووبەری شاری قامیشلۆ، شارە گەورەكانی رۆژئاوای كوردستان و رۆژهەڵاتی فورات دروستكردووە.

لە قووڵایی عەرەبی ناوچەی رۆژهەڵاتی فورات هەستی دژەكورد لەنێو ریزەكانی هێزەكانی سووریای دیموكرات گەشە دەكات. لەلایەكی دیكەشەوە ژمارەی پەلامارەكان كە هێزەكانی سووریای دیموكرات دەكەنە ئامانج لە زیادبووندایە كە لەوانەیە هەندێكیان لەلایەن شانەكانی سەر بە حكومەتی سووریا بكرێن. ئەمە جگە لەوەی كە شانەكانی داعش لە ناوچەكدا گەشەیان كردووە. هەموو ئەم راستییانە مەترسی تێكچوونی ئەمنی فراوانیان لە ناوچەكەدا لێدەكرێت كە لەوانەیە سەر بكێشێت بۆ جەنگێكی نەتەوەیی كە كورد بكرێتە ئامانجی سەرەكی.

هەسەدە پشتگیری لە میکانیزمە ئەمنییە هاوبەشەکانی نێوان ئەمریکا و تورکیا دەکات (٦)

هاوپەیمانیی نێودەوڵەتی ئاماژەی بەوەشکردووە، هەسەدە پشتگیری لە میکانیزمە ئەمنییە هاوبەشەکانی نێوان ئەمریکا و تورکیا دەکات، ئەوەش بە لابردنی سەنگەرەکانی و کشاندنەوەی هێز و چەکە قورسەکانی لە سنووری تورکیا و سووریا.

رۆژی پێنجشەممەی رابردوو، هەسەدە دەستکردن بە کشانەوەی لە ناوچە سنوورییەکانی رۆژئاوا و باکووری کوردستان (سووریا – تورکیا)  راگەیاند، لەنێویاندا سەرێکانی، ئەوەش دوای رێککەوتنی سەرەتایی واشنتن و ئەنقەرە لەبارەی دروستکردنی ناوچەی ئارام.

تورکیا گومانی لە کشانەوەی هەسەدە لەو ناوچانە هەیە و دەڵێت، پێویستە دەبێ بە چاوی خۆیان کشانەوە هێز و چەکە قورسەکانی یەپەگە ببینن.

خولوسی ئاکار، وەزیری بەرگریی تورکیا دەڵێت، لەلایەن ئەمریکاوە زانیارییان لەبارەی کشانەوەی یەپەگە و هەڵگرتنی بەشێک لە سەنگەرەکان پێدراوە، بەڵام ئەو زانیارییانە پێویستیان بە پشتڕاستکردنەوە هەیە. گوتیشی “دەمانەوێ تەواوی ئەمانە بەڕوونی و بە چاوی خۆمان ببینین. دیدارەکانمان بەردەوامن”. 

ئەمریکا دوو هەفتەی لە بەردەم دایە (٧)

سه‌رۆككۆماری توركیا، له‌باره‌ی دروستكردنی ناوچه‌ی ئارام له‌ سووریا مۆڵه‌تی دوو تاوه‌كو سێ هه‌فته‌ ده‌داته‌ ئه‌مریكا و دەڵێت “چیتر ناتوانین دان بەخۆماندا بگرین”.

ره‌جه‌ب ته‌یب ئه‌ردۆغان، سه‌رۆككۆماری توركیا، له‌باره‌ی دروستكردنی ناوچه‌ی ئارام له‌ سوریا مۆڵه‌ت بۆ ئه‌مریكا دیاری دەکات و رایده‌گه‌یێنێت، ئه‌گه‌ر ئه‌مریكا پلانی توركیا له‌ ناوچه‌ی ئارام جێبه‌جێ نه‌كات، ئه‌وان پلانی سه‌ربازی خۆیان له‌ ناوچه‌كه‌ جێبه‌جێ ده‌كه‌ن.

ئه‌ردوغان جه‌خت لەوە دەکاتەوە، کە ئێمه‌ له‌گه‌ڵ ئه‌مه‌ریكا گفتوگۆ ده‌كه‌ین، ئێمه‌ رێگه‌ ناده‌ین ناوچه‌ی ئارام له‌ كۆنترۆڵی هێزه‌كانمان نه‌بێت.

ئەردۆغان پێیوایە، پێویسته‌ ناوچه‌ی ئارام بكه‌وێته‌ ژێر كۆنترۆڵی هێزه‌كانی سوپای توركیا، بۆ ئه‌و مه‌به‌سته‌ش ماوه‌ی ته‌نیا دوو تا سێ هه‌فته‌ به‌ ئه‌مریكا ده‌ده‌ین، ئه‌گه‌ر هیچ هه‌نگاوێكی له‌و باره‌یه‌وه‌ نه‌نا، ئه‌وا بۆ خۆمان پلانی راگه‌یاندنی ناوچه‌ی ئارام له‌ باكووری سووریا داده‌ڕێژین.

سه‌رۆك كۆماری توركیا دەشڵێت “بۆ راگه‌یاندنی ناوچه‌ی ئارام چیتر ناتوانین دان به‌خۆماندا بگرین”.

ئەنجام

گومان لەوەدا نییە كە پێشهاتەكان لە سووریا بەگشتی و لە رۆژهەڵاتی فوراتیش بەتایبەتی، كاریگەرییەكی راستەوخۆیان لەسەرناوچەکە دەبێت، هەر بۆیە لەسەر ئاستی ناوخۆ و ناوچەیی و نێودەوڵەتی، كرانەوەی هەرێمی كوردستان لەگەڵ ئەو لایەنانە كە پەیوەستن بە قەیرانی سووریاوە پێویستە.

وا دەردەكەوێت كە دەوڵەتی سووریاش دەبێتە بەشێك لە چارەسەری قەیرانی سووریا. هیچ ئیرادەیەكی نێودەوڵەتی راستەقینەش بۆ لابردنی نەبووە، چونكە ئەمە دەبێتە هۆی تەسلیمكردنی دەسەڵات بە زۆرینەیەكی سوننی كە لەژێر كاریگەری بیركردنەوەیەكی ئایینیدایە، هەروەها دەبێتە هۆی درووستكردنی سیستەمێكی لایەنگری توركیا.

سەرچاوەکان

١ـ https://www.sbeiy.com/Details.aspx?jimare=11494

٢ـ https://www.rudaw.net/sorani/world/270820196

٣- https://www.rudaw.net/sorani/middleeast/syria/29082019

٤- https://www.rudaw.net/sorani/world/270820195

٥- https://www.rudaw.net/sorani/opinion/29082019

٦- https://www.rudaw.net/sorani/middleeast/31082019

٧- http://www.nuche.net/?p=141306

Share.

About Author

بوچون نوسین داخراوە.

Social Media Auto Publish Powered By : XYZScripts.com