د.رێبوار: نەک کورد، عیراقیش بۆ شەڕی دوای موسڵ، روئیایەکی روونی نییە

0

بەهرە حەمەڕەش

دکتۆر رێبوار کەریم، مامۆستای زانکۆی سلێمانی، خاوەنی بڕوانامەی دکتۆرا لە زانستە سیاسییەکان، لە گفتوگۆیەکدا لەگەڵ سایتی نوچەنێت، باس لەو مەترسیانە دەکات، کە دوای شەڕی موسڵ و نەمانی داعش، رووبە رووی کوردستان دەبنەوە. کارتی سەربازی لە شەڕی موسڵدا بە کارتێکی گرنگ دەزانێت کە بەدەست کوردەوەیە، هاوکات پێیوایە ئەگەر ناوماڵی کوردی رێکنەخرێت، ئەو دەستکەوتانەی هەن لە ژێر هەڕەشەدان.

نوچەنێت: هەندێک لە شیکارە سیاسییەکاندا دەڵێن، کورد لە ژێر هەڕەشەی داعشدا نییە، ئەو شەڕە بۆ خاتری رازیکردنی ئەمریکا دەکرێت؟

د. رێبوار: پێموایە ئێمە بە دوو بەڵگە لەبەردەم مەترسی تیرۆردا بووین، بەڵگەی یەکەم، کە داعش دروستبوو، هەر  لەسەرەتاوە بەشێک لە ناوچەکانی ئێمەی داگیرکرد، ئەوان وایان رادەگەیاند کە پەیوەندیان بە کوردو ناوچەی کوردستانیەوە نییە، بەڵام دواتر هەندێ ناوچەیان داگیرکرد، هەتا ئەم دواییانەی کەرکوک، کەواتە شەڕکردنی داعش و تیرۆر لە باشوری کوردستان پێویست بووە بۆ ئەم قۆناغە.

بەڵگەی دووەم، ئەم گروپە بەردەوام هەڵوێستە سیاسیەکانی خۆی نەشاردۆتەوەو گوتویەتی، دەبێ بەشێوازی توند مامەڵە لەگەڵ کورد بکرێت و جۆرەها هێرشیان کردۆتە سەر کورد. ئەم هەڵوێستانە وادەکات، کە بڵێین دەبێ کورد هەمیشە بە شێوەیەکی زۆرباش ئامادەی خۆ پڕ چەککردن و خۆ حازرکردن بۆ رووبەرووبوونەوەبێت. کەواتە داعش مەترسییە بۆسەر کورد، شەڕی داعش لە باشوری کوردستان، شەڕێکی زەروری بووە دەبێ کورد بیکات.

نوچەنێت: تا ئێستا کەسانی سیاسی دەڵێن، لە وانەیە کورد لەم شەڕەو شەڕی موسڵیش تەنیا شەڕکردنی پێ ببڕێت، چونکە ستراتیژیەتی ئەمریکا لەم ناوچەیە روون نییە؟

د.رێبوار: ئەوەی تەحەکوم بەم ناوچەیەوە دەکات تەنیا ئەمریکا نییە، تا بڵێین کە ستراتیژیەتی ئەمریکا روون بێت هەموو بابەتەکان روون دەبنەوە، چونکە جگە لە ئەمریکا ئێران و تورکیا هەیە، روسیاو قسەی هەیە عیراق و کورد قسەی خۆی هەیە، بەڵام دەبێ ئەوە بزانین کە ستراتیژیەتی کورد، پێگەی شەڕەکەی دیاری دەکات، کە ئایا لەو شەڕە چی دەستدەکەوێ.

شەڕکردن بۆ رزگار کردنی ناوچە کوردستانییەکان، ئیشی کوردە، بەڵام بەشداریکردنی کورد لە غەیری ناوچەی کوردستانی تەنیا وەک شەڕکەرێک دەردەکەوێ. نەک وەک پارێزەرێک لە خاک، ئەم قسەیەم بۆ پێشمەرگەیە، نەک بۆ کەسێک کە لەناو سوپای عیراقدا رێکخراوە، چونکە بەکارهێنانی ئەوان لە چوارچێوەی دەسەڵاتی سوپای عیراقە،  کە پێشتریش بەکارهێنراون. واتە بۆ هێزێکی سەربە سوپای عیراقی ئەوە ئاساییە.

نوچەنێت: دوای ئەو شەڕە، موسڵ دەبێتە جێگای ململانێی ناوچەیی و سەروو ناوچەیی، ئایا کورد لە کوێی ستراتیژیەتی سەڕی موسڵدایە؟

د. رێبوار: موسڵ چۆن لە شەڕەکەیدا گرفتەو قسەی زۆر هەڵدەگرێ، ئیدارەدانیشی لە داهاتوودا قسەی زۆر هەڵدەگرێ. رەنگە ئیدارەدانی ناوچەیی لێبکەوێتەوە و هەر ناوچەیەی بەدەست گروپێکی دیاریکراوەوە بێت. جۆرێک لە ململانێی ناوچەیی و هەرێمی و نێودەوڵەتی هەیە لەسەر دوای موسڵ، ئێستا شێوە رێککەوتنێک هەیە بۆ شەڕی موسڵ نەک رێککەوتنی تەواو، بەڵام لە راستیدا هیچ جۆرە رێککەوتنێک نییە بۆ دوای شەڕی موسڵ و ئیدارەدانی.

ئەوەش پێمان دەڵێت، کە مەترسی حازرەو وجودی هەیە، ئێمە لە قۆناغی داهاتوودا چۆن موسڵ بەڕێوەدەبەین، خاکەکەی چۆن مامەڵی لەگەڵ دەکرێت، خەڵکەکەی چۆن بەڕێوە دەبرێن؟ ئایا کێ ئەوێ بەڕێوەدەبات، دەسەڵاتەکە ناوچەیی دەبێت یان سەربازی یان مەدەنی خەڵکی ناوچەکە؟

یان هەرجۆرە پڕۆژەیەکی تر یان هەرێمی لێ دروست دەبێت، تا ئێستا هیچ جۆرە رێککەوتنێک لەسەر ئەوە نەکراوە، خۆی لە خۆیدا نەبوونی رێککەوتنیش لەسەر ئەوە مەترسییە.

نوچەنێت: پێویستە کورد بۆ ئەم قۆناغە چیبکات؟

د.رێبوار: دوو شت هەیە، دەبێ جیای بکەینەوە دەبێ  چیبکات و دەبوایە چیبکردایە. دەبوو کورد پێشتر کە رێککەوتنی لەسەر مەسەلەی موسڵ کرد، کاتێک کە وەفدی کوردی رۆیشتە بەغداو لەگەڵ عەبادی کۆبوونەوە دەبوایە، هەرلەوێ باسیان لە مەسەلەی پرسی دوای شەڕی داعش کرابا، لەوانەیە باسیش کرابێ بەڵام لە راستیدا نەک روئیای کورد بەڵکو روئیای حکومەتی عیراقیش لەسەر داهاتووی موسڵ و بەڕێوەبردنی روون نییە.

گرنگە کورد ئەو ناوچانەی کە کوردین و لەرووی مێژووییەوە کوردستانن و بەشێکن لە باشوری کوردستان، دەبێ کورد پارێزگاری دروست بکات. لەوانەیە لەهەندێ ناوچە کێشەی بۆ دروست ببێ، بە تایبەت ئەو ناوچانەی کە تێکەڵ دەبن لەگەڵ نەتەوەی تردا، وەکو تەلەعفەر کە لەمێژوودا کوردستانە، بەڵام لەرووی مەزهەبی و پێکهاتەی نەتەوەیشەوە گرفتی دەبێت، چونکە دانیشتوانی تورکمانی شیعەی لێیەو حەشدی شەعبی بە هەموو شێوەیەک رەفتاری تێدا دەکات، بۆیە پێموایە قۆناغی داهاتوو لەگەڵ ئێستادا، ئەگەر کورد لەرووی سەربازییەوە خۆی ئامادە کردبێ لە قۆناغی داهاتوو، کورد پێویستە لە رووی سیاسی و سەربازیەوە لە ئامادە باشیدا بێت، بۆ رووبەرووبوونەوەی هەر گروپ و میلیشیایەک کە لە عیراقدا هەن.

 

نوچەنێت: کەواتە کورد هیچ زەمانەتێکی بۆ دوای شەڕی موسڵ نییە؟

د.رێبوار: نەک کورد عیراق و خەڵکی موسڵیش زەمانەتینا نییەو نازانن، کە دوای ئەو شەڕە لە موسڵ چی روودەدات. ئەو ناوچەیە چۆن بەڕێوە دەبرێت، ئایا ئارامی و ئاسایش دەبێ یان گۆڕانی دیموگرافی بەردەوام دەبێت. کوشتارگەی مەزهەبی فراوان روودەدات یاننا، هیچ کەس بەرچاوی روون نیە کە قۆناغی داهاتوو چۆن دەبێت.

نوچەنێت: ئەگەر گۆڕانکاری جوگرافی رووبدات، لە بەرژەوەندی کێ دەبن؟

د.رێبوار: کەوتۆتە سەر شکڵی گۆڕانکارییەکە، ئایا گۆڕانکاری بەپێی ئیستیحقاقی نەتەوەیی و مەزهەبی دەبێ، ئەوا ئەو گۆڕانکاریانە لە بەرژەوەندی ئەو ناوچانە دەبن، بۆ نموونە ئەگەر ببێتە هەرێمێک و ناوچە کوردستانییەکانی بخرێتەوە سەر هەرێمی کوردستان، یان بخرێتە دەرەوەی ئەو هەرێمە، ئەوا بە دڵنیاییەوە رەنگە گرفت لەگەڵ کورد کەمتر دروست بێت، بەڵام ئەگەر بۆ نمونە دابەش کردنی موسڵ، بۆ چەند پارێزگایەک بێت هەندێکی تایبەت بە مەسیحییەکان یان تایبەت بە ئێزدییەکان دروست بێت، شنگال جیابێتەوە ئەوا ئەم گۆڕانکارییە گرفتی زیاتر بەدوای خۆیدا دەهێنێ، کە پێمان دەڵێ شەڕی موسڵ لە قۆناغێکدا کۆتایی هاتووە، کە داعشی لێ نەماوە، بەڵام لە قۆناغێکی تردا دەست پێدەکاتەوە. کە گۆڕانکاری جوگرافی خراپی تێدا دروست بووە.

نوچەنیت: دەڵێن لەوانەیە دوای نەمانی داعش، ئەگەری سەرهەڵدانی شەڕی شیعەو سوننەو شەڕی هەرێمی و هەتا کوردو کوردیش هەیە، ئایا ئەوە روودەدات؟

د.رێبوار: من رای تایبەتم لەسەر ئەو بابەتە هەیە. پێم وایە ئەسڵەن شەڕی مەزهەبی هەر خۆی هەیە، واتە دروست بووە. پێم وانییە تەسەوری ئەوە بکەین بڵێن هیچ شەڕێک نەماوەو کورد لەدەرەوەی معادەلەکەیە، شەڕی مەزهەبی لە عیراق هەیە، کوردیش بێ گومان دەچێتە ناو ئەو معادەلەیەوە بەڵام لە رووە نەتەوەییەکەیەوە. لەبەرئەوەی بە راستی ئێستا کورد، لە باشورو باکورو رۆژئاوا بەسەر دووئاراستەی جیاوازدا دابەش بووین، ئاراستەیەکیان لەلایەن تورکیاو تارادەیەک ئەمریکاوە بەڕێوەدەبرێت، ئاراستەیەکیان لەلایەن ئێران و تاراددەیەک روسیاوە بەڕێوەدەبرێت. ئەو دوو ئاراستەیە دژ بەیەکن، بۆیە پێکدادانی  ناوچەیی نەک بەرفراوان بۆ کوردیش لە ئارادایە، من پێموایە ئەگەرەکە ناوچەییە نەک فراوان و ئەوە یەکێکە لە ئەگەرەکان، ئەگەر بەم شێوازەی ئێستا سیاسەت بکرێت، ئەوا پێکدادنی کورد لە باشورو رۆژئاوا و تا رادەیەکیش لە نزیکی باکور دوور نییە.

نوچەنێت: دەڵێن پێشتریش کورد شەڕکەری باشی هەبووە، بەڵام سیاسی باشی نییە، پێتوایە لەم قۆناغەشدا دیسان کورد  هەر شەڕکەری باشی دەبێت و گەمەکاری سیاسی باشی نابێت؟

د.رێبوار: لەبەر ئەوەی ئەم ناوچەیە هەمیشە لە جەنگدا بووە، بۆیە زاڵبوونی شەڕکەری باش  زیاتر پێویست بووە تا سیاسی باش، سیاسی باش هەموو شتێکی لە دەسەڵاتدا نەبووە، لە دەسەڵاتیدا نەبووە بڕیار لەسەر چارەنوسی سیاسەت کردن لەم ناوچەیە بدات، بۆیە سیاسی باش زۆر گرنگی پێ نەدراوە.

ئەگەر دیقەت بدەیتە سیاسییەکانی ئەم ناوچەیە هاوکات شەڕکەری باشیش بوون، ئەم بابەتە لەم ناوچەیە تێکەڵ بووە، هەمیشە ئەم ناوچەیە جەنگی تێدابووە، بۆیە هەمیشە شەڕکەری باش رۆڵی کاریگەری هەبووە، ئەگەر مەبەستەکە ئەوەبێت کە کورد شەڕی کردووە بەڵام دەستکەوتی گەورەی نەبووە، ئەوە قسەیەکی دەقیق و رێکە چونکە راستە بەدرێژایی مێژووی سەدەیەک لە خەباتی کورد، نەیتوانیوە دەوڵەت و کیانێک بۆ خۆی دروست بکات، تا ئێستاش لەبەردەم هەڕەشە و مەترسی گەورەدایە رۆژێک داعش و رۆژێک ترس لە حکومەتی عیراقی و تاوانی حەشدی شەعبی، ئەوە بەڵگەیە لەسەر ئەوەی کە خەباتە دورودرێژە نەیتوانیوە  بەو شێوازەی کە پێویستە تەوزیفی بکات، ئەمەش تاوانەکەی تەنیا بۆ کورد ناگەڕێتەوە، راستە بەشێکی لە تاوانبار کە نەتتوانیوە وەکو پێویست بێت، بەڵام لە راستیدا هۆکاری هەرێمی و نێودەوڵەتی هەبوون، کە نەک لەبەرژەوەندی کورد بڕیاریان نەداوە بەڵکو لە دژی کورد بڕیاریانداوە، ئەو دژایەتییە وایکردووە کە کورد دەستکەوتی گەورەی نەبێ.

نوچەنێت: کورد لە کوێی ستراتیژیەتی سەڕی موسڵە؟

د.رێبوار: کورد لە ئێستادا لە نێو ستراتیژیەتی سەربازی شەڕی موسڵ دایە. هێشتا لە نێو ستراتیژیەتی سیاسیدا نییە، چونکە دواجار ستراتیژیەتە سەربازیەکە هێشتا تەحەکوم بە دۆخی موسڵەوە دەکات، هێشتا مەسەلەی ستراتیژیەتی روونی سیاسی نییە، کورد یەکێکە لە و هێزانەی کە شەڕ دەکەن بۆ رزگارکردنی موسڵ، لەرێی هێڵێکی دیاریکراوی شەڕکردنەوە کە پێیان سپێردراوە، ئەمە وادەکات بڵێی هێشتا دۆخەکە تەنیا دۆخی جەنگە دۆخی بابەتی تر لە ئارادا نییە، یەک رای هەیە لە نێو کۆمەڵێک رادا نەک هەموو راو ستراتیژیەکان بەسترابنەوە بە گەلی کوردەوە، واتە رایەکی هەیە لەناو چەندی رادا پێگەیەکی هەیە لەناو چەندین هێزدا، کە خاوەنی پێگەن لەو جەنگەدا.

نوچەنێت: کارتە سیاسییەکانی کورد چین بۆ هەر ئەگەرێک، کە دوای ئەو شەڕە بێتە پێشەوە؟

د.رێبوار: لە ئێستادا کارتی سیاسی هەرئەگەرێک بێتە پێشەوە، شێوەی ئەگەرەکە، کارتەکەی دیاری دەکات، کارتی گرنگ لەم قۆناغە بەدەست کوردەوە بریتییە لە بەشداری کردن لە شەڕی موسڵ، بریتییە لەوەی کە چۆن دەبێ بە بەشێک لەو شەڕەو ئەو شەڕە ئەنجام دەدات. چۆن رۆڵی دەبێ لە رزگارکردنی ئەو ناوچەیە و بەشداری لە دەستکەوتی ئەو جەنگە کە سەرکەوتنە، ئەوە تەحەکومی پێودە دەکات، کارتی دووەم پەیوەندییەکانی کوردە لەگەڵ دەرەوە پەیوەندی لەگەڵ ئەمریکاو ئەوروپا، دەبێ پییان بوترێک کە کورد توانیویەتی و دەتوانێ رۆڵی لە بنیاتنانەوەی عیراقدا هەبێت، بەڵام ئەگەر هەڵوێست و ستراتیژیەتی دژ بەرامبەر بە کورد بگیرێت ئەو هەڵوێستانە بەرژەوەندییەکانی عیراق ناهێنێتە دی، عیراق دەخاتە مەترسییەوە بۆیە ئێستا کورد کارتی نێودەوڵەتی و هەرێمی و سەربازی بە دەستەوەیە، نەوەکو شتێکی تری گرنگ، ئەو ستراتیژیەتانەش گرنگن، ئەگەر ئێستا تا کۆتایی لەم شەڕدا بەشداری نەکات بە دڵنیاییەوە لاواز دەبێ لەئەگەری سەرکەوتنی ئەم جەنگە، دووەم، لە رووی سیاسیشەوە بەکارهێنانی پەیوەندییە نێودەوڵەتییەکان گرنگییەکی گەورەی هەیە بۆ کورد.

نوچەنێت: بە نەمانی داعش سێبەری گروپە توندڕەوەکان لە کوردستان کەم دەبێت؟ پێویستە چی بکرێت بۆ ئەو مەبەستە؟

د.رێبوار: پێموانییە مەترسییەکان کەم بێتەوە، بەڵکو جۆری مەترسیەکە دەگۆڕێت، لەبەرئەوە ئێستا لە شکڵی داعشدایە پێشتر قاعیدە و زەرقاوی، واتە شکڵ و مۆدێلەکەی دەگۆڕێت، بە لاتەوە قورس نەبێ سبەی ئەو فکرەیەی کە ئێستا لە شکڵی ئیسلامێکی توندڕەوی سوننەدایە، دواتر بچێتە شکڵی ئیسلامێکی توندڕەوی شیعە، ئەوە بۆ خۆی دەبێ لەبەرچاو بگیرێت لە بەرامبەر ئەو میلیشیایانەی کە بە رۆژی روناک هەڕەشە لە کورد دەکەن، بۆیە پێموانیە کۆتایی شەڕی داعش کۆتایی مەترسی بێت لەسەر کورد.

نوچەنێت: بەگوێرەی شێک لە شیکردنەوەکان، ئەگەری سەرکەوتنی دەسەڵاتی شیعە هەیە لە عیراق بە نزیک دەزانن، ئەگەر ئەو ئەگەرە راست بوو کورد دەبێ چی بکات؟

د. رێبوار: ئەو ئەگەرە زیندوو- و بە هێزە. ئێستا شیعە لە هەندێ ناوچە دەسەڵاتی کۆنتڕۆڵ کردووە، لە سوریاو یەمەن و عیراق،هەتا بەحرەین و سعودیەش مەترسیان لەسەرە، واتە سەرکەوتنی دەسەڵاتی شیعە ئەگەرێکی گەورەو واردە، بەڵام پێویستە کورد چیبکات ئەوەنابێ  لەوە رابکات و پێویستی بە خۆ گونجاندنێکی حەتمی هەیە،  دەسەڵاتێک هەیە کە خەریکی کۆنتڕۆڵی تەواوی ناوچەکە دەکات کە شیعەیە، کورد باشترین بژاردەی ئەوەی کە مامەڵەی لەگەڵدا بکات نەک ببێتە رکابەری یان بەرامبەر، بۆیە ئەگەر مامەڵەی لەگەڵ بکات پێموابێ حەکیمانەتر و ژیرانەتر دەتوانێ دەستکەوتی هەبێت، لە قۆناغی داهاتوو.

نوچەنێت: ئایا کورد دەتوانێ هاوکات ئەو مامەڵە حەکیمانە لەگەڵ شیعەو سوننەشدا بکات؟ چونکە لایەنگیری هەر لایەنێک دژی بەرەکەی تر حساب دەکرێت.

د.رێبوار: شێوەی مامەڵەکە دەزانێت، کە تۆ ببی بەبەشێک لە شەڕی مەزهەبی ئەم دوو بەرەیە ئەوە کێشەیە.

نوچەنێت: پێتوایە هێشتا نەبووین بەبەشێک لەو شەڕە؟

د. رێبوار: من پێشتر وتم ئێمە دابەش بووین، بەڵام ئەگەر کورد بیەوێ لەم قۆناغەدا باشتر رۆڵ بگیرێت دەبێ کەمتر ئیش لەسەر لایەنی مەزهەبی بکات، بۆ نموونە دەتوانی ببی بە وەرەقەیەکی ئابووری گەورە، بۆ نموونە دەتوانی لەسەر نەوت و ئابوری ئیش بکات، دەستکەوتت باشتر دەبێ بۆیە  دەتوانێ تا راددەیەک هاوسەنگی رابگرێ، چونکە هەموان بۆ نموونە تورکیا پێویستی بە مامەڵەکردن لەگەڵ کورد هەیە لە بواری نەوتدا، لەهەمان کاتدا ئێرانیش لە بواری وزە ئەم مامەڵەیەی هەیە، بۆیە ئەوە تەحەکوم دەکات لە شێوەی ستراتیژیەت و کارکردنی کوردو قورسیش نییە.

نوچەنێت:  واتە قورس نییە کورد، هاوسەنگیەک لە نێوان ئەو شەڕە هەرێمییە رابگرێت؟

د. رێبوار: هاوسەنگییەکە پەیوەندی بە شێوەی مامەڵەکردنەکەوە هەیە. واتە ئەگەرکورد لە بواری ئابوری مامەڵە بکات، ئێران و تورکیا گرفتیان هەیە هەردوکیان لە رووی مەزهەبییەوە جیاوازن بەڵام لە رووی ئابوریەوە رێککەوتنێکیان بە بڕی ٣٠ ملیار دۆلار هەیە، ئەمە نەیهشتووە بوارە ئابوریەکە فەرامۆش بکرێت، واتە کورد دەبێ بیر لەو رەقەمانە بکاتەوە نەک بە تەنیا بیر لەلایەنگری مەزهەبی بکاتەوە لە هەندێ دۆخ.

نوچەنیت: جگە لە شەڕی چەکداری، پێویستە کورد چی بکات بۆ ئەوەی خۆی لە شەڕی مەزهەبی لادات، لە رووی سیاسی و فکرییەوە؟

د.رێبوار: پێویستمان بە هەندێک لە گرنگیدانی زیاتر و هاوکاری بەردەوامی سەربازیانە هەیە بۆ رووبەرووبوونەوەی تیرۆر، لەرووی سیاسییەوە پێویستمان بە پاڵپشتی نیو دەوڵەتی هەیە بۆ ریکخستنەوەی شێوەی بە ڕێوەبردنی عیراق یان سوریا، ئەمانە بۆ کورد گرنگە، بۆ قۆناغی ێیستا و داهاتووش. پێویستمان بە رووبەرووبوونەوەی فکری هەیە دەبێ زانکۆو سەنتەرەکانی لێکۆڵینەوەو نوسەرانمان و دەزگاکانی راگەیاندن، هەموویان ئیش لەسەر ئەوەبکەن کە ئەم قۆناغە قۆناغی بەرەنگاربوونەوەی فکری تیرۆریش بێت، ئەگەر ئێمە ئەم سی بوارە لەبەرچاو بگرین، پێموابێ دەتوانین لە قۆناغی داهاتوودا، کاریگەرییەکانی تیرۆر لەسەرخۆمان کەم بکەینەوە.

نوچەنێت: ئێستا ناوماڵی کوردی ناڕێکە و ناکۆکی توندی حزبی هەیە، پێتوایە کورد دەتوانێ هەموو ئەوانە بکات، بەم دۆخەی ناوخۆی ئێستای هەرێمەوە؟

د. رێبوار: باوەڕم وایە کە کورد بەم سیاسەتەی ئێستا نەک ناتوانێ هیچ بکات، ئەوەشی کە هەیە لەبەردەم مەترسیدایە، بۆ لە دەست چوون.

نوچەنێت: کەواتە چی بکرێت بۆ کەم کردنەوەی هەموو ئەو مەترسیانە؟

د.رێبوار: دەبێ ناوماڵی کوردی ریکبخرێتەوە. ئەوەش لەدەسەڵاتی کەسی یەکەمی حزبەکانە. رێککەوتنێک بکرێت بۆ دانانی ستراتیژیەتی سیاسی کوردستان، لە قۆناغی داهاتوودا ئەو ستراتیژیەتەش پێویستی بە رۆڵی هەموو لایەک هەیە، نابێ کەس بکرێتە دەرەوەی ئەو معادەلەیە. ئەگەر ئەوە کرا ئەو کات هەر یەکێک لە سەرکردەکان حوکم بکات، ستراتیژیەتی سیاسی هەیە و بەرەو بە دیهێنانی دەڕوات، ئەوە وادەکات کە ئێمە خاوەنی روئیایەکی روون بین بۆ قۆناغی داهاتوو، ئەگەر ئەوەمان نەکرد ئەوا خۆمان تەسلیمی واقعێک دەکەین کە زۆر روون نییە لەبەرژەوەندیمان بێت.

Share.

About Author

بوچون نوسین داخراوە.

Social Media Auto Publish Powered By : XYZScripts.com